多元並蓄，百花盛放
香港一向都有唔少街頭表演，為唔少香港人都帶來過好多特別嘅回憶，要數最出名嘅地坊，當然係人口密度勁高，潮流尖端MK仔女成日去嘅旺角喇！旺角呢，就有條西洋菜南街行人專區，專門開放俾大眾表演，唱歌、跳舞、玩雜耍、扮雕像、畫畫咁，講得出嘅，你都可以喺旺角見到。多元文化嘅兼容並蓄，百花盛放以至眾聲喧嘩，向來都係香港國際都市嘅特色。可惜嘅係，2018年7月29日，西洋菜南街行人專區正式禁止表演，18年歷史終結，但並唔代表街頭表演文化玩完，反而係各個海旁、公園延續落去，依然精彩。今日就等DailyView用網路大數據話你知，香港最多人討論嘅十大街頭表演係咩，等我哋對呢種多元文化有更多了解喇！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
──將街頭描繪得栩栩如生
繪畫可以具體咁表現外在環境的面貌，正因為咁，世界各地嘅街頭一定會唔少畫家，捕足緊唔同空間嘅生活、文化。香港當然都唔例外，好似之前曾經喺旺角幫人哋畫咗八年人像嘅Tonysart，佢曾經攞過兩次「亞洲人像繪畫比賽：人像速畫冠軍」。佢話，因為香港人要快，畫人像都係一樣，先令佢有呢種技術。快、靚、正，反映香港精神。
──隨時勁過足球小將
香港人一向熱愛足球，唔單止曾經係國際球壇風光過，連街頭表演都有花式足球表演，相當精彩。波係圓嘅，正因為咁先高難度，要苦練多年先可以表演。香港最出名嘅花式足球表演員，施寶盛，又叫做「旺角美斯」、「西洋菜街丹尼臣」，係首個代表香港參加花式足球世界盃總決賽嘅香港人！網上亦都有流傳佢表演嘅片段，值得欣賞！
──唔講嘢其實講緊更多嘢
喺我地嘅印象中，香港好似一直都係一個好嘈嘅地方，但偏偏咁多聲音，又好似無咩嘢真係講出嚟咁。或者，有時候唔講嘢先更加有力量。香港有唔少默劇組織，其實唔少都有喺街頭表演過，好似香港小丑協會、「無聲模式」等，都以默劇嘅形式，表達唔同嘅中心思想。佢哋或者無其他街頭表演咁Make noise，但絕對唔會有所失色。
──扭出精彩嘅藝術作品
扭氣球，又叫做「百變魔術意念氣球」。我哋見到一條本身平平無奇嘅長條形氣球，經過氣球師靈活嘅雙手左扭右扭，化身成各種唔同嘅物件，可以係狗，係羊，係貓，總之你諗得出嘅，佢哋都會有方法整俾你。香港氣球師何志玲就話，以「扭氣球」做職業係佢最快樂嘅夢幻工作，因為可以用氣球畀比快樂其他人。原來氣球都可以咁神奇！
──City is our park
2013年，香港本地電影《狂舞派》，唔單止係香港本地跳舞電影嘅佳作，仲引起咗各界對香港街舞嘅關注。術舞係Hip Hop同B-boying文化嘅體現，亦都係香港青少年重要嘅生活取向、態度，相當重要。相對其他城市嘅公共空間，對香港街舞舞者有唔少限制，不斷俾人地驅趕，而佢哋亦都成立團體爭取更多地方跳舞。大家記得都要支持吓佢哋，先有得欣賞。
──Full of magic！
TVB之前拍過一系列街頭魔法王系列，搵咗唔同嘅香港魔術師喺街頭表演各種神奇魔術，收視好高，仲捧起咗多位香港魔術師，好似Magic Carson、甄澤權，都多咗好多人識佢哋。除咗上過電視嘅魔術師，其實香港都仲有好多魔術師喺街頭表演，除咗將紅與白獻給你之外，都有其他精彩演出，睇你有冇能力識穿佢哋手法！大家係街頭見到，目定口呆都要拍手架。
──聽音樂唔需要去演奏廳嘅
樂器有分好多種，演奏都有嚴肅同輕鬆之分，好多時，我哋都會覺得演奏樂器好似好悶，要入去高級嘅演奏廳入面，熄哂燈先開始。但其實音樂嘅世界好大，唔一定要嚴肅嘅先係好嘅。街頭百花盛放，小提琴、色士風、吉他、口琴，都係好常見，近幾年仲有其他民族特色樂器表演喎。好似「Handpan」，成隻鑊咁，用手打又好好聽，更為城市增添樂音。
──與眾同樂，犯法咩？
講起香港街頭雜耍表現，一定要講到蘇春就。蘇生係香港街頭表演藝人，獨立全職小丑，藝名「有趣先生」(Mr. Funny)，成日喺銅鑼灣、旺角表演雜耍，吸嚟好多人圍觀。正因為咁，佢曾經喺2010年被政府告佢阻街，不過法官講佢只係與眾同樂，邊有阻街啫？好彩告唔入，直到今時今日，我哋都仲會見到佢嘅，其他人嘅雜耍表演，相當可貴！
──藝術嘅嘢，我識條鐵咩？
香港近呢幾年出現咗一股熱潮，就係大媽載歌載舞嘅表演喇！有好多人話，因為佢哋嘅出現令到西洋菜南街行人專區正式收檔。亦有好多人批評佢哋，得個嘈字，毫無美感。東張西望仲訪問過公園演出嘅大媽，甚至有收錢犯法之嫌噃。但無論係點，我哋都必須承認佢哋好多觀眾，又真係玩得好開心。正反意見咁多，難怪會登上榜單第二名喇！
──只要有人嘅地方，就有音樂
只要你有一副好歌喉，喺香港街頭唱歌，持之以恆，一定會受到賞識。遠少少嘅，2012年就有龍小菌幪面係旺角街頭歌唱，網民聽落好鍾意，即刻變咗網路紅人，走入娛樂圈。近嘅，當然要數2018年羅凱鈴，Judas Law嘅勵志故仔，喺街頭唱到followers有幾十萬，仲做埋司徒夾帶嘅旗下藝人。香港嘅好聲音點止兩個？只要你走入街頭，就會聽到。
街頭文化，獨樹一幟
香港，一個豆潤咁細嘅城市，又成日俾人話係文化沙漠，但係呢，偏偏係各個領域都有唔少人喺香港努力，力證香港嘅文化依然存在，而且充滿活力。只要睇睇香港嘅街頭文化，就算無咗旺角呢個咁好嘅表演空間，但都無令到街頭表演文化消失，中心唔得，咪去邊緣囉。人既然係流動嘅，文化都係一樣，東家唔打打西家，香港人一直都係Be water。當然，我哋都理應支持香港街頭文化有更多發展空間，如果唔係，邊有咁多精彩嘅表演可以睇？唔好只係睇外國嘅月亮，香港一樣可以做到。沙漠之中仲有更多表演，又點可以放棄？
分析說明：
本研究資料由《KEYPO大數據關鍵引擎》提供，分析時間範圍為2018年06月03日至2019年06月04日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港街頭藝人』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
DailyView曰：
街頭之中，有你我嘅存在。
