二十大開Post標題常用語，一文了解連登潛規則！

——集思廣益

[一人N個]我個仔啱啱出世，我姓劉，想請問各位巴絲打有咩好名可以用，要霸氣嘅！[一人N首]最近拍咗七年嘅女朋友帽咗我，求分手勵志歌⋯⋯[一人N次]頭先忍咗好耐先搵到廁所，求一人一個相似經驗分享。好似呢種標題，喺連登成日都會出現，要各位巴絲打一齊集思廣益，分享自己經驗。不過呢，往往會同樓主諗法相反，會有大量搞笑留言，趣味指數極高。

——oldnewisso唔識串

[日經Post]想請教各位哲學大師，人生到底有咩意義？[月經Post]留低你手機而家Wallpaper！[年經Post]聖誕節又就快到，想請問各位巴絲打有咩好地方去，想同屋企人開開心心過一日。無論係日經、月經定年經，都係話呢種Post成日會出現，係一種永恆嘅話題，每過一段日子都會再有人傾。舊，並唔係無聊，反而代表咗呢種Post相當有話題性，都係連登嘅重要特色。

——支持多元成家

全港最大型嘅同性戀網上討論區，連登。網民成日都講笑咁講，話連登係香港最多同性戀巴打上嘅論壇。可能因為香港社會相當保守，網路變咗其他性取向可以吹水傾計嘅地方，都一再表現咗連登多元性向嘅特色。好似有人開Post前面會用[hehe]，就係代表入面內容會同男同性戀相關。點解？兩個he喎，即係兩個男性喇。hehe咁開心，有興趣嘅巴打，記得留意呢個字眼喇！

——唔該重甜呀

人生有百味，五味最常在，人生流流長，就有人用五味嚟形容人生，酸甜苦辣咸。咁人生之甜，莫過於愛情，嘅兩性嘅巫山雲雨，緊加係甜之中甜。所以喺連登見到[有甜]、[無甜]，正係講緊有冇色色嘅成份。呢種形容詞，最多出自「講故台」，皆因現實邊有咁多甜，可以甜嘅多數都係出自FF幻想。好多網民都會留言，唔該重甜呀！加甜呀！咪就係想要睇更多愛情動作囉。

——係咪Bot

網路發達，科技一日千里，最能夠體現係人類社交。以前古人尚且要飛鴿傳書，家書抵萬金，但係而家現代人溝通，唔係秒回嘅話，隨時都會焦慮到不得了。網上討論區，成千上萬嘅人在線，在咗佢又點再怕無人秒回你？正因為咁，連登都有大量呢種[秒回]Post，仲要周不時都喺深夜時份出現，求巴絲打秒回傾計，解決內心嘅寂寞。如果你瞓唔著，想唔想開返個秒回Post呢？

——好文共賞

網上社交平台最俾人睇唔起，最受人批評嘅地方，就係在於網上討論太過淺薄，個個都係Too long didn't read，根本無深度可言。但係呢，文化事業仲係有人熱心去搞，成為網路之中嘅清流。呢種人好醒目，開Post之前必定注明[文長必看]、[文長注意]等字眼，大家點入嚟之前，已經有心理準備要睇千字文。呢種[文長]Post喺連登排名有第十，都證明大家其實幾有文化喎。

——志同道合

古有高登你的樣子如何巴打，今有連登肥絲大隻，兩個都係知名會俾巴絲打召喚嘅對象。不過[召喚]Post，唔一定只係召喚網路名人嘅。皆因網路上有好多唔同身份、年紀、與趣嘅朋友，佢哋都成日會喺連登開[召喚]Post。召喚咩？[召喚九十後吹水]、[召喚行山巴絲一齊行山]、[召喚IT狗分享返工苦況]等等，三五成群，個個好人。你都有想召喚嘅對象？一齊上連登體驗吓喇！

——問咗未必答

[你問我答]絲，77歲，你問我答。[你問我答]脫髮救髮、植髮、用藥、買藥、幫買及謬誤討論。[你問我答]有關考鋼琴演奏級之你問我答(ATCL至FTCL)。以上個個都係真Post，仲有好多更加特別，每次出現呢種Post總係特別吸引，皆因可以睇到來自五湖四海嘅人分享經驗。不過真真假假，都真係上連登勿認真，有時仲會問咗都唔答，唔好咁高期望，但的確有唔少高質Post。

——唔好做不孝子

正所謂上連登出Post無圖，隨時會俾各位巴絲打問候雙親，咁閣下無緣無故令自己父母出事，緊係相當不孝嗱。連登出Post，通常有個定理，多圖等於一張圖，有圖等於無圖，無圖就真係無圖。有圖無圖，有人問候有人不孝，都係連登生態常見嘅一環。[多圖]爆乳台妹性感抖動，一手不能把掌握的神秘玉乳。試諗吓，如果你入到呢種Post發現一張圖都無，相信你都會大罵出口。

——馬總統睇手錶

今時今日，做香港媒體嘅，一定會有人負責專門睇住連登，皆因連登嘅話題，隨時係香港人茶餘飯後熱議嘅八卦趣談。而且連登仲周不時會有一種Post，好多記者都可能靠佢先收到風。[突發]生化危機3重製版封面洩露！[突發]粉嶺公路巴士撞樹多人受傷。呢種新聞，可能連記者都未必咁快知，但就會先喺連登出現。不過更多突發，係無聊到同馬總統睇手錶一樣嘅，呢種都係連登生態。