有留意開韓團都應該知道近排韓國女團比賽節目Queendom好紅，話就話係比賽，不過其實大家重點都唔係放最終結果，而係好開心有機會俾呢幾個女團表現唔同嘅風格俾大家睇，韓團競爭咁大，要喺芸芸團體入面突圍而出，真係唔容易。呢個節目入面唔少舞台令人眼前一亮，可以話係再次吹起一股女團熱潮。相信大家都知道韓團每個成員都有明確定位，例如主唱、舞蹈擔當，門面等等。雖然每個人眼光同標準都唔一樣，不過可以被公司選做門面，都唔會差得去邊。今日等我哋用網路大數據分析吓，喺最近5年出道兼且仲有活動嘅女團門面入面，香港網民最愛嘅係邊十大門面啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
Queendom其中一隊參賽女團(G)I-DLE入面有三個外國成員，舒華就係其中一個。來自台灣嘅舒華唔少神級飯拍被喻為「非粉存系列」，就算唔係fans都忍唔住收藏佢嘅靚相，睇落仙女嘅氣質，其實私底下好活潑。喺Queendom最後一個演出，舒華擔大旗開場，外面有氣質，跳起舞都好有氣勢！相信今次呢個舞台又會變成(G)I-DLE 其中一個經典之作。
同樣有參加Queendom嘅Oh My Girl，喺今次節目都大受好評。祉呼因為台上台下形象差好大，而被Fans封為「反轉女王」，喺舞台上走高冷路線，台下就好做自己，食嘢豪邁又古靈精怪，就係呢種反差成功吸引一班Fans。而祉呼除咗係門面，都係領唱，又睇得又唱得，抵佢咁多人鍾意。
參加過Produce48嘅怡人雖然當時無成功出道，不過因為出眾外表而圈粉無數，得到好高人氣，更加係當時練習生票選顏值擔當嘅第一名。怡人喺節目結束之後，2019年3月以組合Everglow出道，來自中國浙江，擅長中國舞，跳起上嚟有一種古代美人氣質，係節目上表演嘅時候都引起大家讚嘆，未來發展絕對值得期待呀。
SinB啱啱出道嘅時候俾人話似少女時代嘅Jessica，就咁聽落都一定係個靚女啦。Girlfriend刀群舞出曬名，SinB係門面擔當，同時都係隊內主領舞，高顏值加上舞蹈動作乾淨利落，力度到位，唱歌都唔錯，可以話係各方面實力都好平均。SinB曾經因為表演跳得太落力，而喺台上甩臼，不過都仍然單手完成表演。之前仲係台上唱歌時候懷疑太攰暈低，見佢一直唔係好舒服但都堅持到最後一刻，真係好敬業。
妍雨清純五官，被譽為「小允兒」，溫柔氣質無攻擊性嘅外貌係標準門面樣，一出道就受到好多人關注。比起濃妝，好多網友都表示其實更鍾意佢淡妝造型，因為可以更加突出佢天生麗質。練習生時期曾經體重超過60公斤嘅妍雨，為咗出道靚D用非常極端嘅方法：一日淨係食一隻雞蛋同一杯牛奶減肥，之後顏值更加去到巔峰，驚人意志力令大家好驚嘆，不過減肥呢D嘢都係要量力而為，大家唔好盲目跟住做呀。
同樣係MOMOLAND成員嘅NANCY，韓美混血基因令佢可以話係贏在起跑線上。門面擔當仲有獨特嗓音，男女Fans通殺。完美五官就好似係漫畫入面行出嚟嘅女主角咁，雖然因為後來身形肥咗而被人攻擊，不過其實靚樣一樣無變，每日面對咁多惡意評論，明星都一樣好大壓力，希望大家都唔好對偶像咁高要求、咁苛刻啦。
新人女團Cherry Bullet 智媛憑精緻外貌成為團體C位，亦即係Center位。係團隊入面嘅忙內，都因為外貌望落好似Twice嘅Mina同定延合體，所以引起大家注意。曾經喺一個選秀節目入面因為美貌而引起話題，雖然後來因為實力唔夠而被淘汰，不過經過幾年練習琢磨之後，相信之後表演都值得留意。
Red Velet 隊長 Irene神顏被多次評為女團顏值第一位，就連北韓領導人金正恩都有留意佢地。Irene作為門面，雖然只有158身高，不過身材比例好，加上好似公仔咁嘅五官，雪白膚色，企舞台上就好似天使下凡咁靚，被韓國網友稱為美貌天才。無論咩造型都一樣駕馭到，被多次選咗第一門面果然無浪得虛名。
BLACKPINK出道以嚟破唔少紀錄，喺全世界都好受歡迎，四個成員實力都好平均。Jisoo號稱無瑕疵、純天然顏值，由以前細細個嘅相就可以睇得出真係由細靚到大。難怪智秀當年仲做緊練習生嘅時候，去睇演唱會仲被SM星探發掘。顏值高就贏曬，就算喺著普通休閒裝出現係機場都一樣好吸引人目光，唔少機場飯拍都被瘋狂轉發。
Twice嘅子瑜大家應該都唔陌生啦，身為台灣人，子瑜外表同一般韓國靚女標準唔太一樣，不過超高人氣證明韓國人對子瑜顏值都十分受落。可以喺咁多女偶像入面脫穎而出，更加成為全球百大美女排行榜第二位，亞洲排名最高嘅子瑜，天然無加工顏值同可愛性格真係圈粉無數，早前新專輯造型更加被網友評為最新顏值顛峰。
分析說明：
本研究資料由《KEYPO大數據關鍵引擎》提供，分析時間範圍為2018年11月07日至2019年11月08日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『最愛女團門面』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
DailyView曰：
「 咁多神顏，真係睇到跪喺個Mon前面呀 」
