精神苦悶，齊煲韓劇
今時今日，香港已經可以宣布無晒出街戶外活動嘅消遣娛樂，皆因兩個字，肺炎。中國傳肺炎落嚟，香港又無封關，真係隨時都機會大爆發！咁危險，精明嘅香港人緊係最醒目，只要唔出門口，又唔會用多一個已經所餘無幾嘅口罩，仲百分百唔會接觸到街外人，感染機會接近零！不過生理問題解決到，心理嘅苦悶就可能影響到我哋精神健康。今日就等DailyView用網路大數據幫幫你，細數2019年7月至2020年2月最多香港網民傾嘅十大韓劇，一齊煲煲佢喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
韓劇《Justice》，改編自同名嘅網路小說，喺韓國好受歡迎。呢部劇主要講述為咗復仇而同惡魔做交易嘅律師李泰京，同埋另一個為咗屋企人而決定成為惡魔嘅男人宋武勇，而社會上發生嘅女演員連鎖失蹤事件，竟然同呢兩個男人嘅黑暗慾望扯上關係，隨住故事發展，亦都漸漸揭開咗韓國VVIP所隱藏嘅社會恐怖。咁精彩，唔係唔睇呀？
網民：「崔振赫真心好型，我要係咁翻睇佢先得！」
咩叫做《偉大的Show》？做Show喎，香港人一聽就知同政治會扯上關係喇！無錯，《偉大的Show》真係韓國少見以政治為題材嘅劇集。宋承憲主演魏大韓，前國會議員，係一位希望體現「正義社會」嘅政治圈新人。突然有一日，有位自稱係佢嘅女嘅18歲少女，同三位「無血緣關係」嘅兄弟姐妹一齊嚟，竟然引致一場對人民嘅「偉大的Show」。
網民：「喜歡李善彬，我已經追晒這部，好正。」
歌仔都得唱，黑暗過後會是晨曦！香港社會近年咁灰，令好多人都無咩希望。咁呢個時候，就要睇睇《山茶花開時》喇。《山茶花開時》講嘅係一個單親媽媽面對社會黑暗嘅故事，遇上正義陽光嘅巡警，兩人開始一段浪漫動人嘅愛情故事。劇中有好多金句，好似「令人開懷大笑的事，每天都會有的」咁，灰心過後，世界總會有光明來嚟嘅。
網民：「雖然人生有好多唔開心，但總有快樂。」
如果你對韓劇了解唔多，可能第一部諗起嘅，會係曾經火爆香港嘅古裝劇《大長今》。近年最為出名嘅韓國古裝劇，係《朝鮮浪漫喜劇–綠豆傳》，絕對唔會比《大長今》失色。張東尹主演男主角全綠豆，因為要避難男扮女裝走入神秘嘅寡婦村，同唔想成為妓生嘅女孩，金所泫主演嘅董東珠相遇，上演輕鬆開心嘅浪漫喜劇，睇到個人都好開心。
網民：「親完男主又撩女二。綠豆傳真係好好睇！男主真係今年最美女裝大佬！」
《請融化我》，單睇個名，你可能以為只係一般普通愛情劇。無錯，你估中咗一半，呢部的確係愛情劇，但並唔係咁簡單，因為佢嘅劇情相當唔普通！《請融化我》係講一對男女，參加咗本身只係會冷凍人體24小時嘅計畫，結果兩個因為某種陰謀，竟然20年之後先醒返。醒返仲有副作用，佢哋要維持體溫31.5度。面對新世界，佢哋點生存落去？
網民：「池昌旭、元真兒真心最佳配合，佢哋兩個合作嘅火花好出色。」
好多女仔睇韓劇嘅一大原因，都係因為有香港社會好少見嘅美男子可以欣賞。人，鍾意睇靚嘅嘢，賞心悅耳係天性本能。《愛的迫降》呢部愛情劇，最令女仔討論、關注嘅，一定係演員炫彬嘅型格外表。炫彬演軍官，守護自己嘅愛人，入面有好多型爆造型，西裝、軍服，充滿陽剛氣息，專一深情嘅目光，真係好多香港女仔夢中情人，難怪咁受歡迎。
網民：「一起逃到瑞士吧！真係人美景靚，好好睇。」
想睇深度劇情片？韓劇《醫生耀漢》就最啱你！呢部劇改編自久坂部羊嘅小說《神の手》，睇個名都知，係講一位名叫耀漢做醫生嘅故事。耀漢係韓世醫院麻醉痛症醫學科教授，呢部劇主要嘅人物，就係痛症醫學科醫生，同身受痛症之苦嘅病人。呢部劇講到安樂死爭議嘅醫療劇，加埋尋找神秘疼痛原因嘅過程。患者、醫生之間，有笑有淚。
網民：「睇到個心都痛埋，可唔可以唔好咁寫實呀？」
韓劇《VAGABOND》，中譯《流浪者》，唔係我哋想像中，平時睇慣晒嘅愛情劇集，反而係貼近西方荷里活大動作嘅影片！李昇基主演特技替身演員，裴秀智主演韓國駐摩洛哥大使館嘅特約職員，一齊合作面對國際恐怖份子嘅陰謀。佢哋由第一集就已經有勁多武打、爆破場面，入面嘅商業鬥爭劇情亦都相當緊張精彩，想睇另一種韓劇呢部最啱你。
網民：「連場打鬥好精彩，估唔到呢類型都咁好睇。」
改編自紅爆韓國網絡嘅漫畫《意外發現的7月》，愛情浪漫夢幻校園劇《偶然發現的一天》，勾起無數男女嘅青春情懷！如果你曾經有一個好似那些年嘅故事，呢部劇絕對會令你諗返以前。如果你從來無好似呢種嘅浪漫嘅愛情，咁睇呢部劇，可以填補返你嘅遺憾。就等我哋一齊嚟睇，有心臟病嘅女高中生殷端午，點樣勇於追求自己嘅人生同愛情。
網民：「睇到我個少女心狂爆發，好想有男主角咁嘅人嚟做自己男朋友呀！」
李知恩 IU、呂珍九、康美娜、P.O⋯⋯咁多型男索女坐陣，咪話唔吸引！《德魯納酒店》榮登第一名，除咗有韓國巨星做實力保證之外，佢嘅劇情都相當特別，係用「鬼」做題材！不過，呢種鬼並唔係恐怖嘅，而劇情亦都唔係驚嚇類型，而係講一間專門為鬼服務嘅酒店，喺呢間酒店唔同嘅鬼都有自己嘅故事，佢哋喺酒店相遇，譜出動人心弦嘅劇情。
網民：「估唔到劇情咁好正，絕對係世界級，希望之後會拍第二集比我哋睇！」
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年02月06日至2020年02月05日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『10大網民最關注韓劇』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
「加入香港網路溫度計Fan Page睇睇網民嘅花生係乜嘢？」>>>
DailyView曰：
留喺屋企煲韓劇喇喂！
