「大叔控」望過來！盤點娛樂圈內父女戀　吳奇隆先得第四名！？

馬東石係屍殺列車嘅霸氣老公形象深入民心，唔知真實嘅佢又係咪一個霸氣老公呢？因為馬東石己經計劃下年同細佢17歲嘅藝正花結婚，藝正花今年28歲，擁有魔鬼身材，被稱為南韓最美體育老師。唔知佢地平時會唔會一齊約去做gym呢？兩人雖然好少放閃，但唔講唔知，鐵漢柔情嘅馬東石IG只有Follow藝正花一個人，甜到漏啊！

韓國演員蘇志燮戀愛ING！41歲的韓國男神蘇志燮被爆出同24歲嘅（趙銀政）拍拖，到底佢哋係點樣認識呢？原來係上年蘇志燮爲宣傳電影上SBS節目嘅時候，認識到當時節目嘅記者趙恩情。之後再喺朋友嘅聚會下熟絡，互相了解後相愛。估唔到世界咁細，大家得閒就出席吓朋友既聚會，可能就會搵得到你嘅MR. RIGHT啊！

何天兒（何傲兒）曾與大名娛樂老闆林建名傳過爺孫戀傳聞。何天兒以前有公開講過揀男朋友嘅條件，唔使要靚仔，最緊要係思想成熟可以照顧佢。當時記者表示林建名符合佢嘅條件，天兒都有回答「林生...都唔錯嘅！」兩人不時有私下約會，曾一齊去睇陳慧嫻嘅演唱會。何天兒同TVB約滿之後，就同林建名嘅大名娛樂簽約，林建名因此仲送咗4卡嘅鑽石俾天兒。不過最後兩人上契作結傳聞。

黎明喺同樂基兒離婚之後，就同女助手Wing Chan 一齊。一向低調嘅黎明，之前雖然無直接承認戀情，直至B女出世後先至公開二人關係！黎明表示「兩個經歷過離婚的人，有機會走在一起已是一種缘份」，可能佢哋喺感情路上都受過傷，真係好保護佢嘅另一半。由女助手可以變成另一半，我相信日久生情係世上真係存在的！

李澤楷有超過逾三百億嘅身家，自自然然有好多人關心佢嘅愛情生活。佢同26歲港姐季軍郭嘉文拍拖超過3年，今年五月佢地終於喺公開活動上認貼愛啦！有錢人最怕都係其他人因為錢而接近佢，明顯嘉文就唔係咁嘅人！嘉文平時用嘅都係平民牌子，唔會因為同李澤楷一齊就買多D，完全唔敗金，LIKE爆！聽講李澤楷仲好欣賞嘉文少好有愛心添啊！

82歲嘅四哥經歷過幾段婚姻，浪子形象嘅佢，原來私底下嘅佢係對每段感情都好認真。佢已經同年紀細佢49歲嘅女友Coco拍拖超過11年，不時可以喺報導上睇到佢地抱抱嘅相。到底係乜嘢可以令到佢地甜甜蜜蜜咁多年？謝賢喺Coco最迷失嘅日子出現，就好似天上派既一個守護者咁。Coco表示謝賢係一個好紳士嘅人，同佢一齊好受呵護。即使之前曾短暫分開過，但Coco都仲有去四哥嘅住所照顧佢，果然愛得難捨難分。

2015年，劉詩詩和吳奇隆公佈戀情嘅時候，有追《步步驚心》既觀眾都開心到不得了！劉詩詩比吳奇隆細17歲，所以佢地都表示「我們很珍惜這份得之不易的感情」，由螢幕情侶變成結婚對象，真係就好似童話中既故事。吳奇隆當時更表示婚禮預算無上限，最後決定係峇里島舉行婚禮。仲要知道詩詩有BB之後，喺台北買咗4個單位俾老婆安胎，完全就是實力寵老婆！

甄子丹同汪詩詩一見鍾情，拍拖拍咗三個月就決定結婚。當時詩詩只係得22歲，甄子丹已經40歲。甄子丹只係比汪詩詩嘅媽媽細6歲。但係年齡真係唔係問題，可能呢個就係真愛嘅魔力。佢哋而家已經生咗一仔一女，子丹仲好錫屋企人，唔止日日要facetime，仲諗過多D時間陪仔女而推辭《Star Wars》，好彩最後仔仔想子丹出現喺《Star Wars》，大家先見到佢精湛嘅演技咋！

方媛係城城第一個公開承認嘅女朋友，當時城城PO出兩人喺車中拖手嘅相大方認愛。當時只係MODEL嘅方媛，被認為配唔上郭富城。「愛真的需要勇氣 來面對流言蜚語」，城城唔怕網民嘅評論，經常放閃，為嘅就係俾安全感方媛。佢哋跨越22歲嘅年齡差距，最終喺2017香港半島酒店舉行婚宴，方媛名正言順成為「城城嫂」！

嘉穎同 Grace 因為拍攝無綫劇《殭》，朝夕相對，因而擦出愛火花。因為相差22年，一開始不被觀眾睇好，甚至 Grace 嘅父母都有點抗拒。但當一個人真係好愛另一個人嘅時候，會願意為佢作出改變。當時嘅嘉穎為了 Grace 戒煙戒蒲，仲跟埋 Grace 去教會，可想言之愛情嘅魔力有幾大。而家佢地已經結咗婚，仲生埋佢地嘅愛情結晶「Rafael」。