《古惑仔》原本係香港一部以三合會為主題嘅漫畫，因大受歡迎而被改編為一系列的電影，唔單止決定香港黑社會電影的基調，甚至可以話係嗰一代型男嘅「兄弟之情」同埋「江湖道義」嘅最高準則。今日DailyView網路溫度計根據以往出演過古惑仔嘅藝人，透過網路大數據做咗個調查，一齊嚟睇下你心目中嘅大佬有無上榜啦！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
林子善可以算得上港片專業地踎，身材唔夠高大，樣貌唔算出眾，一副一事無成又古古惑惑嘅樣，令林子善一出道就晉身星爺（周星馳）嘅電影行列。係2005年加盟TVB後出演嘅角色，都係以反派角色嘅小混混跟班成為亮點，雖然渾身散發著無所事事嘅氣質，但又唔至於乞人憎嘅程度，反而成為兇狠中帶來喜感的調劑。
自細習武嘅伍允龍，真材實料嘅「打得又睇得」，係翻拍嘅《古惑仔：江湖新秩序》中擔任做打手嘅大頭仔。除此之外，伍允龍仲係片中嘅武術指導，演技同武打實力兼具。不過最為人熟悉嘅爛仔形象可能係2016年《城寨英雄》中的泰拳高手龍成虎，打鬥上來真係搵命搏咁，令人難以忘懷。
係《古惑仔》經典系列中無乜出息又無地位嘅包皮，由林曉峰出演。既無玉樹臨風嘅外表，個性軟淋淋容易被人欱到上心口，比起其他古惑仔，林曉峰好似來搞笑嘅咁，不過就因為角色平時膽小怕事，係重要關頭都一定挺身而出，義字行頭嘅反差更讓人印象深刻。
富有喜感嘅錢嘉樂飾演經典《古惑仔》系列電影中第五集出場嘅大頭仔（楊添）。雖然成日俾人攞來同電影最原本陣容中嘅巢皮做比較，亦曾被網友認為「非嫡系古惑仔」，不過錢嘉樂係現實生活中確係嘅「古惑仔五兄弟」 重要成員，而係2018年由自己執導嘅《黃金兄弟》就親手再創兄弟義氣故事，落實真兄弟嘅身份。
一陣都會提到有翻拍嘅浩南哥，又點可以無山雞？如果話羅仲謙係陽光男孩，梁烈唯就一定係以前班上都會有嘅壞學生，態度輕蔑又帶點不屑的神情，再加上山雞嘅角色設定本來就比較衝動易怒，梁烈唯演起上來連青筋都現埋，真係有幾分經典山雞 – 陳小春的影子。
濃眉大眼嘅羅仲謙成個人散發陽光男孩嘅氣息，之前主要出演正派角色。喺2013年翻拍嘅《古惑仔：江湖新秩序》中飾演浩南哥，被網友點評太過青靚白淨，做大佬稍微太青澀 。而2016年喺電視版《無間道》中飾演警隊明日之星，實則係黑警嘅韋峻軒，夾係黑白兩道嘅心路歷程，演繹就非常到位，被大讚又man又成熟。
做得古惑仔唔一定個個都係凶神惡煞，風度翩翩嘅任達華就將黑社會大佬呢個形象扭轉，斯文得來其實暗藏計謀，好有手段。最有趣嘅係任達華其實出身警察世家，既有一身正氣，同大部分演員詮釋古惑仔嘅無賴、狠勁唔同，任達華演繹嘅古惑仔屬於沈穩睿智型，實在係「唔聲唔聲，嚇你一驚」。
係《古惑仔》飾演浩南哥跟班嘅「大天二」，無論戲裡戲外，謝天華都好似只係配角。直到謝天華係2009年TVB劇集《學警狙擊》中出演黑社會大佬Laughing哥（梁笑棠），演技精湛到被譽為最搶鏡配角，攞埋當年萬千星輝頒獎典禮「最佳男配角」; Laughing哥甚至走出電視螢幕成為電影主角，亦正亦邪嘅形象大獲成功。
陳小春飾演嘅山雞，幾乎係本色演出咁滯。一副不可一世嘅飛仔樣，但骨子裡係非常重情重義嘅兄弟，經典台詞「我係唔係洪興人唔緊要，陳浩南你永遠係我大佬」奠定咗山雞係最有義氣古惑仔嘅地位。山雞身為第二主角，人氣幾乎同主角陳浩南不相伯仲，甚至被網路吹捧為「是比陳浩南更適合做大哥統一江湖的人選」。
𡃁坤手段毒辣，完全唔將江湖道上的「義氣」放在眼內，再搭上一副老牛聲，吳鎮宇成功令奸到出汁嘅𡃁坤成為第一名經典古惑仔。雖然𡃁坤係《古惑仔》電影系列只出現過一集，不過呢個角色令人印象難忘，甚至出埋外傳電影《旺角揸fit人》，吳鎮宇更因為呢部戲獲得第一個最佳男主角獎，簡直係實力派演出。
分析說明：
本研究資料分析時間範圍為2018年1月29日至2019年1月28日，共一年。
系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『經典古惑仔 』相關文本進行分析，並根據網友就該議題之討論，作為本分析依據。
DailyView曰：
古惑仔真係香港嘅經典啊！
