呢d地方都係香港嘅生招牌 曾經咁猛鬼嘅日月星街竟然都上榜？

由日街、月街、星街同永豐街組成嘅新熱門景點，百幾年係首間發電廠嘅所在地，因為唔少年輕企業家、藝術家同設計師陸續係到創業，令呢到成為匯集餐廳，時尚精品同藝廊嘅休閒熱點。 鍾意影相嘅文青一定唔會錯過呢個地方，不過當大家po嚟po去都係呢幾個地方，為咗與眾不同，就要繼續發掘新嘅影相地點啦。

大館係香港早期司法重地，包括中區警署、中央裁判司署、域多利監獄，維多利亞式風格同希臘復興式風格建築風格，紅磚牆、花崗石雕刻、石柱充滿歷史氣息，同周圍大廈形成強烈對比，吸引唔少人去影相。近年大家鍾意打卡影相，大館深受文青歡迎，但如果係對影相無咩興趣嘅本地人，或者就無咩吸引力喇。

PMQ 元創方呢個三級歷史建築係香港少有嘅文創地標，好多設計師工作室同文創店舖都係到。唔同範疇嘅設計商品都可以係到搵到，當然唔少得文青風格Café。充滿設計感理所當然成為新嘅影相景點，但香港政府係文創產業方面發展不足，恐怕好多香港人其實都對元創方唔係好了解。

廟街拋開香港「國際都會」嘅形象，回歸道地情懷，《食神》同《新不了情》都係呢到取景㗎。好多遊客都會係到食完飯，行市集感受在地文化。為咗賺遊客錢，有D老闆見到遊客就開高個價。手工藝品，古董咩都有，但品質就無保證啦。廟街仲出晒名係比人偷野嘅高危地點！所以好多香港人對廟街都係：行過就算。

身為世界級金融中心，IFC國際金融中心，自然係香港嘅地標啦。四季酒店同香港首間Apple Store都係到，話晒係蘋果美國境外第一百間分店，唔少蘋果迷都特登黎朝聖㗎。IFC入面都係名店，唔係香港人日常消遣會去嘅地方。金融中心一期同二期仲被揶揄為「兩支香」，就算得到遊客喜愛，但睇黎就唔係好討香港人歡心喇。

港大超過百年歷史，孔慶熒樓仲係香港法定古蹟添，學院風舊英式建築同新式建築交錯，難怪成為咁受歡迎嘅影相景點。每個國家嘅大學多多少少都蘊含住個個地方某部分嘅文化氣息，每個國家都會有大學成為旅遊景點，好似韓國梨花女子大學咁。相信當地人都一樣唔理解點解遊客咁鍾意。

纜車連接東涌同昂坪，係纜車車廂入面欣賞風景，中途仲會60度轉向，除咗俯瞰大嶼山，機場、天壇大佛等景色一覽無遺。「水晶纜車」嘅透明車底，最啱大膽嘅人去挑戰！但係昂坪纜車落成至今發生過嘅事故都幾多，絕對係大大打擊大家乘搭嘅意願呀！ 真係唔怪得香港人唔信任昂坪360。

係太平山頂，可以一覽維多利亞港兩岸嘅景色。接近黃昏嘅時候，望落去的確係幾震撼嘅。身為遊客區，太平山頂上嘅商鋪無論餐廳定紀念品嘅價格自然高，觀景台又長期都係遊客，就算有靚景，要影張無路人入鏡嘅相都唔簡單。長期置身係密密麻麻大廈中嘅香港人，可能都無辦法用欣賞角度來睇呢片「樓海」喇。

「海港城」呢個大型購物中心，行街食飯娛樂有齊之餘，仲對住維多利亞港，唔少旅客都會係海港城門口打個卡。呢D一站式嘅商場一次滿足遊客多個願望，但香港周圍都係商場，海港城又唔係最方便嘅地點，有咁多同類型的商場可以去，加上海港城入面消費偏高，所以大部分香港人平時都不唔會特登去。

每晚係維多利亞港上演嘅大型燈光音樂匯演，結合維多利亞港兩岸大廈，用燈光效果帶比遊客視覺同聽覺盛宴，呢個表演就符合香港「東方之珠」嘅稱號喇。 但對於生活係鬧市中嘅香港人，隨便抬頭就係各式霓虹燈招牌，一早習慣晒燈光同熱鬧，就自然對燈光show無咩興趣啦。