香港人新年狂收十大禮物，嘉頓什餅排第幾？

——仲有十幾底

新年送禮，根據非正式統計，每個香港家庭平均都會收到十幾底嘅蘿蔔糕，成個雪櫃都放滿晒，搞到根本無位放其他嘢！而你要知道，蘿蔔糕可以整嘅方法得兩種，一係蒸，一係煎，無咩特別變化可言。如果唔想浪費食物，又要喺過期之前食晒，就只有一個方法。呢個方法，咪就係每日正餐都要食蘿蔔糕囉！食到反胃，都要食埋佢。

——點解唔係真金

香港人成日都講一句，錢，邊個會嫌多？但係香港人有一樣嘢就一定唔想收，呢樣就係朱古力金幣喇！朱古力金幣，味道一般，分分鐘仲有銅臭味，放入手就認真難受。加上，朱古力金幣好似成日放咗好耐咁，都唔知幾時過期，好多人都係取個意頭，就放埋一邊。你諗吓，你去人地屋企見到有朱古力金幣，會唔會攞埋食？大家都心照喇！

——太甜食唔晒

平日食朱古力，好多人都係一塊起兩塊止，除咗小朋友，好少人會狂食。一嚟對身體唔好，二嚟人大咗唔想食咁多甜嘢，不過呢，朱古力偏偏就成日係送禮首選。新年收收埋埋一大堆，上百塊咁多，根本就食唔晒。其中貝殼朱古力就係好多屋企都會收到，食唔晒放埋一邊，結果隨住年月日積月累，愈變愈多，唔知邊一年先可以清得完呢？

——都係貴價嘢

雞精，雖然有一定價錢，又對身體好，但係呢，並唔係人人都鍾意飲。而且相對其他食品，雞精佔嘅空間都相對比較多，回收又比較煩，令到唔少人收到都幾無奈。如果平時有飲開雞精，都可以當係每日飲一支，始終呢樣嘢唔可以一次飲太多，但總會清得晒。但係當你唔鍾意雞精，唯有諗方法轉送畀其他人，希望其他人會樂意接收。

——天神嘅禮物

送朱古力，品牌首選通常都係金莎，呢個品牌已經深入香港民心。金莎，係天神遺落喺人間嘅禮物，咁當然大家作為普通人，都鍾意買呢種有格調嘅金莎。金莎唔單止食得，仲可以摺花花，認真食得又玩得。不過呢，正因為大家都送金莎，自然就搞到無邊個屋企可以清得晒。太受歡迎，都係一種罪名。金莎，幾時先食完？

——總有一盒喺左近

藍罐曲奇，四種口味，係唔少人細個最愛，但隨住年紀大咗，每年新年都收到一大堆，就認真食唔落喇！每年睇住藍罐愈堆愈多，真係令人覺得好灰心，就好似童年已經過去，青春嘅尾巴都捉唔住咁。不過，如果屋企仲有小朋友，都可以寄望佢哋食晒，well，社會嘅未來就係小朋友。只要相信，總有一日，藍罐曲奇就終於可以清晒佢。

——年糕幾時GO

年糕，喺好多心中，佢就等於中國嘅年獸，好多人每到新年，都會特別怕又食年糕。其實，年糕當然唔係唔好食，彈牙又好咬，但當一樣好食嘅食物，不斷咁反覆出現，就會令人出現審味疲勞，就算係龍肉，都食之無味喇。當父母係咁每日一碟一碟嘅攞出嚟，我哋係咁食呀食呀，希望下一餐唔會再有年糕，但事實係總有下一碟。

——健康小食

夏威夷果仁，大家都知道呢樣嘢好健康，係平時得閒可以食嘅小食。夏威夷果仁含油量高達70%以上，富含不飽和脂肪酸，豐富嘅鈣、磷、鐵，加上維生素B1、B2同人體必需的8種胺基酸。不過就算咁健康，佢都只係小食，唔係正餐，一日最多食5粒左右，食太多會易肥又對身體唔好。照咁食法，可能啱啱食晒，新年又有一堆送禮。

——好食定唔好食

飲食嘅嘢，往往好主觀嘅，睇返網民對樂家杏仁糖嘅評論，有一堆人話好好食，又有另一堆人講自己唔識欣賞。杏仁呢樣嘢，似乎係唔同食品之中，都出現所謂兩極嘅評價。不過無論樂家杏仁糖再好食，始終糖呢樣嘢唔可以食咁多，食得多對身體唔係咁好，要清晒佢，都要相當長嘅時間。大家努力食嘅同時，都記得要注意身體呀！

——受歡迎送禮首選

世界上，最受歡迎嘅嘢，並唔能夠反映佢嘅好壞。雖然大數據反映最多人關注嘉頓什餅，但睇返網民意見，其實對嘉頓什餅真係好多不滿，惡搞嘉頓什餅，改圖改歌寫故仔，樣樣都有。嘉頓什餅，唔係食物咁簡單，仲變成香港人新年嘅笑話，講起嘉頓什餅都會反問對方，睇你幾時先食得完。嘉頓什餅，可能已經係新年最知名嘅品牌。