網路爆紅十大社會定理你識幾個？曼德拉效應都係得第八名咋！

——點解佢咁有成就？

馬太效應（Matthew Effect），指嘅係一種強者愈強、弱者越弱嘅現象，廣泛咁套用咗係人類社會各個唔同嘅方面，好似科學、經濟咁。呢個效應針對講嘅係人物，即係當我哋係某個領域愈出名，本身就累積咗愈多資本，會相對其他有相同能力嘅人，更加容易取得更大成就。相信大家睇完呢個解釋，再諗返起自己嘅人生經驗，真係一命二運三風水。

——Errrrrrrrrrrrrr

彼得原理（Peter Principle），係加拿大管理學家勞倫斯·彼得提出嘅，亦都係佢出版本書嘅名。佢根據咗數千個組織入面嘅情況，歸納咗一種辦公室嘅困局，就係員工會因為佢嘅工作表現，最後升遷到一個佢能力無法勝任嘅位置，因為佢本身嘅能力並未提升，結果成為公司嘅負荷。老細要看清手下嘅能力，先決定點樣運用佢，唔係就影響咗成間公司運作嘞！

曼德拉效應（Mandela Effect），可能係香港近年最出名嘅社會效應！呢個理論最初講嘅係，外國好多人都記得南非總統曼德拉「應該在20世紀80年代應該係監獄入面死咗」，但其實佢無喺呢段時間死咗，2013先逝世。之後只要發生一件同人類集體記憶唔同嘅事，就係曼德拉效應喇。

——三五成群無個好人

羊群效應（Herd Behavior），呢個相當知名嘅社會效應，嚟自科學家做嘅實驗，即係當一隻羊跳出嘅羊欄之後，第二、第三隻都會跳出去。用落社會現實到，話緊大家都好似羊咩咩咁，都有一種從眾心理，當有人做咗某件事，個個都會跟風去做，代表自己都係主流嘅其中一分子。香港有部知名電影《三五成群》，童黨就係呢種效應做咗好可怕嘅事，咪話唔得人驚！

——721嘅窗破咗之後

破窗效應（Broken Windows Theory），嚟自心理學家詹姆士·威爾遜同喬治·凱林共同提出，內容係話只要環境入面有不良嘅現象出現，又無人去制止呢種情況發 生，就會令其他人仿效，甚至搞到個情況更加嚴重。破窗效應最出名嘅例子，就係當一幢有少少破窗嘅建築，如果無及時維修，可能會有人去破壞更多嘅窗戶，甚至霸埋間屋！所以當少少壞事出現，就要制止。

——邊種人變咗做惡魔？

路西法效應（Lucifer Effect），出自著名心理學家菲利普·津巴多2007年出版嘅《路西法效應：好人是如何變成惡魔的》，內容探討咗史丹佛監獄實驗。咩係史丹佛監獄實驗？係有關 人類對囚禁嘅反應，同埋被囚禁對監獄入面權威、被監管者行為影響嘅心理學研究。其間，三分一本身係學生扮演嘅看守，竟然出現虐待狂傾向。環境、權威，會令天使變做惡魔。

——唔好做負能量

吸引力法則（Law Of Attraction），係美國十九世紀新思維運動入面嘅概念，佢哋認為，人際關係可以借由正面嘅諗法，得到正面嘅效果，相當唯心論。佢哋話，只要兩個人之間有相似嘅諗法，就會互相吸引，好似一種能量吸引另一種能量咁樣。不過呢種法則暫時未有科學證明，信唔信就由各位決定。不過呢，做人正面少少，係當今香港社會，係好緊要嘅，係咪？

——警方嘅武力提升

骨牌效應（Domino Effect），講緊嘅係連鎖效應嘅其中一種。如果大家有玩過骨牌，相信唔難想像，當推低咗最開頭嘅骨牌，後面嘅骨牌就會一次過冧哂。套返落去現實社會現象，就係著重講緊一件事同另一件事之間嘅因果關係。好似當香港警方提升咗對示威者武力，示威者都會提升返佢哋行為嘅激進程度，因為骨牌已經倒下咗，後面呢件事發生嘅可能就好高。

——無哂言論自由

寒蟬效應（Chilling Effect），出自美國最高法院法官小威廉·布倫南，佢係司法判決用咗呢個字詞做為一個法律術語。呢個效應意指就算法律並無明文寫明禁止人民講嘢嘅內容，但人民可能因為社會現況，判斷如果講咗敏感，可能會遭受責罰，所以決定唔再講嘢。呢件事，正可以用係香港之前國泰炒公會主席事件，就有好多人話會造成寒蟬效應，唔知你又點睇呢？

蝴蝶效應（Butterfly Effect），本身係美國氣象學家愛德華·羅倫茲提出嘅講法，最常見嘅解釋係「一隻蝴蝶在巴西輕拍翅膀，可以導致一個月後德克薩斯州的一場龍捲風」。呢種係連鎖效應嘅其中一種，明明好似同我哋見到結果唔關事嘅社會現象，但佢最初可能係同一件睇落唔關事嘅小事有關。呢種Butterfly Effect，連國際都影響埋！