依個地方，叫做香港，你同我，都係喺到大，喺到讀書、生活、返工、組織家庭……再慢慢變老。我哋可能嚟自唔同國家，唔同民族，有唔同嘅母語，但不約而同喺香港紮根，喺獅子山下守望相助。我哋認同香港依個地方，認同廣東話，認同繁體字，係擁有共同想像、文化、意識嘅一班人，我哋叫做──香港人。身為香港人嘅你，總會有一套電影，或者一個演員，又或者係一個角色、一句對白，喺你心入面佔有一個好重要嘅位置。因為佢哋代表咗你，代表咗香港人，同時代表咗香港。又一年喇，2019年香港金像獎又到，今年，你覺得代表到你嘅、你最鍾意嘅香港電影又係咩呢？DailyView今日用網路大數據帶你睇吓，今年金像獎呼聲最高啦！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
唔係天王，只係一個努力嘅香港演員
講起郭富城，你會諗起D咩？四大天王？舞林高手？愛車之人？馬主？定係……一個演員啊？唔講你又知唔知，今年城城以《無雙》角逐最佳男主角，已經係佢第六次提名，當中有只有《踏血尋梅》嗰年有獎。今年城城以《無雙》嘅李問，一個專業「造假」嘅假銀紙專家，競逐最佳男主角。無論得唔得都好，城城對電影嘅努力，香港人都看在眼裡！
喜怒哀樂，賦予角色血肉嘅香港演員
佢係𡃁坤，又係倪永孝、Mike、Sam哥……正反派都難佢唔到，做咩都入型入格，塑造咗唔同嘅角色形象。有時真係好難將吳鎮宇、𡃁坤同Sam哥連埋一齊，佢哋就好似三個獨立個體咁！依個就係吳鎮宇演技嘅魅力所在。而喺2019年，佢就係一個裝寬頻嘅中年大叔，叫做陳龍。好多人都話香港金像獎差吳鎮宇一個最佳男主角，應該，今年就還喇！
忘我表現，走出變態定型嘅香港演員
黃秋生係好戲之人大家都知，但唔知佢嘅好戲令到幾多人發惡夢，唔敢食叉燒包，唔敢搭的士？好戲嘅佢，當然係金像獎常客啦，今年又藉《淪落人》第五次提名最佳男主角。今次黃秋生飾演因工傷半身不遂嘅梁昌榮，唔郁手郁腳，用演技表現出生命嘅光亮。其實黃秋生好簡單，就係一個香港人，一個香港嘅演員，佢拍嘅戲，香港人會埋單！
香港精神，從一而終嘅普通香港演員
周潤發，發哥代表香港喺世界舞台發光發亮，係當之無愧嘅天王巨星，但佢生活依然低調、簡單、普通，仲計劃捐晒全部身家，現實中親切、錫老婆、善心，一個零死角嘅公眾人物。可以講話，周潤發依個名，代表咗一個完美的香港精神，已經唔係一個明星咁簡單。今年發哥被提名最佳男主角嘅電影係《無雙》，佢個人就好似戲名咁，無雙，拎唔拎我估發哥都冇所謂啦！
堅持到底，努力把握機會嘅香港演員
姜皓文上年藉《拆彈專家》拎最佳男配角，花名黑仔嘅佢話自己依幾年好好運，黑仔唔黑仔喇，有好多貴人幫佢、錫佢。其實，如果唔係得佢自己爭氣，俾心機，邊個幫佢都冇用啦！佢嘅努力大家都睇到，今年仲擔正突破演出跨性別嘅角色，仲首次被提名最佳男主角。雖然好多人都話今年黑仔應該係陪跑，但更多人睇好佢！覺得就算今次拎唔到，佢拎影帝只係時間問題！
今年坊間對男主角嘅討論有好多，五個提名人都各有人力撐，Dailyview統計咗網上對五個候選人嘅支持度，數字都咬得好緊啊！咁又難怪，五個都係好戲之人，今年表演又各有出彩嘅位，真係邊個攞都戥其餘四個唔抵！
新香港人，同熱愛這片土地嘅香港演員
姬素·孔尚治喺由新晉導演新晉導演陳小娟執導嘅《淪落人》入面，飾演一個菲傭，同由黃秋生出演半身不遂嘅顧主，共同渡過各自人生嘅不安、無助日子。姬素．孔尚治之前已經出演過香港電台嘅單元劇《獅子山下2017》，同樣都係飾演菲傭，今次初登大銀幕，就獲提名金像獎嘅最佳女演員同最佳新演員，希望佢有好成積啦！
駕馭力強，用演藝融入嘅香港演員
張靜初，已經係香港金像獎最佳女主角嘅提名常客，今次已經係第三次喇。《門徒》嘅女道友阿芬，《天水圍的夜與霧》嘅新移民阿玲，到《無雙》嘅阮文、吳秀清，演出角色跨度大，盡顯功架。今次《無雙》入面嘅演出，阮文同吳秀清，一個溫柔，一個狠辣，截然不同的風格一次呈現，相信唔少觀眾都拍爛手掌啊！
絕對專業，用身體寓言香港嘅演員
陳果執導嘅「妓女三部曲」最終章《三夫》，由曾美慧孜主演一個弱智、低端性癮症嘅水上妓女──阿妹。陳果用阿妹講《三夫》，用電影講香港，要支撐得起香港隱喻內涵嘅表現，曾美慧孜真係唔簡單。佢冇完整嘅對白，而係用眼神、表情、行為，支撐嗰種對原始性慾索求嘅表演，赤裸裸揭露生活同生存嘅唔同。唔怪得咁多人睇好曾美慧孜攞最佳女主角！
敬業樂業，努力追隨本心嘅香港演員
余香凝講過話自己好鍾意做戲，亦都好努力，就演員依個面向嚟睇，佢的確係值得被肯定。今次響《非同凡響》入面，余香凝飾演香港Band 1學生，錢思穎，高分表現出一個喺band 1學校，成績中下游嘅學生嗰種不安、唔自信、迷失。家長日同埋喺車入面喊嘅演出，完美流露咗香港學生，受社會、學校、家長同埋佢自己迫到埋牆角嗰種無助。進步好大，抵被提名！
勇於挑戰，從青春走到熟女嘅香港演員
可能大家都仲係慣咗口叫啊Sa，仲覺得佢係Twins入面嘅學生妹。但其實依個樣冇咩點變嘅妹妹仔，已經係被3次提名金像獎最佳女主角嘅女演員，喺大螢幕到不斷尋求突破，由《戲王之王》嘅單丹，《雛妓》嘅何玉玲，再到《非分熟女》嘅小敏，演技一直進步，喺演員嘅路上又愈行愈遠，腳印愈行愈深。近年仲不斷挑戰唔同的電影議題、角色，向老戲骨大大步咁行埋去！
今年最佳女主角，雖然冇咩老戲骨，但係實力一啲都唔可以睇小啊！睇返個數據，網民好撐啊Sa，但你唔好以為姬素·孔尚治排第五就弱啊！可以同黃秋生做對手戲而唔怯嘅新演員，你以為真係lulu啊？
分析說明：
本研究資料分析時間範圍為2018年4月7日至2019年4月8日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『2019年金像獎最佳男、女主角』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
DailyView曰：
我哋香港人今日一定要團結，我哋一定要做好香港電影
