「阿仔，幾時結婚啊？」引爆長幼兩輩戰火嘅十個話題！

──奶奶！咁教仔個仔會學壞㗎！

阿仔阿女榮升爸爸媽媽，爺爺嬤嬤當然想錫晒自己嘅心肝寶貝孫仔啦！但係上一輩嘅教養方法同下一輩有好大分歧點算？次次講親養兒秘訣就會引嚟一場風波？其實世代差異先至係常態，大家要尊重大家嘅唔一樣，而且爹地媽咪同爺爺嬤嬤都係想小朋友好，唔同方法亦都唔一定有對同錯，大家不如一人退一步，一齊共享天倫之樂啦！

──阿女點解你要著條穿曬窿嘅褲？

潮流呢家野日新月異，要創新先至有進步，點解咁多長輩唔明白呢個世代嘅潮流？呢個大概係好多年輕人嘅心聲！咩穿窿褲，拖鞋襯襪，呢D先係當今嘅時尚。衣著係個人喜好，係社群興起嘅現在，年輕人有好多方法搵到同好，衣著就係其中一個展現自己嘅方法，小編認為，應該大家都希望自己會俾身邊嘅人接納，而唔係俾人潑冷水嘅！

──唔好食咁多垃圾食物啊！

各位年輕人應該都有呢個經驗，俾家中長輩耳提面令食嘢要健康D，呢個叮囑由細到大各位一定聽唔少啦！「麥當勞D野無益架！」、「唔好食咁多街邊野食！」，真係聽都聽到識背啦！但係其實出邊嘅野再好食，又點俾得上屋企嘅飯餸咁香？屋企人嘅叮嚀都只係想你過得健康D、可以日日見到你番屋企食飯、見你多D咋！

──阿仔唔好日日係房打機啦！

聽講最近Switch又出咗新Game？快d買左佢同Friend玩先！哎呀點解關門打機都要俾屋企人鬧㗎！屋企人除咗關心你成績同工作，係唔係都會好關心你嘅休閒活動呢？爸爸媽媽次次見到你關埋房門，都好惆悵你係唔係無朋友，要自己匿埋係房孤獨地打機？其實你每次都好想同屋企人講：打機都係我同朋友嘅交流方法之一嚟㗎！

──姨媽，唔好次次見面都問到我嘅痛處啦！

如果你問長輩小朋友最重要嘅係d咩？好多長輩都會視「讀好書」為後輩嘅首要目標，而係長輩眼中，無論你長到幾大，你永遠都會係嗰個人仔細細、需要長輩呵護嘅小朋友，當然見面都要關心下你嘅學業情況！但人生不如意事十常八九，成績都有可能係你嘅罩門，每次長輩問起你都唔知道點回答好，況且人生其實有好多嘢重要過讀書㗎！

──陳師奶個仔搵幾萬蚊一個月啊！

工作、人工依D問題真係唔好唔好攞出嚟講，更加唔好加比較，唔係嘅話，好易就引起一輪大戰啊！有時做仔女嘅，聽到父母咁講，其實真係唔知點應好，要認自己差過人，定係要倒返轉話細個嗰時父母畀嘅資源唔夠人多？講依D真係傷感情，久而久之就會積埋D怨氣，大家真係避得就避！

──病就梗係因為夜瞓同飲唔夠多水啦！

同長輩講健康狀況其實個感覺都幾矛盾，知佢哋係關心你，但佢哋講嘅嘢又離晒譜。有時明明鼻敏感，打兩個乞嚏，佢哋就會話係著唔夠衫；有時有咩感冒、傷風，佢哋就會話係夜瞓同飲唔夠水。喺佢哋嘅理解到，咩都可以關夜唔夜瞓同飲得多唔多水事！有時聽到都唔知駁唔駁佢哋好。

──去越南？我唔想你死啊！

人大個咗就會想出去見下個世界，但係屋企人最緊張你嘅安全，一聽到你要去遠小小嘅地方旅行，就會好擔心你嘅安全，力阻你嘅冒險之旅！咁如果同屋企人一齊去旅行呢？你會發現係長輩眼中，邊到都無香港咁好。當你計劃好晒一次旅行，辛辛苦苦帶爸爸媽媽玩完番到屋企，你會見到佢哋係Status同朋友講：「香港係最好㗎！」

──「黃加藍」係唔會變綠色㗎

最近香港反送中事件愈演愈烈，香港年輕人盡力喺一片混亂之中堅守自己聲音，但好多時當長輩同年輕人、黃藍兩方開始衝突嘅時候，有一D長輩就會以自己「食鹽多過你食米」嘅理由，拒絕傾聽年輕人嘅心聲，其實呢d價值觀問題都好難講誰對誰錯，但大是大非面前係無所謂價值觀問題，大家一定要看清事實啊！

──幾時結婚啊？

「戀愛」係唔係大過天？所有關心你嘅人都一定會希望你得到幸福，但係講到出口嘅關心，其實係另外一種壓力，呢個問題堪稱係兩輩之間數一數二難拆嘅話題，令到年輕人非常煩惱啊！其實面對呢個問題我都覺得好徬徨無助，姨媽姑姐們，如果我有好消息一定會第一時間話你聽，但係緣分呢家野，你哋都知道係急唔嚟㗎！