歌手唔一定淨係識唱歌？同你細數港台十大創作歌手！

我不是一定要你回Line～明明《超級星光大道》係個歌唱比賽，點知跑出線嘅LaLa徐佳瑩唔單止係個創作歌手，出道之後仲要幫其他歌手寫歌～最多人鍾意聽佢寫俾楊丞琳嘅《點水》，佢仲有幫好多出名嘅歌手寫歌，例如係A-Lin嘅《不管幸福來了沒有》，仲有張惠妹嘅《傲嬌》同埋李佳薇嘅《一樣的是》，簡直係音樂才女一名！

蘇打綠嘅青峰寫嘅詞真係好溫暖人心㗎～例如係《小時候》，有好多網民話聽完佢喺首歌入面所演繹嘅獨白之後，就好似一場療傷咁，輕輕咁撫摸緊你嘅傷口。青峰都有同好多歌手合作，仲要好多歌都好出名𠻹！作詞方面例如係楊丞琳嘅《年輪說》同蔡依林嘅新歌《怪美的》，作曲方面就有楊宗緯嘅《啊！默契》，雙管齊下就有S.H.E嘅《十七》，唔怪得首歌咁感動啦！原來係青峰作詞作曲！

林俊傑被大家稱為行走嘅CD，因為佢嘅唱live功力實在一流冇得頂！佢除咗寫歌俾自己之外，仲作咗N咁多首俾其他歌手唱，有唔少都好感動人心㗎！有網友就話每次聽林俊傑寫俾張惠妹唱嘅《身後》都會感動到忍唔住喊㗎！（小編都覺得好好聽好感動嗚嗚T＿T，林俊傑唔單止會作曲，有時仲會負責和聲，例如係鄭容和嘅《Checkmate》，佢仲有份製作蔡依林嘅《馬賽克》！

「下？！43歲？！一啲都唔似喎！」係呀，五迷都叫佢做大叔㗎啦，如果冇咁老，又邊會有咁多音樂作品呀XD阿信除咗喺五月天專輯裡面每首歌都有份創作之外，由1999年開始就已經幫其他歌手寫歌㗎啦！講到最出名嗰一首，一定係《洋蔥》啦！楊宗緯同丁噹都有唱過㗎！不得不提今年第三十屆金曲獎嘅年度歌曲獎項入面，阿信有份製作俾蔡依林嘅《玫瑰少年》同林憶蓮嘅《沙文》都有入圍㗎！

周杰倫有才華就冇咩人唔知，原來佢由1998年開始已經有幫其他歌手同團體寫歌㗎啦！唔好以為佢剩係幫台灣嘅歌手創作呀，佢都寫咗好多作品俾香港歌手唱㗎！例如陳小春嘅《我愛的人》、陳奕迅嘅《淘汰》、容祖兒嘅《小小》、今年仲有幫鄭俊弘寫咗首《等待我的愛》𠻹！除咗音樂之外，佢套自編自導自演嘅《不能說的秘密》都係非常大賣㗎！仲拎咗好多獎𠻹！

唔好以為姓藍就以為藍奕邦係個藝名，其實佢一出世就係呢個名㗎啦！雖然好似唔多人知道藍奕邦係一位歌手，但係唔少人都知道佢係一個音樂創作人。由2001年開始就有寫歌俾其他歌手㗎啦～冇佢嘅貢獻香港樂壇都真係失色不少㗎！例如係容祖兒嘅《舊日回憶的山丘》、許志安嘅《豬先生》、鄭欣宜嘅《女神》都係藍奕邦嘅作品嚟㗎！

「你快樂過生活，我拼命去生存」，呢首歌基本上人人都識唱，憑住《高山低谷》出名嘅林奕匡雖然2007年先出道，但係佢嘅作品都好高質素㗎！唔好以為佢只寫俾自己唱呀，周柏豪嘅《還記得》、陳柏宇嘅《別來無恙》、《霸氣情歌》都係出自林奕匡嘅手筆，就連2018年JW黃灝兒嘅《維多利亞》都係由佢寫曲㗎！

點解我咁講？你有邊次去親M記唔會聽到Aga啲歌㗎？XD不過Aga人靚聲甜，基本上首首歌都大紫大紅。其實係佢未出名之前，Fiano薛凱琪有首好出名嘅《Better me》就係Aga作曲㗎啦！仲有連詩雅Shiga嘅《好好過》都係佢作曲㗎～講近期嘅話，張敬軒最新嘅歌《空手而來》都係Aga作曲，新歌一出冇耐就已經大受好評！

好多人都以為方大同係台灣人，NO！方大同係美籍華人，之後定居咗係香港㗎啦～方大同被稱為係R＆B嘅音樂才子，寫歌有自己style之餘唱歌又好聽！佢寫俾其他歌手嘅歌就真係多到數唔晒！例如係陳奕迅嘅《孤獨患者》、容祖兒嘅《牆紙》、寫得最多嘅當然係佢嘅「緋聞女友」薛凱琪Fiona啦！例如《糖不甩》、《告別我》都係方大同操刀㗎！

喺香港好似好多人都聽過周國賢，但實際上就對佢冇咩印象，甚至呢一代小朋友都唔知道佢係邊位，可能剩係聽過佢首《地下街》，又或者係《目黑》。其實周國賢都有幫好多歌手寫歌㗎，其中一首係基本上90後都一定識唱嘅歌，就係周柏豪嘅《夠鐘》啦！原來呢首咁好聽嘅歌係周國賢作曲同編曲㗎！陳奕迅嘅《四季》同何韻詩嘅《是有種人》佢都有份創作㗎！