唔通合久必分真係永恆嘅定律？
兩岸三地嘅華人演藝圈內，各式各樣嘅偶像組合、樂隊團體喺千禧年之後紛紛冒出頭。好處在於唔同成員可以互補長短，有人做實力擔當，有人做顏值擔當，可以全方位收穫粉絲。短處可能在於注意力會被分薄，有時成員會被搞錯不特止，發展資源可能都相對被限制。今日DailyView用網路大數據調查咗娛樂圈中嘅組合，一齊嚟睇吓啦邊啲你覺得合體紅啲，邊啲單飛紅啲！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
喺S.H.E中嘅Hebe生得細細粒粒，外型相對文靜內斂，出道初期喺宣傳節目上一般都由Selina同Ella做講嘢嘅代表。九年前華研用新人嘅宣傳方式，宣布「田馥甄」推出個人專輯，正式開始S.H.E單飛唔解散嘅篇章。「田馥甄」呢個名被重新宣傳，令歌迷重新認識喺S.H.E合音中嘅另一種面貌，唔單止為S.H.E粉絲帶來新鮮感，將近十年嘅時間就逐漸成為台灣嘅OST女王，主唱唔少嘅電影、電視劇宣傳曲。
台灣主流樂壇中嘅一股清流，莫過於融合咗古典音樂同流行樂團元素嘅—蘇打綠。自2017年蘇打綠宣布休團後，大部分團員都有唔同嘅發展，例如創業、出國進修等計畫，而主唱青峰嘅動態就相對低調。終於一年之後喺FB發文以個人身分回歸樂壇，仲自稱新人咁上歌唱節目重現大家眼前，最近仲串聯樂壇之前有合作過嘅歌手，來宣傳自己嘅《巴別塔慶典概念展》，慢慢實現佢心目中先達成唔同嘅挑戰啊。
最近喺廣告跳跳紮嘅「阿糖」糖妹，個樣得得意意但唱功了得，喺2007年以「糖兄妹」嘅創作組合出道，攞過唔少新人組合獎，同埋出過嘅專輯成績相當唔錯。而2014年推出第四張專輯之後，兩個人嘅發展開始比較明顯地分幕後同幕前，糖妹有時候會被安排單獨出席活動，甚至向主持嘅路線發展。唔單止喺活動主持，糖妹亦曾經主持《勁歌金曲》，2015年正式成為TVB簽約女藝人，都擔任過唔少電視劇集嘅配角，可以話係全方位藝人。
一首《天梯》令C AllStar成為最出名嘅千禧年後出道嘅香港樂團，畢竟全隊都喺歌唱比賽出身，唱功實力唔使講，加上佢地堅持耕耘粵語歌，甚至有樂評認為因為佢地粵語樂壇未死等稱譽。喺2017年公布咗之後休團嘅消息，梁釗峰係第一個出派台歌嘅團員，派台同年出埋首張個人EP，繼續擄獲歌迷嘅心。雖然其他團員都有繼續喺樂壇作唔同嘅發展，但目前都係釗峰比較有成績。
後生啲嘅讀者對阿B嘅印象，可能係一個演員，有時候會走去唱歌。阿B喺我地父母嗰個年代組成嘅溫拿樂隊，喺兩岸三地最早嘅搖滾樂隊之一。而阿B鍾鎮濤喺裡面，就相當於顏值擔當。喺樂隊維持唔解散而各自發展嘅時期，阿B就開始進軍影視界，今時今日都會見到阿B客串，來緊有Sammi主演嘅《花椒之味》，可以話係相當有份量嘅加持。
兩岸三地嘅選秀節目，向來都以台灣同埋後來嘅韓國節目最為吸引，而香港影視節目嘅發展都缺少呢一環。ViuTV喺舊年製作《全民造星》，開始咗香港培育男子團體嘅新一章。而首屆冠軍就係姜B姜濤，獲得評判同觀眾嘅歡心。節目之後所成立嘅偶像團體Mirror，連同姜濤在內嘅Mirror總共有12個人，不過以代言數量、出街廣告同埋人氣來講，姜濤一個人已經有相當獨立嘅發展。
如果話團體紅所以成員單飛都會紅的話，Stephy一定算係逆流而上嘅代表。Stephy出身嘅Cookies，由以前九個女仔嘅組合，轉變成四人組合，出咗幾首都叫朗朗上口嘅代表作，不過都未算得上大紅大紫，四個人就宣布各自發展。其中Stephy就喺呢塊餅乾中突圍而出，唔單止當時同方力申以情侶檔嘅身分，繼續喺樂壇發揮，仲拍埋電影成為眾所周知嘅「阿寶」，演藝發展相當成功。
喺前面講到嘅溫拿樂隊，紅出自己一片天嘅仲有校長譚詠麟，譚校長絕對喺香港樂壇嘅天皇巨星，幾乎乜獎都攞過，早喺1996年仲被頒發香港樂壇最高成就獎。除咗唱歌了得，譚詠麟都攞過金馬獎最佳男主角。校長非常支持廣東歌創作，籌備由素人創作投稿嘅合輯，亦會同樂壇新人合作演唱，就好似六月先新推出同麥家瑜合唱嘅《某月某日會OK》，繼續造福歌迷。
香港演藝圈內，向來少有大紅大紫嘅偶像組合，Twins真係算係罕有嘅成功例子。不過合體多年，Twins都試過分開發展。阿嬌之前就以個人身分同其他歌手合唱，有唔同嘅合作。之後亦推出過自己個人專輯，成績豐富。再加上阿嬌舊年結婚結得高調，隨即同老公賴弘國拍住上，一齊參演內地嘅節目《爸媽學前班》，正式從少女偶像晉身幸福人妻啊！
Twins另一位單飛做出好成績嘅，就係阿Sa。神奇在於由Twins初出道好似大姐姐咁款唱兒歌，唱青春情歌、唱失戀歌，相信大家都見證住佢地逐漸充滿女人味嘅蛻變。Twins合體嗰陣都有拍過唔少電影，好似《千機變》、《見習黑玫瑰》等等嘅笑片，不過真正令人驚訝嘅，喺阿Sa之後挑戰嘅《雛妓》、《非分熟女》等都開啟咗佢被提名演藝女主角嘅路，甚至最近上埋舞台劇主演《情敵勸退師》，話係事業第二春都不為過啊！
「位置變了 各有隊友」都可以掛念這舊友！
好多組合同團體難免都主打友誼情懷，成為咗好多歌迷心目中嘅友誼目標。而團體長青嘅秘密，莫過於喺佢地陪著歌迷長大之餘，團體裡面嘅人都各自成長，有著唔同嘅發展。其實就同我地每個人一樣，唔同階段都會有唔同嘅戰友，最珍貴嘅就儘管要邁向人生另一個階段，呢啲戰友唔會就咁各散東西，而係繼續做彼此嘅後盾，支持你喺個人領域上，發光發熱。
分析說明：
本研究資料由《KEYPO大數據關鍵引擎》提供，分析時間範圍為2018年6月30日至2019年07月01日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『單飛都有一片天』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
DailyView曰：
Twins係青春嘅回憶，真係缺一不可！
