2019回顧／二十大香港劇集，邊個話香港無人煲劇？

——新都市傳奇

由香港才子王貽興、武打明星劉翁合作編劇、導演的ViuTV新劇，《黑市》，極力創造香港新一代嘅都市傳奇。黑暗嘅我城，到底隱藏咗幾多不可告人嘅秘密？每個人心入面，都有一片無法摸清嘅黑色慾望，總有一日會喺社會爆發出嚟。《黑市》由20個單元劇組合而成，每個都係別出心裁嘅驚人故事，碟仙、地縛靈、鬼子母神⋯⋯播出無耐，已經名列ViuTV第十！

——現代愛情故事

ViuTV《婚內情》，講述香港現代社會相當普遍嘅愛情故事，亦即係，唔好以為結婚就係Happy forever咁幸福。因為呢，今時今日，結婚隨時只係愛情嘅終結，無人可能保證一紙婚書嘅效用。《婚內情》點解咁受歡迎？咪就係講出咗，原來結婚都可以有意外，老公老婆隨時可以愛上嘅另一個人。鄧萃雯嘅演技已經係呢部劇嘅實力保證，真係唔到香港人唔睇喇。

——反烏托邦

香港劇集，成日都俾其他人批評，話太公式化，劇集嚟嚟去去，都係講緊唔同形式嘅三角戀，可唔可以有更多新意？ViuTV《理想國》就用深度題材成為咗2019年香港劇集嘅一股清流。咩叫反烏托邦？即係話世界無咁理想、完美，如果真係追求烏托邦，最後結果只會係得人驚。《理想國》13集單元劇，科技、人性；現實、虛擬嘅探討，會畀到我哋有更多嘅反思。

——家有一老

ViuTV劇集《仇老爺爺》，打破咗香港人以前成日講嘅「敬老」，反而以「廢老」、「廢青」呢個社會現實做題材，講出香港現代社會嘅老青衝突。香港新一代嘅家庭關係，其實已經大大同之前唔同，老人家未必了解後生仔，後生仔也未必知道老人家苦心。咁有趣嘅角色定位，到底爺孫之間，又點樣化對立而成就感情呢？家有一老嘅香港人，記得開嚟學吓嘢喇！

——香港教育

香港人，有邊個未做過學生？又有邊個做學生果陣，無對香港教育制度有所不滿？香港地，最出名就係學生壓力大，填鴨式教育，仲要俾人話係高分低能。ViuTV《教束》名列第一，正係講出咗香港教育制度嘅現實，對學生，對老師直頭係一種束縳。咁到底係香港生存嘅學生、老師，可以點樣面對呢個教育制度？如果想知道更多學校前線嘅情況，《教束》一定要睇。

——安心睇劇

TVB早喺2018年，已經將《牛下女高音》拍攝完成，不過呢段期間，爆發咗香港娛樂圈相當有名嘅醜聞「安心事件」。呢部劇嘅第二女主角黃心穎，喺劇入面有大量戲份，為咗觀眾嘅反應，唯一暫時唔播住喇！直到2019年10月，先再次推出《牛下女高音》。Well，呢部劇咁多人留意，其實都同呢件事有關，唔知係好定唔好，更唔知觀眾睇到佢，又有咩諗法呢？

——經典三角戀

問世間情是何物？點解愛情會咁令人苦惱呢？原因無他嘅，皆因相愛很難！喺香港地，拍拖超過三個月，都已經好out。男人成日出去玩，玩到唔識返屋企，做女人嘅唔通只係留喺屋企等人咩？香港最多事業女性，真係「多功能老婆」，老公偷食，自己都有好多嘢可以做。《多功能老婆》，女主角老公出軌，之後遇到個好男人，但老公又返嚟，呢個情況點好？

——香港地產

講起香港，有邊個唔知香港最出名嘅地價？香港人出去同外地人傾計，人地隨時第一句就係講，你地係咪買唔起樓？TVB《婚姻合伙人》就用香港地產做題材，男女主角合作經營劏房，成功到開設埋地產代理公司，呢對最佳拍檔結成夫婦，成為在公在私嘅合伙人。不過，做人邊有咁輕鬆！隨住劇情推展，唔止有三角戀，仲有家庭糾紛。合伙人，唯有一齊上。

——支持馬明

TVB《白色強人》，圍繞醫生救急扶危情況發展故事，有趣緊張之外，亦都有探討醫療改革嘅問題，可謂有淺有深，值得香港人睇睇。呢部劇，仲生出咗「視帝」、「視后」。馬國明、唐詩詠喺《星和璀璨星光夜2019》以呢部劇奪得「最佳TVB男藝人」同「最佳TVB女藝人」殊榮，成為新加坡「視帝」、「視后」。演技咁出色，受國際認可，難怪第二名喇！

——奇幻穿越

TVB嘅第一名，代表咗全香港最關注嘅劇集，《金宵大廈》。點解呢部劇咁受歡迎？皆因取材獨特，內容以前世今生做主線，涉及夢、寓言、曼德拉效應、蝴蝶效應同平行時空等議題，令觀眾耳目一新。而取景又有香港味道，以尖沙咀嘅香檳大廈作主要背景，好多香港人睇落都特別熟悉。咁受得，TVB已經話要拍續集，未睇嘅朋友，係時候睇定等下集喇！