2018年上映嘅《逆流大叔》，陳詠燊執導，吳鎮宇及胡定欣領銜主演，並由潘燦良、黃德斌、胡子彤及余香凝聯合演出，隨即掀起咗一波中佬熱血嘅浪潮。呢類型嘅運動競技電影一直深受歡迎，好似最初嘅《狂舞派》，後嚟嘅《點五步》，都係以香港文化、地理做基礎，加上勵志熱血，喺近年香港人面對嘅種種困境中就好似一支強心針咁。「逆流」，象徵嘅係港人逆流而上，誓不低頭，咬緊牙關頂硬上。今日DailyView用大數據話你知香港有十個「大叔」係唔同情況「逆流」而上嘅人生故事！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
好出奇咩？係咁㗎啦！
黃子華最初嘅夢想係演戲，幾經辛苦，加入咗香港話劇團，仲被香港電台發掘，演咗唔少電視節目。但可惜嘅係，一直都係茄喱啡，佢之後仲話呢段日子係佢一生低潮。又點估到，佢決定要退出娛樂圈，用棟篤笑表述呢種失落，《娛樂圈血肉史》受觀眾歡迎。咁佢一直Keep住做棟篤笑，人氣爆升，但都無放棄過演戲，2018年《棟篤特工》大獲成功，真係好熱血！
何必有我？
鄭則仕細細個嘅夢想就係演員，仲被中文老師話佢太貪慕虛榮，佢都無改其志。後嚟佢正式出道，一步一步受到重視，仲憑《何必有我》演出肥貓攞埋影帝。但係花無百日紅，因為佢嘅外表身形，之後都無會點做過主角。之後佢決定離開無線，轉投亞視，另覓脫離困境嘅出路，出演《肥貓正傳》系列連續劇，之後又演出唔同歷史人物，得到更多觀眾嘅歡迎。
人生有幾多個十年？
黎耀祥，可謂香港演藝界大叔逆流而上嘅經典例子，非常勵志。佢最初嘅代表作係《西遊記》入面做豬八戒，廣受關注，但就算係咁，都唔受公司重視。於是佢轉入電影行業，結果慘不忍睹，甚至一個月先返到一日工。最後返去無線，開始愈戰愈勇，到2009年演出《巾幗梟雄》嘅柴九，一句「人生有幾多個十年？」紅爆全港，最終成為三料影帝，實至名歸！
初哥哥，初哥哥～
本土型男張智霖，唔好睇佢今時今日好似好風光咁，其實佢嘅背後都曾經有過挫折。張智霖最初喺演唱界出道，推出唔同嘅唱片，仲攞過唔少新人獎，好似「勁爆家族大躍進男歌手獎」咁。但後面因為忙住參加電影演出，搞到歌唱事業進入停滯階段，專輯《孩子先生》反應認真麻麻。佢之後首次參演TVB電視劇《十月初五的月光》，初哥哥一角大受歡迎，令佢突破困境。
阿旺：你哋喺到講咩咩？
郭晉安成名好早，第一次參演經典港劇《誓不低頭》演謝安一角，大受歡迎，之後係咁做男主角，仲有人話佢係「張國榮接班人」！但好景不常，之後有好幾年佢都無任何突破，其他演員嘅成功更加令佢無咩存在感，好似已經過哂氣咁。《生死訟》仲成為無綫當年最低收視嘅劇，直落谷底。但佢無放棄，《戇夫成龍》阿旺一角終於成功，街知巷聞。
我一係唔威，一威就要龍咁威！
鄭中基唱歌出道，對音樂好有天份，甚至黃柏高成日話佢有潛質成為最受歡迎男歌手，被傳媒同歌迷話係張學友嘅接班人，咪話唔勁。但後嚟一連串負面事件，令佢形象跌到谷底，事業走到一個絕頭路咁。哇，唔通真係要因為咁，放棄一切？佢轉換跑道，唔唱歌，咪演戲囉！《龍咁威2003》嘅搞笑演出，之後一連串參演喜劇，重獲觀眾歡心，扭轉逆境。
今次係我第五次提名
郭富城，香港嘅四大天王，一直都係香港嘅巨星。佢最初以演唱、跳舞為主，後嚟先參加演出電影。郭富城攞過唔少電影獎項，但一直都無攞到香港金像獎嘅肯定。對佢，呢一個係逆流。佢以《三岔口》、《父子》、《C+偵探》、《殺人犯》四度提名最佳男主角，但到《踏血尋梅》先成功。佢攞獎時話，曾經諗要四十歲之前攞到獎，但其實要有更多人生歷練。
怯，你就會輸咗成世！
化骨龍？呢個可能係張家輝係激戰之前最深入人心嘅形象。佢最初出道，加入過亞視、無線，再殺入電影圈。呢段日子，佢刻意減少參演喜劇，力求改變形象。之後嘅《賭俠1999》、《黑社會以和為貴》、《出埃及記》都獲得香港金像獎最佳男主角提名，但之後嘅《證人》、《激戰》先獲得多個大獎肯定。尤其《激戰》健身嘅形象，成為香港人爆紅嘅話題。
我唔見咗嘅嘢我要自己攞番！
發哥，一位你可能喺香港行山，喺香港搭地鐵，都會撞到嘅平民巨星。邊個又諗到發哥嘅背後，曾經因為第一部參演嘅《胡越的故事》叫好唔叫座，俾人話係「票房毒藥」噃。之後五年都相當低潮，直到發哥參演《英雄本色》Mark哥一角，先到嚟個大翻身。導演吳宇森講過周潤發同Mark哥好似，一樣遇到人生逆流，將失敗化做成功嘅養份，仲攞埋香港金像獎最佳男主角。
你做事可唔可以唔好咁俹簁？
杜汶澤近年搞「杜汶澤喱騷」，惡搞抽水，好受香港後生仔歡迎。佢最初出道嘅成名作係《無間道》嘅傻強，之後事業都幾順風順水，但喺2006年佢因為各種負面事件，事業走入低潮，結果令佢信咗佛教，戒酒戒菸。之後仲要大痛一場，先重新出發。2012年，佢憑《低俗喜劇》獲得美國奇幻電影節最佳喜劇男主角、第49屆金馬獎最佳男主角提名，真係逆流而上。
蘇東坡有首詞同《逆流大叔》嗰種Never give up嘅精神好似，「回首向來蕭瑟處，歸去，也無風雨也無晴」。人生或者係不如意事十常八九，或者係充滿好多不可抗力嘅逆流，so what？「山不轉路轉，路不轉人轉，人不轉心轉」，外界可能無法改變，但我哋可以改變自己方向，唱歌唔得，咪做戲囉，做戲唔得，咪做棟篤笑囉。香港人最寶貴嘅，唔係獅子山精神，而係識執生。不斷咁嘗試，不斷咁開拓，總會發現新嘅可能，新嘅人生意義。咁樣睇，逆流大家都有嘅，怕咩？一齊逆流而上喇！
分析說明：
本研究資料分析時間範圍為2018年04月10日至2019年04月11日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港真人版「逆流大叔」 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
DailyView曰：
上得船，你只可以做一樣嘢，就係跟住你嘅鼓聲向前行！
