切勿跟車太貼！港鐵相撞代表咗咩社會問題？

港鐵作為一家揚名海外嘅鐵路公司，唔止亞洲，甚至連歐洲都覺得香港鐵路公司好勁，成日用香港做參考。但創業難，守業更難，當好多香港人都以為爛船都有三斤釘嘅時候，炒車災難卻揭示咗港鐵事後應變能力，真係好差！紙皮得，咁Condom都得喇。用人手慢慢咁拉返列車出嚟，會唔會太愚公移山？香港公共機構面對突發事件，真係手足無措。

香港勝在有ICAC？今時今日已經無咩人再講呢句說話喇。港鐵同政府之間嘅關係真係好鬼畸型，港鐵理論上係公共事業，政府官員都係董事局入面，但實際係上市公司，一心賺錢，仲要壟斷哂成個市場。林彥邦先生仲指出「政府不想管的，就搞外判，港鐵只是一例，領匯、市建局、隧道經營都是變種。」年年都有盈利，但年年都加價，可加不會減機制，邊個管到？

唔好意思囉！係啊！港鐵當年賣廣告俾人loop足咁多年！但係事實就唔係咁㗎原來！港鐵係唔會覺得唔好意思㗎！遠至以前大小問題，近至沙中線同今次撞車，從來都當市民豬咁蠢，唔公開解釋，唔會認錯！記者招待會就鬥厚臉皮，四圍賴都唔會面紅！沙中線就禮頓不負責任，今次就法國鐵路訊號商Thales冇做測試。嘩！咁惡！你話ok咪ok囉咁！

香港政府對港鐵不嬲都冇咩規管，港鐵係上市公司，唔係由香港政府營運，只係個大股東。話就話有個《香港鐵路條例》嚟，但規管權力就分畀幾個部門，有咩懲罰又聽嚟聽去都係罰吓錢咁。小問題已經不斷有，大問題就開記者會卸膊，成個管理層咩都唔知，咩都淨係識卸俾前線，卸卸吓又冇咗件事！好喇！今次撞喇！除咗又換管理層仲識唔識做其他嘢㗎政府？

港鐵相撞嘅深層原因，學林彥邦先生咁講，其實係香港嘅人口流量已經超越咗城市負擔。每日一百五十個單程證自由行移民落嚟香港，外來人口過多，旅客超六千萬人次，加埋有百分之四十五嘅人唔喺香港出世，搞到連香港一向引以為豪，外國鬼佬狂讚嘅港鐵，都頂唔順喇！今次系統更新嘅一大原因，咪係為咗可以等列車班次更多，解決呢個問題囉。

面對咁多離哂大譜嘅事，網民講得最多最無奈嘅一句係：「返工，不了。」咁又好難怪香港人嘅，自從雨傘運動之後，好多人都對自己嘅市民監督權失去信心，做咩都無用，結果連自己最後嘅公權力都唔運用，真係不斷咁惡性循環。近年好興一句形容詞：「港豬」，真係十分生動咁講咗香港人作為待宰豬仔嘅心態。但如果我哋唔盡力監督，只會更差啊！

好多網民都話：香港專業人員真係愈嚟愈無料到喇，唔係點會成日搞出個大頭佛？想當年，我哋都會覺得香港人做事好Profectional好有效率，但隨住社會內外嘅監督都失效，上面只係識用人唯親，權貴狐假虎威，攞住雞毛當令箭。只要睇吓政府局長通常都唔係嗰科嘅專業，多單人為疏忽，你就明係咩一回事喇。上樑不正下樑歪，有咩專業可言？

你有你嘅生活，我有我嘅忙碌。馬時亨俾《蘋果日報》影到開完港鐵相撞記招，即時飛去上海打高爾夫球，呢種不負責任嘅工作態度，早就喺香港各個領導階層體現哂出嚟啦。自己嘅利益永遠行先，that's why香港人成日受苦囉。除咗行動，馬時亨嘅金句都係香港領導階層隨口亂噏，堅離地城嘅一大代表。我話OK就得㗎啦，反正唔關我哋事，上飛機走先！

2017年香港安全系數名列全球第五名，邊個又諗到，竟然會出現港鐵相撞咁離譜嘅意外？如果喺返工放工時間，結果真係不堪設想，真正車毀人亡。其實香港近呢幾年，整體公共安全、街道治安都比以前差咗，人為錯誤、疏忽，其實全部可以唔係意外。好似梁啟智先生咁講，根本就係香港社會嘅結構性問題。唉，難怪好多網民都感慨咁講：香港真係唔安全啦。