飛雪連天成絶響：網民傾金庸講得最多嘅男女主角係邊個？

——仲有個名叫喬峰
蕭峰，其實原先叫做喬峰，因為佢當時仲以為自己係漢人，做緊丐幫老大，好鬼風光。但點知呢，佢被人揭穿咗係當時漢人死對頭契丹人嘅後代，大家即刻反轉豬肚，夾手夾腳對付佢。蕭峰呢個名，就係因為知道自己係契丹人而改嘅。蕭峰可能係全金庸男主角入面，實戰最強嘅人。皆因佢只要面對高手，往往會愈戰愈強，發揮超水準功夫。加埋佢同阿朱段悲情故事，喺金庸書迷心中留下深刻印象。

——為國為民，俠之大者
郭靖最出名係咩？唔係武功高強，識出降龍十八掌，精通九陰真經。而係佢溝咗全射鵰最正嘅黃蓉！溝到女唔出奇，奇就奇在郭靖呢，完全唔見得有咩溝女資本。佢唔靚仔，口才唔好，最初功夫都唔夠黃蓉高。咁佢勝在咩？佢做人夠單純夠傻，體貼真心咁對待黃蓉，結果就令女神主動愛上佢。郭靖就好似天下單身好男人嘅夢想咁，只係用真心、單純，就可以溝到女神。嗚呀！我都想做郭靖呀！

——通吃島島主
金庸最後一部武俠小說《鹿鼎記》，傳說中嘅集大成之作，一反傳統男主角嘅英雄存在。韋小寶武功奇低，除咗普通人，基本上係唔夠打嘅。佢嘅性格呢，完全唔係正直勇敢，信奉「精人出口，笨人出手」，怕死怕到咩原則都可以放低。韋小寶遊走係朝拜同天地會之間，全靠佢嘅口才、機智，甚至無賴。唔打得？咪用錢囉。溝唔到女？咪用人脈囉。最後通吃Everything，非典型武俠小說主角嘅大成功。

——九陽神功，屈機天下
如果講到金庸入面最屈機嘅內功，九陽神功大可一戰。張無忌細細個喺山洞練九陽神功，之後又因為說不得嘅乾坤一氣袋打通埋任督二脈，神功大成，自此順風順水。乾坤大挪移？練到陽頂天走火入魔？Easy job，張無忌開外掛即刻點滿技能。張無忌係天才，之後見過嘅外功招武，基本上一見到就可以學識點用。學唔到？無問題嘅，有乾坤大挪移。唔好講聖火令喇，單係佢嘅功夫，已經夠我哋傾幾日。

——浪漫多情瀟灑不羈
楊過，可能係金庸小說入面最受女Fans迷戀嘅男主角。點解？楊過基本上同李安納度一樣，細個青靚白淨貴族公子咁款，中年佬味十足Man到引死人。佢仲要俾部芙劈低咗隻手，呢件事對楊過唔係扣分，係加爆分，佢咁鬼慘個個囡囡見到都想照顧佢一生喇！浪子回頭金不換，楊過溝過好多女，程英、陸無雙、郭襄等都至死不嫁，但佢點到即止，因為佢最愛只得一個，小龍女。哇，仲要專一？玩哂喇！

——日月神教教聖姑
任盈盈喺日月神教輩份奇高，號稱「聖姑」，正因為佢嘅名聽落咁老人家Feel，令到令狐沖係未見過佢樣之前，以為佢係長輩。令狐沖其時身患重疾，加埋小師妹俾林平之溝埋，真係生無可戀。呢個時候任盈盈嘅琴聲安撫咗佢，令佢願意盡訴心中情，令任盈盈芳心暗許，用盡方法要醫好佢。任盈盈嘅一往情深，為愛放低身段，出走神教，用條命換《易筋經》俾令狐沖，咁多人討論，都好合理嘅。

——女中豪傑，人中諸葛
黃蓉，應該係金庸全書不論男女老幼入面最聰明嘅角色，連楊過係佢面前都差一皮。如果無佢化身鋒味大廚，哄到洪七公傳咗降龍十五掌畀郭靖。佢嘅機智，勁到係孤島之中，洪七公身負重傷，面對歐陽克，都可以整到天降巨石，壓斷咗武功勁過佢歐陽克隻腳。如果唔係佢醒目，歐陽鋒已經成功咗唔知幾多次。佢嘅醒目，功夫高強識打狗棒法，仲做埋首任丐幫女幫主，絕對係金庸群書中首屈一指嘅女超人。

——十六年之約，不見不散
古墓入面白衣飄飄，訓喺一條繩上面，小龍女嘅與世隔絕，超越凡塵，相當深入人心。但佢嘅冰冷，偏偏俾熱情如火嘅楊過所改變，甚至令無情嘅小龍女都變得多愁善感。當佢誤以為楊過不負責任，係幾咁傷心，甚至當場吐血。當佢知道自己重傷將死，唔忍心楊過傷心自盡，許下一個最美麗嘅謊言，十六年之約。十六年之後，楊過依然傷心到跳涯自盡。好彩嘅係，湖底再會，真係做到不見不散。

——飽受內心折磨嘅奇女子
《倚天屠龍記》入面，爭議性最高嘅角色，相信必定係周芷若。周芷若最初俾人嘅形象相當純情，細細個已經餵過張無忌食飯。入咗蛾眉派，滅絕師太叫佢攞把倚天劍吉張無忌，佢聽話做咗但又即刻喊，師門之恩叫佢對付明教，一路令佢始終好大掙扎。之後假嫁宋青書，唔多唔少係想激嬲張無忌。練咗九陰真經，做咗唔少壞事，其實都源於自己內心嘅不安。周芷若，真係叫人愛恨交加，個個人睇法都唔同。

——為愛甘願成草莽之流
趙敏，高貴大方，果敢幹練，蒙古族嘅「紹敏郡主」。趙敏厲害之處，唔係佢武功高強，而係智謀。乍一出場，已經令武林六大派高手中毒，內力全失。佢本身只係為要征服中原武林，等佢地唔敢反抗元朝官府。又點估得到，竟然係愛情征服咗佢，張無忌變成佢內心最愛嘅人，甚至不惜同老豆阿哥決裂，只為咗留喺張無忌嘅身邊。由皇親國戚變成江湖草莽，趙敏愛得轟轟烈烈，難怪咁多人討論嘅。