──唔通人人都做公主咩？
「香港小姐」自1973年開始，一直都係香港女仔嘅夢想，好多幾歲嘅妹妹仔玩煮飯仔之餘，最鍾意就係扮當選港姐嘅劇情。無他嘅，因為香港小姐係「美貌與智慧並重」嘅象徵，屆屆嘅三甲都有種高貴大方嘅氣質，「港姐」喺香港地就等於「仙女」、「公主」。所以話，「香港小姐」就係好多香港女仔嘅童話故事咁，充滿浪漫嘅想像，當然最好個故仔入面有位「白馬王子」啦！而係現實中，亦係好多平民出身嘅港姐係嫁入豪門，成為一個少奶奶。當童話故事喺現實發生，自然好多女仔趨之若鶩啦！但喺另一個現實面，其實唔係個個當選港姐嘅，都可以成為公主，都有唔少人係生活幾經波折，最後回歸平凡，更甚坎坷過活，繼續做「灰姑娘」。今日就等DailyView用網路大數據，帶你睇睇十位當選嘅香港小姐，其中五個成為「公主」，另外五個到依家都係「灰姑娘」。
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
Images Source:wiki
公子遇上王子，係童話故事嘅開始。
——港姐四料冠軍
1997年，香港小姐出現咗一個四料冠軍，翁嘉穗表現出眾，一口氣攞哂「香港小姐冠軍」、「最上鏡小姐」、「東方美態大獎」同「都會魅力小姐」，到今時今日都仲有好多人提起佢。兩年之後，佢退出娛樂圈，皆因佢喺美國拉斯維加斯嫁咗畀七海化工集團有限公司主席鄔友正，男方大佢二十歲，事業有成，家底豐厚。不過翁嘉穗都同佢嘅好友兼同屆香港小姐亞軍反面，原因無他，因為鄔友正囉。直至今日，鄔生鄔太嘅感情都相當好，生咗兩粒仔，真係幸福少奶奶，美滿婚姻，恨死隔離！
——二嫁百億豪門
朱玲玲喺1977年奪得「香港小姐冠軍」同「最上鏡小姐」，喺之前無人同時攞過兩個獎！朱玲玲嗰陣先得十九歲，真心靚到吸引咗好多狂蜂浪蝶，霍震霆雖然已經三十二歲，力排眾人，終於奪得佳人芳心。朱玲玲嫁入豪門，退出娛樂圈，為老公生咗三個男丁，相當盡責。不過霍震霆又忙又有緋聞，激到佢離開老公，2005年正式離婚。瑞安房地產富豪、人稱上海姑爺嘅羅康瑞，佢走入咗朱玲玲嘅生命，朱玲玲二嫁豪門，依然過得好開心，亦都過得自在，一再證明佢智慧與魅力並重，先有咁精彩嘅人生。
——選美競選常勝將軍
張嘉兒唔單止喺2007年榮獲「香港小姐冠軍」，佢早先已經喺2005年參加溫哥華華裔小姐競選，攞咗「神采飛揚獎」，而喺2008年佢又參加國際中華小姐，攞到亞軍。一次又一次嘅獲獎，證明咗佢絕非幸運，憑住由內到外再由外返內嘅智慧同美貌，取得佳績。2015年，張嘉兒同金融才俊Nathan喺加拿大溫哥華結婚，2016年生咗囡囡，2019年又再生粒女，真係可喜可賀。張嘉兒一直都無退出娛樂圈，仲同朱千雪等靚女好fd，組埋「2Line黨」，定期都有活動聚會咁。喺屋企得，喺外面又得，真係女性自主！
——力爭上遊
1991年出世，90後年輕一代嘅何艷娟，出身公屋嘅單親家庭，憑住自己嘅美貌同智慧，努力讀書上流，入咗香港大學法律系，認真唔簡單。2014年參加香港小姐選美競選，勇奪季軍。進軍娛樂圈，同TVB簽咗約做演員，暫時都係做緊閒角，磨練演技，等待機會。何艷娟年紀輕輕，但戀愛故事相當吸人注目。2018年，媒體發現咗何艷娟胴六十六歲嘅澳博營運總裁吳志誠結婚，年齡差咁大，就被人形容係「爺孫戀」。2019宣布離婚，好快被爆出同身家超過200億嘅陳燿璋激吻，隨時有機會再嫁入豪門！
——我真係恭喜你呀！
中葡混血兒，李嘉欣喺1988年參加香港小姐奪得冠軍，同年攞埋國際華裔小姐冠軍，至今都仍然俾人稱為「最美麗港姐」。生得靚女，自然有好多演出機會，除咗電視劇，佢參演唔少電影，好似周星馳主演嘅《鹿鼎記》咁，已經係一線女星。李嘉欣嘅戀愛史相當精彩，最初佢同過倪震拍拖，同過有婦之夫劉鑾雄交往多年，疑似流出埋電話錄音，一句我真係恭喜你呀至今仲係網民金句。最後佢同咗許晉亨結婚，嫁入豪門，生咗男丁，仲因為咁老公送咗二億豪宅俾佢！結婚超過十年，依然幸福，真係恭喜恭喜。
走出童話城堡，香港小姐仲係咪公主？
──艷舞摧毀形象
