為何在遊蕩裡 在遊玩裡 突然便老去
「有D人出現，唔係為咗陪你過一世，而係教識你成長，然後送你離開。」
相信呢句說話，唔少人都聽過。
雖然原本係用係愛情上，不過其實都好適合用係玩具同人類嘅關係上。無一件玩具會陪我地一世，但我哋大個記返起童年回憶，都會念念不忘當年被我哋上山下海、陪伴我地成長嘅玩具。係現實我哋玩具唔識講野，但如果可以有機會，你會同佢哋講咩呢？
多謝佢哋陪你走過無憂無慮嘅童年？俾你掉黎掉去都毫無怨言，不離不棄？
而DailyView網路溫度計就透過網路大數據，分析咗由2019年06月16號到2019年07月15號間，網友喺網上面總共有13222筆討論，一齊嚟睇下網友們最關注嘅係咩啦！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
雖然唔係主角但一直人氣好高嘅三眼仔，係今次呢集都只有出現一幕。唔少三眼迷可能都有d 失望，不過唔緊要，三眼仔出咁多可愛週邊，唯有買多幾件補返數啦！
而今集另一個搶眼嘅角色就非牧羊女寶貝莫屬，一直以黎一班玩具都有同一個目標，就係陪住小朋友長大，令佢地開心。但寶貝離開主人，體驗過外面世界嘅精彩之後，反而搵到自己存在意義，認爲自由自在係外面闖蕩先係佢追求嘅生活方式。擁有自由、做自己，我諗呢d都係唔少大人嘅心聲！
image source：iMDb
「太空戰士一飛衝天」！反斗奇兵第一集至今24年，由1995年就幫巴斯光年配音嘅劉青雲都同巴斯經歷唔同階段。
早前宣傳嘅時候就話巴斯光年佢唔知自己係一個玩具呢件事最令佢感動，好多人都「唔知道自己到底係咩人」，你夢想係一個太空人，但現實中其實都只係萬分之一嘅平凡人。不過更深嘅意義係，即使你無想象中咁完美，你都一定有自己值得發光發亮嘅優點，唔一定下下好似呀媽細個成日話「隔離屋個仔」咁先係成功。
當年睇第一集嘅小朋友，依家都分分鐘已經變成帶住自己下一代去戲院，時代一直變，玩具陪住主人長大，電影都陪伴觀衆成長。
同一套卡通係人生唔同嘅階段翻睇都會有唔同嘅感受，一班支持咗反斗奇兵嘅Fans一定好有同感。
卡通動畫唔再係專比小朋友睇，反斗奇兵即使撞上一堆討論度好高嘅電影，比起上黎都唔執輸，好多人睇完第四集都話感動到喊出黎。Marvel電影一向有保證，今次蜘蛛俠係復仇者成員有「重大改變」之後嘅第一套電影，大家都好想知Tom Holland會唔會升呢成為下一個Iron Man。
不過除咗反斗奇兵，仲有其他真人版動畫都好值得大家支持！迪士尼另一經典獅子王以逼真CG加上大量VR拍攝，故事中嘅動物栩栩如生出現係大熒幕，真真正正重現經典。
千與千尋大家都唔陌生，不過等咗咁多年，中國今年終於可以上映，配音班底個個都唔惹小，仲特登拍埋真人版海報做宣傳，希望配音唔好令大家失望啦。
而由劉亦菲擔任主角嘅花木蘭真人電影，早前發佈嘅預告片令唔少人更加期待呢套充滿亞洲色彩嘅電影。
講起反斗奇兵大家第一時間都諗起胡迪、巴斯光年，三眼仔雖然戲份比起兩個主角少好多，不過都一樣好受大家歡迎，所以每一個角色都唔可以睇小㗎，話唔定分分鐘紅過主角。
就好似今次呢一集新角色小叉性格同一般玩具好唔同，異於常人嘅邏輯令人印象深刻，而且即將有獨立動畫，搶曬風頭啦。
Ducky同Bunny電影入面分唔開，現實配音都又排檔多年I love you boyz 配音，搞笑演繹為角色加唔少分。
四集體現人生不同階段
成日都話「戲如人生」，其實動畫都一樣好多背後意義，值得大家思考。有人話，細個笑住睇卡通，大個之後都係流住眼淚睇。而反斗奇兵呢套動畫跨越接近1/4個世紀，四集都意味著人生唔同階段。
第一集就胡迪對於巴斯出現感到不安，擔心自己係Andy心目中地位不保。而巴斯以為自己真係一個太空戰士，而唔係玩具。
就好似我地係好多時候都會搵唔到自己定位，對自己缺乏信心，導致一時行差踏錯。又可能因為太高估自己，年少氣盛處處碰壁。但我地忘記其實每個人都有自己係獨特之處，每一個人都係不可取代又珍貴嘅存在，即使做唔到人地眼中嘅英雄，都一樣有存在嘅價值
係第二集到第三集，主角們遇上唔同嘅難關，但無論點都好，佢地都一直堅持一個目標，就係為咗令Andy開心而努力，達成目標：做一件「稱職嘅玩具」。而隨住Andy成長，佢地都要學識放手，祝福對方。
套用係現實，如同我地係人生路上遇到嘅挑戰、困境，但係都為夢想都唔會輕易放棄。「成長」呢件事逼我地接受身邊環境嘅改變，而我地要學習接受同適應，或者會灰心，但都係我地人生入面好重要嘅一課。
到咗第四集，一班玩具都已經歷過好多事，不變嘅係胡迪仍然一直堅持住一心一意為主人而努力，帶領一班玩具令新主人Bonnie開心。相反寶貝見識過外面世界之後，就唔再甘心做一個係屋企擔心被冷落嘅玩具，而係希望繼續係出面「做自己」。我地曾經應該都會被其他人事物影響，左右自己行嘅路，其實無話跟著邊條路行就最成功，只要係自己想做嘅事，一直堅持落去，都可以有自己嘅成就。
兩大必看原因
大家等咁耐嘅反斗奇兵第四集深受歡迎，咁黎緊仲有咩值得關注呢？就係迪士尼宣布新角色小叉將會有獨立動畫！今次電影入面小叉與別不同嘅思想真係好可愛，製造出唔少笑點。作為新角色但比起人氣主角更早擁有自己獨立動畫，用好多人眼中嘅「廢物」嚟做嘅小叉，一d都唔廢，仲好爭氣添！大家記得到時支持下小叉啦～
除咗一直擔任配音嘅劉青雲同張衛健，今次幫手配音嘅人都唔馬虎㗎～以前都係配角嘅寶貝，係呢一集擔任重要角色，特別搵咗謝安琪配音，我行我素有性格嘅角色設定同呀Kay都好相似呀。同樣首次為反斗奇兵配音嘅仲有I Love You Boyz 嘅Donald 和少爺占，兩位嘅感染力令角色更生動同好有喜劇效果，好多笑位都係多得兩位唔少，值得大家特別留意下～
分析說明：
本研究資料由《KEYPO大數據關鍵引擎》提供，分析時間範圍為2019年06月16日至2019年07月15日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『反斗奇兵4』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
DailyView曰：
「小叉～你唔係垃圾呀！」
