香港樂音，繞樑三日
生活喺香港，音樂真係好緊要，特別返放工喺地鐵迫到沙甸魚咁嗰時，耳機真係一大救贖。耳仔邊播緊嘅係旋律又好，節奏都好，都可以喺依個咁擁擠嘅城市到，製造專屬於自己既私人空間。人愈大，香港就好似愈嚟愈迫，愈嚟愈壓抑，你有嘢想講但唔敢講，唔再好似細個咁咩都唔驚，日日通街走通街嗌。你好羨慕，羨慕以前嘅人朝氣勃勃，面對大小事都可以嘻笑怒罵。嗰時香港地好有希望，香港人對自己獨特嘅本土流行文化好自豪，會睇香港電影，聽粵語歌。依家呢？你耳邊播緊嘅歌係咪你熟悉嘅母語？係咪講緊你熟悉嘅地方？黃霑以1997年為粵語流行曲嘅分水嶺：「粵語流行曲沒落的趨勢，限於環境，已難望再有奇蹟出現。」2019年嘅今日，連香港人都唔係好聽香港歌喇，香港已死？梗係唔係！仲有好多香港人支撐住本土音樂，支持本土文化。今次DaliyView就同大家介紹吓一班仲堅持喺香港唱，唱香港嘅獨立樂團啦！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
——You Know What the ＊ I Am Saying
有人話LMF嘅歌不文，但唔知嗰班人有冇收到D歌想帶出嘅訊息呢？語言文字只不過係承載訊息嘅工具，LMF嘅歌係多粗口，但當中斥責嘅社會問題先係重點，先係值得被反覆思考嘅嘢。好似佢哋回應負評《傲氣長存》嘅歌詞咁：「喂！係咪講幾句粗口就會教壞你個仔／又唔見我鬧幾鬧就可以改善社會問題」，到底咩先係影響、教壞下一代嘅源頭？依個問題，可以同LMF《惡世紀》其中一段rap解答，「人人為我我為人人／穩定社會背後照舊血淋淋／太多真相無權過問被囚禁／正義聲音永遠為公義抗爭」Respect！
——熱血港青愛膠友
香港有冇問題，你知，我知，對面個單眼佬都知。但要點面對依D問題，真係好考功力，個人灰少少都分分鐘頂唔住。而神奇膠就實行風趣反智，玩盡唔同曲風，唱盡香港社會問題。好似首《絲打與貓》，同娘娘同兵嘅關係嚟包裝保護流浪動物的訊息，真係有意義得嚟，又好鬼風趣幽默嘅啫。佢哋有時輕鬆mode，有時又會認真mode，好似首《做你男人我》咁，唱出一句「在雨中找到自覺／昂然守護我的世代」，令到香港人好有共嗚！香港係我哋嘅地方，係我哋嘅屋企，守護屋企係所有香港人要做嘅嘢。
——我踏在架空世界的瓦礫之上
香港純音樂獨立樂團話梅鹿，佢哋係無主音嘅，係主流音樂界無可能做到嘅事，反而成為佢哋係地下獨立樂團嘅特色。當然佢哋唔係首首都無歌詞，好似《Lichen 地衣》，「聽你唱美麗童謠／放開手上破紙鳶／一切都不重要」，平淡之中有幾分詩意，配合埋獨特嘅曲風，認真迷人。各種唔同、奇怪嘅拍子組合，造就咗佢哋獨特風格，最經典當然係《熱寂》喇！佢哋呢首歌曲好受歡迎，令香港唔少地下樂迷都愛上佢哋。話梅鹿嘅MV製作亦都好有意思，《Cyanide 氰化物》睇落甜蜜蜜，點知原來係愛你愛到殺死你，睇到毛管戙！
——Do You Know Me!
