近年迪士尼帶起咗一股真人版卡通嘅風潮，唔少動畫都被改編成真人電影，但好多Fans一邊期待之餘都好擔心心目中嘅經典作品被破壞，又或者無達到期望值。失望事小，好似連細個回憶都被人破壞埋咁就真係好激氣㗎嘛！
把口咁講姐，但我估大家都係會乖乖俾錢入場支持嘅，今日DailyView就幫大家整理咗2016年到下年（2020年）最高討論度嘅十套電影，但又有無滿足大家心入面嘅期待呢？
DV小教室：香港網路大數據觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source：迪士尼台灣官網
1994年經典動畫《獅子王》，事隔25年，翻拍成真人版電影，大家係咪同我一樣咁期待呢！經典場景透過CG動畫重現，主題曲一響起，真係令人起曬雞皮呀。
由迪士尼發布嘅預告可以見到，預告每一幕都呼應過去經典，向1994原版致敬。由目前發布出黎嘅海報可以見到辛巴透過CG重現之後真係好得意！唔少當年睇過原作嘅Fans都話見到畫面都已經感動到想喊，你又有無同樣感受呢？
原本係芭蕾舞劇，被改編成動畫，其實唔止一次被改編成電影，但之前幾部評價都唔太好。2018同樣係迪士尼拍嘅《胡桃夾子》，由當年未成年嘅新人Mackenzie Foy擔綱，由9歲就開始演戲嘅佢經驗豐富、演技精湛，擔正女主角都未驚過。
劇中視覺效果令人大開眼界，色彩繽紛嘅夢幻世界，充滿歐洲古風嘅建築、美學元素，話俾大家聽呢個又係一個迪士尼打造嘅夢想王國。
由知性女神Emma Watson飾演Bella嘅美女與野獸2017年重新帶起一股熱潮，改編1991年迪士尼經典之作，主題曲各位相信一樣耳熟能詳。話就話改編電影，但呢套真人版電影同動畫相似度幾乎99%，還原原著場景、衣著，甚至運鏡手法都效法原著動畫，係還原度堪稱最高嘅一部真人電影。飾演女主角嘅Emma Watson有諗法、有個性嘅獨特氣質，同Bella非常吻合，加上重現一段段經典畫面，咁多位Fans都覺得回憶返曬嚟啊！
呢幾年迪士尼將好多經典卡通拍成真人電影，繼2017年大受歡迎嘅《美女與野獸》，今個月上映嘅《阿拉丁》，已經宣布下年上映嘅《花木蘭》更搵到仙氣十足嘅女神劉亦菲飾演女主角花木蘭。《花木蘭》濃厚亞洲氣息，係咁多部迪士尼電影入面特別唔同嘅一點。原本大家都怕會唔會用外國演員嚟演套電影，但迪士尼就叫大家放心，為咗令作品更完美，會用返華人演員。已經發布嘅角色定裝照可以見到劉亦菲完全表現到花木蘭嘅氣勢呀！衝住一睹女神風采，就已經可以吸引好多人入場啦。華人影迷一定都好期待呢套經典出嚟嘅成品，好嘢係值得等待嘅！俾啲耐性，下年見！
比起其他電影《魔幻森林》原本故事應該比較不為人熟悉，但同樣係迪士尼出品嘅電影，質素有一定保證，呢套真人動畫累積票房已經達到8.36億美元。
最令人驚艷係呢套戲嘅CG特技，印度籍小朋友演技加上全部用CG造出黎栩栩如生嘅動物動畫，令人彷彿真係置身於叢林之中，會睇到人眼定定。故事除咗帶出人類同動物可以共存，但森林仍然有一套人類唔可以破壞嘅法則，而一個被狼群養大嘅小朋友放下自己獨特性，迎合森林長大；而反觀依家呢個世界為咗進行所謂嘅人類發展，我地又摧毀咗幾多大自然嘅法則呢？
阿拉丁主題曲“ A Whole New World ”大家都聽唔少，動畫又有無睇過呢？就算無都唔緊要，呢套經典動畫改編真人版電影呢個月即將上映！深入民心嘅燈神，仲係由Will Smith飾演，預告入面浮誇搞笑演出相信會成為一大亮點～
可以期待一下原本動畫入面華麗場景，坐飛毯嘅畫面，變成真人版之後會係點？到底係重現經典定會令迪士尼迷失望呢？大家買定飛準時入場一探究竟啦！
相信大家細個都一定有聽過小飛象嘅故事，同人與別不同而被當成異類嘅小飛象，感人嘅情節令唔少人都留下深刻印象。
今次拍成真人電影，除咗小飛象造型夠曬Cute之外，仲加多咗關於「動物表演」呢啲議題嘅元素。令人喺感動之餘，都俾咗好多思考空間觀眾。馬戲團、動物園嘅存在到底係咪只係為咗滿足自私人類呢？
《銀魂》係日本漫畫家空知英秋作品，呢一部風格獨特嘅搞笑漫畫，以諷刺、無厘頭手法，劇情穿插人生道理，成功吸引唔少漫畫迷。天馬行空嘅劇情令呢套電影少不免要加入大量特技效果，未必啱所有人嘅喜好，不過要講到引起最高討論度嘅一定係電影入面被稱為「神還原」漫畫人物，日本人cosplay一向屈機，電影選角亦都落足功夫，fans都話還原度100%，以一套向原著致敬嘅作品嚟講，有呢啲評價都算幾出色㗎喇！
近排討論度最高嘅電影應該就係復仇者聯盟，但呢套POKÉMON可以話來勢洶洶，上映短短幾日都已經成爲城中熱話。幾年前POKÉMON GO 手機遊戲令全球瘋狂，所以人氣真係唔可以睇小。
上映到宜家基本上都係好評如潮，特技效果同小精靈形象都令大家眼前一亮，將每隻小精靈本身特色呈現得好好，好多人會擔心真人配卡通會好唔夾。
不過唔洗驚，好多睇完呢套POKÉMON嘅人都話完全無違和感，好真實。如果你仲未睇嘅，不妨今個禮拜約埋朋友去感受下呢套經典卡通啦~
作爲迪士尼經典卡通之一嘅Winnie the Pooh，相信無論大人細路見到佢都會有好多回憶湧上黎。唔好以為大家都係討論埋啲政治嘢先得㗎，其實呢套戲仲入圍咗奧斯卡最佳視覺效果獎！
喺上年暑假上映嘅《維尼與我》，票房達到接近2億美金，雖然係卡通片改編成嘅真人電影，但唔好以爲專係比小朋友睇，其實大人去睇一定更有感觸呀。電影講男主角人生路上迷失方向，遇返小時候玩伴維尼。維尼同當年一樣天真無邪，但男主角已經被殘酷社會同化。好多維尼講出嚟聼落好天真、好傻嘅對白，其實好值得我地反思，以前開心明明係好簡單嘅事，但隨住成長，我地被逼要成熟、世界變得複雜，開心竟然變成好奢侈嘅事。相信各位有同樣感受嘅人，一定都會睇到眼濕濕。
分析說明：
本研究資料分析時間範圍為2018年05月09日至2019年05月10日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『真人版卡通片』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
DailyView曰：
「細個睇卡通片笑，大個睇到喊。叮噹可否不要老～」
