2019年過去，香港歷史書注定會為呢一年寫下無數嘅篇章，但始終一切都並未過去，現在依然邁向未來，百家爭鳴，眾聲喧嘩，喺定於一尊之前，文化發展往往先係最為盛大、多元。2019年，香港音樂都因此迎來光輝歲月，創作人有感於時代變化，寫下唱出深入民心嘅歌曲，令好多好多香港人面對現實之外，都有幾分喘息嘅空間。點樣回顧2019年？今日就等DailyView用網路大數據，陪你細數返，呢段漫長日子伴你同行，香港二十大獨立樂團到底花落誰家喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
image source：Facebook/RubberBand
——空郵
香港獨立樂團話梅鹿，佢哋相對其他樂隊有相當明顯嘅特色，就係佢哋係玩純音樂嘅，主打嘅係音樂曲調，而唔係有位主音唱歌。呢種主流音樂界無可能做到嘅事，反而成為佢哋係地下獨立樂團嘅特色。各種唔同、奇怪嘅拍子組合，造就咗佢哋獨特風格。2019年，佢哋推出新嘅專輯《Insufficient Postage》，七首新歌相當吸引。如果想了解佢哋，不妨聽吓其中新歌《空郵》！
網友：「療癒x療癒=這首歌。」
——Good Night
香港，到底有幾多音樂人才？聽完香港獨立樂團觸執毛嘅歌曲，我哋會發現，原來香港都有一隊咁有特色，咁有水平嘅樂隊。2005年成立至今，推出咗多首歌曲，單係一首《Good Night》，已經見識佢哋音樂水準之高。好多網民都話，要睇靚仔聽POP歌，慢行唔送。要聽真正嘅音樂，與別不同，歡迎留喺到。觸執毛已經有兩年未出新歌，好多Fans都問，幾時會出俾我哋聽？
網友：「真係好正個種英式band感覺！」
——回憶有罪
酒，愈老愈為香醇；歌，愈舊愈有味道。香港獨立樂團嘅老經典，由劉以達、黃耀明組成嘅樂團，達明一派喺1986年已經推出咗首張唱片，之後曾經宣布退出再復出，期間不斷咁推出精彩作品。2018年，達明一派仲攞埋香港樂壇最高殊榮「金針獎」，力證佢哋嘅成就。2019年，達明一派推出新歌《回憶有罪》，明哥仲喺Facebook上表示「願廣場上 聲音不會滅」。
網民：「只有達明，咁多年也企硬對抗。」
——Power Of Love
2005年成立，香港重金屬樂隊鐵樹蘭，以佢哋音樂風格嘅特別，鮮明嘅新金屬姿態走入香港獨立音樂圈，令好多留音開香港音樂嘅人，都覺得耳目一新。音樂，唔一定只係輕輕鬆鬆嘅！佢哋雖然相對無咁火紅，但堅持自己嘅音樂方向，成立咗自己嘅獨特魅力。2019年，佢哋又有新突破，同鄭秀文合作出咗首《Power Of Love》，火花四射，真係可謂天作之合，唱出好歌好詞！
網友：「鐵樹蘭+鄭秀文=型到震！」
——初老
Kolor自2007年出首至今，創作、演奏咗無數精彩嘅歌曲，一直都有好多忠實Fans，話佢哋可能全香港最俾人低估嘅樂隊！其實單睇2009年推出嘅《圍城》，創作意念好有深度，演出別樹一格，唱出喺物慾橫流嘅時代，令香港好多價值都失去！十年之後，佢哋喺2019年5月推出新歌《初老》，「失去初心就已經初老」，就算已經二十幾年，就算香港再多變化，都要堅守初心。
網友：「諗唔明有咩可能會唔紅，加油！」
——K同學
台港文青最愛，音樂勁有個人特色、質感嘅獨立樂團，My Little Airport多年嚟已經推出咗無數深入人心嘅歌曲。一首《讓我搭一班會爆炸的飛機》，有幾多香港人坐飛機會聽？一首《西西弗斯之歌》，又係幾多香港打工仔女嘅心聲？2019年，先嚟一首《吳小姐》，再有一首《K同學》，「何以這晚之後／我竟想去習武保衛地球」，My Little Airport又成功推出咗新嘅經典，令人狂Loop。
網友：「你們不棄，我永不離！」
——¿醒未?
香港知名嘅獨立樂團 RubberBand，近年愈戰愈勇，2018年《未來見》廣為人知，唱出友情重要；2019年，憑電影《逆流大叔》演唱歌曲《逆流之歌》獲頒兩項香港電影金像獎嘅歌曲獎項。2019年，RubberBand再出新歌，名為《¿醒未?》。RubberBand遠喺日本拍攝，內容係講佢哋訓緊都唔願醒，甚至係裝睡嘅人，點都叫唔醒嘅情況。而佢哋，就負責不斷叫香港人Wake up！
網友：「RubberBand係我最喜愛嘅樂隊。」
——好想拯救地球
ToNick，自2007年出首至今，風格都幾多變化，有舊Fans最愛嘅《T.O.N.I.C.K》，公認係最原汁原味嘅ToNick，用100蚊都拍到MV，反而最為樸實。2017年《救殭清道夫》主題曲，ToNick嘅《長相廝守》紅爆香港，終於真正以獨立之名殺入主流。無論係邊個方向都好，ToNick一直都全心全意演奏，2019年《好想拯救地球》，「能力不足夠／再壞也要繼續走」，用音樂記下香港。
網友：「香港人既band香港人自己撐返！」
——M.L.Y
廿四味 24herbs，2006年成立，2008年推出咗第一張專輯《廿四味》，高質嘅音樂創作、演出，即刻成為咗香港獨立樂團嘅表表者，走到2019年，依然極受香港人關注。當年嘅後生仔，到而家都走入壯年，佢哋對音樂嘅火，一路走來，始終如一。2019年，佢哋終於再出新歌，一首《M.L.Y》，講出香港人生活嘅困難，資本主義嘅邪惡，廿四味再次唱出咗低下階層嘅苦況。
網友：「而家變哂阿叔反而我覺得仲正！好有味道！」
——二零一九
1999年，LMF出咗第一隻EP，當時因為佢哋嘅歌詞有唔少粗口，好多香港人都話佢哋粗俗，唔能夠接受。邊個又諗到，LMF嘅直接，反而喺2019年得到咁多香港人嘅共鳴？原來，面對呢個世界，好多奇怪到難以理解嘅荒謬，真係要好似LMF嘅唱，先可以表達到自己累積嘅情緒。正如佢哋以2019年為名嘅歌曲《二零一九》，寫出咗呢個時代之聲，唱出咗香港人嘅心聲。
網友：「LMF真係香港hip-hop界既永恆代表！」
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2019年12月20日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港2019年度獨立樂團』相關文本進行分析，並根據網友就該議題之討論及結合主題人物YouTube訂閱數，以各佔50％的比例排名 ，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
DailyView曰：
香港音樂，國際水平