同好多明星好老友嘅廿四味，咁多年嚟都咁real，對於Hip Hop、音樂嘅態度一直冇變過，正正同佢哋《Do You Know Me》嘅歌詞講嘅一樣，「越rap越燥／呢一種態度／我唔想Let It Go」，真係respect到……ok。2019年，廿四味出左首新歌《M.L.Y》，睇個名就聞到陣local味啦，聽埋首歌就知佢哋認真貼地，rap出香港人嘅心酸，rap出香港人嘅無奈。「起勢猛做／起勢猛做」，「不停咁儲／不停咁儲」，點努力都好似冇希望咁，仲點安居樂業啊？廿四味學大美人一句：「我真係恭喜你呀香港地」。
——Wo wo wo wo wo wo wo
主音Jan Curious披頭散髮，瀟洒咁隨住歌曲擺動，唱出令人為之動容嘅詞句，相信係一眾睇過觸執毛演出Fans最深刻嘅印象。一首《Good Night》，絕對係國際級水平，不論編曲、歌詞都係一絕，相當與別不同。觸執毛主要係用英文作詞，樂評形容佢哋「將不同樂風與搖滾揉合，充滿實驗味道的風格」，好似《One O'clock》咁，「oh don't think just follow me／it's a once in a lifetime opportunity」，演奏一層比一層緊張、激烈，令人想講，香港竟然有咁正嘅樂隊！
──Why Don’t You Kill Us All
有時候真係好想怪雞蛋蒸肉餅唱得太到肉，用數字搖滾(Math Rock)溝民謠(Folk)嘅新鮮多變音樂，呈現一個個血淋淋嘅社會事實。好似《Double No No》，一句「I so love my home／the place we grow up／what it becomes now」，真係唱出香港人近幾年嘅心聲。望住香港近年變咁多，好多嘢冇晒道理，社會上好多嘢都係夾硬嚟；好多香港人為咗生活，為咗家庭，都只可以無奈屈服，講句「返工，不了」。所以，好多謝雞蛋蒸肉餅用歌曲幫我哋出聲，幫我哋大聲質問：「What's wrong with all those souls／Can't you hear them screaming below」。
——但我共你可一起喝悶酒
KOLOR自《INDEPENDENCE LIVE》獨立至今，創作、演奏咗無數精彩嘅歌曲。好似2009年《圍城》咁，「當青春不再／你為何喧嘩／ 時尚裡的榮華／文物都可變泥沙」，點出咗香港人奮鬥嘅困局，喺物慾橫流嘅時代，可能好多有價值嘅事物都會消逝，真係好悲涼！2012年《這些機會不屬於我的》更加唱出失戀嘅痛苦，唔係一味三幅被叫春，「途人話放下了就會治療／難道仍不棄歷史那月票」，寫得好入肉。2019年5月新歌《初老》，「失去初心就已經初老」，講出現實嘅無奈，點出咗初衷嘅價值，理想難為，我哋一定要繼續支持KOLOR。
——希臘神話有一個故事……
「邊一個發明了返工／我要給佢米田共／邊一個發明了返工／返到我愈嚟愈窮」，可能係香港最獨特嘅獨立樂團My Little Airport，2009年《邊一個發明了返工》，講出咗全香港打工仔嘅心態，而家無人返工呀！My Little Airport嘅題材相當貼地，好似《給金鐘地鐵站車廂內的人》，用香港地鐵呢種交通工具做題目，實寫香港人迫到爆嘅情況，但歌詞又指緊「你們曾經是夾在月台上有理想的人」，上咗岸嘅，就唔再行入d，真係相當寫實。《西西弗斯之歌》睇歌名離地，其實講中哂香港人嘅無力，唯有好似神話故事咁，「我開始搵到工作嘅快感」，好有意思！
——100蚊可以拍個咩MV呀你覺得？
2017年《救殭清道夫》主題曲，ToNick嘅《長相廝守》紅爆香港，「難道我可以扭轉宿命／重遇你一次」，浪漫到不得了，每個香港後生仔都識唱呢句。ToNick除咗打入大眾嘅歌，都仲有好多值得一聽再一聽嘅曲風。「傻／得夠快活有貨熱血錯又怕咩woh／我／信個世界無野難到我」，2010年《T.O.N.I.C.K》公認係最原汁原味嘅ToNick，100蚊都拍到MV，熱血到不得了。係Fans嘅，一定知佢哋港式幽默！2010年嘅《Last Christmas》，2018年《This Christmas》，「佢HI我 ／我HI翻佢」，力證ToNick打入主流，依然故我。
——撞進了冰山，捲上了急灣
「幾張臉掠過／未留座／只得你／始終也明白初」，RubberBand喺2018年推出新歌《未來見》，寫出人間真情相伴，配合埋MV香港眾生相嘅故事，觸起咗無數香港仔女嘅共鳴。RubberBand引動潮流嘅歌曲，真係數之不盡，2010年嘅《發現號》，冰山、急灣都擋唔住我哋嘅步伐，為咗自我為咗理想，都依然要向著太陽狂走。2018年《逆流大叔》嘅熱血，無數人都反覆咁聽RubberBand嘅《逆流之歌》，即使面對逆流，都要「拼了所有／不息不休」。RubberBand嘅熱血、理想一直無變，我哋會喺未來相見，聽更多精彩經典嘅歌曲。
香港文化，獨立多元
九七打後，香港主流音樂或者再無之前咁勁，但係喺我哋平時無咩留意，主流市場無咩點講嘅Underground，好多香港獨立嘅樂團，各自呈現咗唔同嘅多元文化。兩張表，二十隊獨立樂團，可能有部份你聽都未聽過，不過如果你願意花少少時間上網搵佢哋音樂嚟聽，我用條命擔保一定會有驚喜。你會發現，哇，原來香港都仲有呢種類型嘅音樂，仲有呢種類型嘅樂團，比起唔少主流音樂都更加有味道，更加貼近我哋日常生活。唔好只係聽情歌，唱嚟唱去都係嗰幾句喇！香港人要撐返香港獨立嘅樂團，等待有朝一日，香港再次成為亞洲音樂先行者，等香港嘅音樂文化四散全球！各位即刻聽吓呢二十隊嘅歌，梗有一隊你會鍾意嘅。
分析說明：
本研究資料分析時間範圍為2018年05月30日至2019年05月29日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港獨立樂團 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
「加入香港網路溫度計Fan Page睇睇網民嘅花生係乜嘢？」>>>
DailyView曰：
香港嘅獨立樂團，由香港人自己撐！