馬賽，喺2008年當選香港小姐季軍，絕對係當年香港最靚、最注目嘅女仔之一。馬賽藉港姐出道，一開始已經係TVB當時力棒嘅花旦之一，加上佢外表清純，形象親切，好易就入晒屋，照計應該係一步步成為「公主」嘅一位港姐。但喺2013年，就有傳媒報導有關馬賽嘅花邊新聞，話佢係一段女女戀嘅第三者，稍後又流傳出一段佢著住情趣內衣跳艷舞嘅片，清純可人嘅形象徹底破滅。不過今年嘅馬賽結咗婚仲有埋b，安定落嚟嘅佢，成日本喺Instagram到大晒靚相，漸漸散出幸福味，我哋都祝福佢一切安好啦！
──為家庭除下后冠
楊婉儀係1995年嘅香港小姐冠軍，之後就入咗TVB發展演藝事業，又做主持又做演員咁，係成日出鏡亮相嘅資深藝人。佢喺2003年就同王瑞勳結婚，之後就喺2008年淡出咗娛樂圈，同老公一齊搞生意同埋照顧家庭。不過好可惜，楊婉儀兩公婆搞嘅生意好似都冇咩起色，仲同有人金錢糾紛。好似近幾年佢哋投資嘅小朋友教育學校，俾人入稟追討六百幾萬，有傳媒仲發現佢哋係以港姐真鑽嘅百萬后冠作為抵押還錢。無咗后冠嘅香港小姐冠軍，唔再係公主，不過楊婉儀搵到佢更緊要嘅身份，就係愛家庭嘅好老婆、好媽媽。
──不凡走到平凡
郭羨妮係1999年嘅香港小姐冠軍，當年佢係由頭帶到尾嘅大熱門，仲橫掃埋「最上鏡小姐」、「國際親善小姐」同「千禧才智小姐」，奪冠真係可以話係毫無懸念。一個公認嘅大美人，起點就梗係高過人啦！喺TVB嘅第一套劇，就係拍住古天樂做《尋秦記》，做戲份唔少嘅女主角，其後《洛神》就真係入晒屋，深受大眾喜歡。不過，喺2007年郭羨妮介入咗陶大宇嘅婚姻，做咗第三者，港姐冠軍即變「狐妮」，形象由滿分跌到負分。多年風雨，依家嘅郭羨妮都組織咗家庭，有個囡囡，外界睇佢係跌落神壇，其實，佢自己幸福咪得囉！
──有人係「壞咗嘅人」
黃心穎喺2012年參選香港小姐拎咗亞軍，並且隨即入咗TVB做藝人，拍劇同主持都各自開始有D成績。由2015年出街嘅劇集開始，都時不時做吓第二女主角，喺《學是學非》做「是非精」都廣受大眾好評，又同形象高分嘅馬國明拍拖，形象都叫唔錯。雖然佢間唔時俾連登仔笑，話佢同蔡一智一模一樣，又話佢有D相好似「賓妹」，好似有唔少負評，但其實正正證明佢係受到大眾關注。不過，正係喺黃心穎開始擔正做女主角嘅時候，就爆出「安心事件」，佢介入許志安同鄭秀文嘅婚姻，又傷害馬國明，變做全城指責嘅人。
──佢最主要嘅身份，係一位媽媽。
楊思琦係2001年香港小姐嘅冠軍，同時係喺香港小姐史上拎得最多獎嘅佳麗。當年楊思琦嬌小可愛嘅鄰家少女形象，收穫唔少觀眾嘅芳心，加上佢同李泳豪純純嘅愛情，好多師奶都好鍾意佢。不過直到2011年6月27號，楊思琦單方面同傳媒宣布同拍咗9年拖嘅李泳豪分手，又喺2012年3月8日，喺微博到宣布自己生咗個女。兩件事嘅時間曖昧，令佢印象崩壞、人氣大跌。不過唔理佢之前啱定錯，一個女性獨自養大個女，為咗想畀最好嘅嘢小朋友，依家全心全意搵錢，出盡力維持屬於佢哋母女嘅生活。喺依方面，佢做得好好！
知否世事常變，變幻原是永恒
唔知你有冇聽過呢個故仔，當一個人好幸運咁中咗六合彩，結果佢用哂堆錢，染上惡疾，仲因為之前大使搞到負債累累，以為開心嘅事，反而令佢人生跌入黑暗。喺香港參加香港小姐比賽，相信係好多女仔細個嘅願望，而每年又的確有唔少人係眾人之中脫穎而出，完成咗自己兒時夢想，仲有機會名利雙收。但現實並唔係童話故事，一切並唔會順理成章，幸運之中可能暗藏不幸。港姐，講求嘅係「智慧與美貌並重」，我哋未必有佢哋嘅外表，但一樣可以有智慧，喺佢哋嘅人生入面得到啟發。做灰姑娘定公主？It's up to you！
分析說明：
本研究資料由《KEYPO大數據關鍵引擎》提供，分析時間範圍為2018年06月24日至2019年06月25日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港小姐』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
「加入香港網路溫度計Fan Page睇睇網民嘅花生係乜嘢？」>>>
DailyView曰：
唔知今年香港人可唔可以一人一票選香港小姐呢？
