由於社交媒體嘅發達，唔少藝人都會將同另一半嘅相處，同一眾網友分享，一口恩愛嘅狗糧餵滿廣大嘅單身狗。原來平時喺螢幕面前光鮮亮麗嘅藝人，其實同另一半都有住最貼近人心、最溫馨嘅愛情。雖然新婚總是甜蜜，不過喺娛樂圈咁多變化嘅環境，以下我地同大家一齊睇下10對喺香港娛樂圈，結婚超過3年嘅恩愛夫妻，放盡閃光彈！
image source:Youtube/TVBUSAofficial
《小寶與康熙》裡面鬼馬精靈嘅韋小寶有七個老婆，不過現實中張衛健就只鍾情於佢嘅小郡主—張茜。拍拖6年，結婚12年嘅Dicky同張茜，經歷過瀕臨破產、兩次分手、兩次流產，真係順境逆境都一齊攜手渡過。Dicky一直都好自律，同其他女演員保持距離，成名之後依然保持零緋聞，就係為咗對妻子表終身承諾嘅忠心。
三哥三嫂一月先慶祝完結婚29週年，加埋拍拖8年，相戀超過37年。能維持一段長久嘅婚姻，莫過於責任感！就算三嫂生完仔，身材變樣俾人改花名，三哥第一件事就係出來表明立場：「每個人年紀都會大，樣貌會變，無理由生完小朋友就丟咗佢。做男人要學識承擔，同你生活咁多年，唔可以半途拋棄佢。」喺女人聽到都冧到爆啦！
阿澤同阿田相戀超過20年，兩個好似孖公仔咁基本上去邊都連埋一齊，加上兩個人都大情大性，一眼望去根本就係天生一對。不過愛情都點會得甜甜蜜蜜，兩個人嘅婚姻都有過第三者出現，不過就係同一時間阿澤嘅事業插水，有義氣嘅阿田唔忍心喺呢個時候離開佢，繼續陪佢走過低潮，喺娛樂圈嘅模範夫妻之一。
呢對啱啱先慶祝完瓷婚嘅明星夫妻，一直都喺娛樂圈內嘅愛情佳話。郭藹明具雙碩士嘅高學歷，同劉青雲結婚之後就一心做佢背後嘅女人。喺早兩年劉青雲再奪視帝嘅時候，喺台上致詞多謝佢老婆嘅時候，多謝郭藹明由「宇宙唔知邊一度，令佢好安全咁返來地球」，最美嘅愛情莫過於，喺茫茫人海中，搵到令你安心返屋企嘅路。
喺楊怡力拼幾年躍身成為一線花旦嘅時候，謙謙嘅事業都喺啱啱先起步。除咗女方大過男方5年嘅差距，再加上拍拖期間謙謙緋聞不斷，一開始大家都唔睇好呢段女尊男卑嘅感情。不過謙謙少理緋聞，用行動證明愛妻最大能事，多年來官方IG追蹤嘅都只有楊怡，表示眼中只有老婆一個。
又係一對TVB出產嘅天作之合，Jason同Sarah兩個都喺外國回流返香港嘅藝人，唔止外型登對，連氣質都特別合拍。早喺佢地公開婚訊之前，已經秘密拍咗拖7年，難為佢地平時喺公司仲要扮陌生。睇下Jason依家嘅IG都充斥住老婆，喺YouTube亦有生活頻道Sarah＆Jason，大曬日常平凡幸福，舊年仲增添咗一位家庭成員，相當幸福！
講到大台台慶經典場面，點可以無當年王祖藍同李亞男求婚嘅一幕。唔講唔知，原來喺正式一齊之前幾年，祖藍同李亞男就互有好感，不過礙於當時事業正起步，再加上外表差距嘅衡量，所以當年決定分開。由一開始被大做文章嘅「公主與小矮人」，到後面獲得廣大支持嘅「最萌身高差」，真係好似現代愛情童話故事咁啊！
小春喺遇到丁丁之前嘅形象都非常火爆，但係遇到應采兒之後，唔定性嘅古惑仔終於搵到歸屬。喺演唱會唱「相依為命」俾丁丁引到笑出來，突如其來嘅反差真係閃瞎一眾網友。而近年連同仔仔Jasper，一家三口一齊上節目，充滿父愛嘅表現令小春榮登愛妻顧家嘅代表人物。
張繼聰同啊Kay結婚10年，由一開始因為啊Kay唱歌事業發展順遂，張繼聰俾人叫咗好幾年「謝安琪老公」。不過張繼聰最出名嘅，一定喺佢不遺餘力地喺各大網路平台曬恩愛。今年情人節小倆口出街拍拖嗰陣，張繼聰借街頭藝人嘅吉他對啊Kay獻唱一首「每天愛你多一點」，啊Kay個笑容真係甜到漏。
娛樂圈唔缺少金童玉女，不過好似Chilam同靚靚咁嘅最佳拍檔，就真係唔多。近年兩個人拍住上節目曬恩愛，唔少人都封Chilam為愛妻號，完全包容靚靚咁大使又大脾氣。但係真正甜蜜嘅喺兩個人獨特嘅相處模式，可以喺鏡頭面前百無禁忌叫對方去死，但又會笑住感恩有對方喺身邊扶持27年，標準嘅「執子之手，與子偕老」。
其實除咗顏值高啲之外，喺螢幕面前嘅男女，就好似我地日常返工咁，喺公司識到志同道合嘅另一半。不過喺娛樂圈呢個大環境，唔單止一舉一動都喺鏡頭下俾人飽覽，有相當壓力之餘，再加上選擇同誘惑都咁多嘅情況下，都可以緊握身邊嘅人一齊堅守愛情，真係好鬼sweet啊！
分析說明：
本研究資料分析時間範圍為2018年04月10日至2019年04月11日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港娛樂圈經典甜蜜夫妻』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
DailyView曰：
狗糧多到消化唔晒喇TT
