香港最熱門二十大台灣YouTuber，館長穩坐第一！

聖結石喺台灣都叫幾紅嘅YouTuber，佢嘅片五花百門，Vlog、企劃、開箱、MV……咩都有啲咁，觀看次數仲要唔少，睇嚟人氣就真係唔可以睇少。而佢喺香港有唔少人討論係事關佢拍咗一條片，係參觀香港富商鐘培生屋企，揭開彈丸之地嘅奢華生活，引嚟一班「貧苦大眾」討論兼葡萄。睇到人哋嘅工人房仲大過自己間屋，唉，真係人比人真係比死人。

愛莉莎莎嘅感情系列影片喺台灣好出名，因而俾好多台妹當晒佢係網上感情小顧問。而佢喺香港都有好多Follower，皆因佢其實同香港YouTuber海恩奶油同Mira好Friend，成日都會合作拍片，所以喺香港嘅曝光率都幾高下。佢哋就曾經拍片喺台灣尋找香港人食嘅港式餐廳，睇番條片，啲嘢食簡直係台式香港料理，引起網民熱議！

當子華神「金盆𠺘口」之後，香港人對「棟篤笑」嘅需求好難滿足，尤其坊間唔多Talk show夠敢膽抽政治水，成日都聽得唔過癮。不過台灣就有一個做Stand-up comedy嘅曾博恩，次次開show都對熱門嘅時事、政治話題大大力咁抽擊，搞笑得嚟又帶點批判，真係好有黃子華嘅味道。咁夠薑，唔怪得唔少香港人都好buy佢個show啦！

點解本本呢個YouTuber咁多人關注？皆因本本佢個樣好似公仔咁可愛，係好多香港人都好鍾意嘅靚女「台妹」類型，佢影嘅Cosplay相更加係正到不得了！本本嘅影片內容又非常多元，喺影片入面佢扮Cute得、玩又得、串又得、打鬧都得，真係樣靚就咩風格都Carry到！唔少網民都話，本本根本係台灣最靚嘅YouTuber！

谷阿莫嘅YouTube Channel主題係電影解說，影片剪接咗電影片段，之後加上以佢個人觀點嚟敘述嘅電影情節分析。雖然有好多人都話佢將套電影cut到咁短嚟解讀，只係講到電影好皮毛嘅內容，冇啲深度。但正正係依種明快節奏嘅速食影片，幾分鐘就可以知晒一套戲嘅基本情節，啱晒香港人咩都想快快手嘅習慣。

阿神係一位台灣遊戲實況主，基本上Keep住日日出一條片，係一位勤力又多產嘅YouTuber，自不然就吸引到好多固定收睇嘅香港機迷啦！而另外阿神仲係「搞神馬」嘅其中一員，同香港YouTuber馬田──啊「馬」一齊出片。呢個Channel開咗之後，阿神大大提高咗佢喺香港嘅知名度！佢哋一齊share打機、食物同埋有趣嘅主題，真係港台一家親！

黑男以經營「街頭邱比特」聞名，佢多數會喺台北東區ZARA旁邊出現，隨機抽樣行人進行配對。好多香港人都好嚮往台灣嘅生活，而喺台北市中心上演嘅呢個街頭邱比特劇情，滿足咗好多香港人對於台灣嘅想像同埋對戀愛嘅美好期待，唔怪得之呢個節目由台灣紅到去香港啦！黑男仲曾經親身嚟到香港，拍攝香港特別版嘅街頭邱比特添！

理科太太嘅YouTube影片以科學作為主打。呢種特別嘅知識類型影片好受港台觀眾歡迎，而理科太太嘅「嗨，大家今天過得好嗎？」口頭禪，仲一度成為網民熱話。今年理科太太同老公嚟到香港，拍左一條唔叉電一日遊香港嘅影片，當中佢飲飲食食講廣東話，好多香港網民睇完都忍唔住大讚理科太太廣東話講得唔錯啊！

明明香港都有教英文嘅YouTuber，但點解香港人會睇「阿滴英文」，仲有咁多人討論呢？當然唔排除有人真心想學好英文啦，但其實更多嘅討論度係關於「滴妹」㗎！好多香港網民都話滴妹好pure好ture，好girlfriendable！喂！唔好忽視阿滴啦！阿滴嘅Youtube Channel入面，有好多寓學習於娛樂嘅片值得睇㗎！

最近香港人聽到「館長」呢個名，多數都係因為佢呢期好關注香港社會動態，不斷聲援香港人、同香港人講加油。其實喺呢個之前，已經有好多人follow佢㗎喇！唔好睇佢大大隻隻嘅，其實講嘢幾搞笑，成日都會開直播同網民互動，傾吓時事、打吓機咁。除此之外，佢有極MAN嘅健碩外型，仲玩開拳擊同舉重，簡直係唔少香港男性心目中嘅完美形象！