ViuTV嘅電視劇同節目愈嚟愈受香港觀眾歡迎，尤其係依家個個都留喺屋企，睇吓佢哋嘅節目真係唔錯。最近就有個叫做《辣伙頭》嘅節目，八位靚女同場競技、大晒廚藝，再由三位主持：陶大宇、郭政鴻、楊尚友嚟試評分。唔少網民話依個節目個玩法好似《美女廚房》溝《MasterChef》，不過其實玩法都係其次，好多觀眾想睇嘅都係《辣伙頭》八位靚靚參賽者！今日DailyView就帶大家睇睇依八位參賽者邊個係網民討論得最多，再睇睇佢哋喺《辣伙頭》嘅表現啦！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
8 余逸思（628筆）
余逸思係一位香港Model，同時都係一位化妝師。而好多人認識佢都係透過ViuTV選美節目《美選D.n.A.》，余逸思喺比賽入面奪得全場總亞軍，正式出道。自此之後喺ViuTV大大小小嘅劇集入面，觀眾都可以見到佢嘅身影。今次佢喺《辣伙頭》入面表現相當亮眼，令觀眾發現原來余逸思煮嘢食都好得㗎！評判Christian仲大讚佢，話余逸思令佢擔心佢份工啦！
7 陳海寧（1009筆）
陳海寧出咗道幾年，參演過一啲電影同埋電視劇，係一位啱起步嘅演員。佢憑住港台電視《萬輻瑪利亞》漸漸走入觀眾眼前，唔少人見到佢嘅表現，都話呢個後生女有前途。今次佢作為《辣伙頭》八位參賽者之一，雖然唔好彩喺比賽途中俾人淘汰，不過佢都成功喺觀眾面前留下深刻印象。繼續加油啊，陳海寧！
6 沈殷怡（1747筆）
沈殷怡除咗個樣生得靚，仲好讀得書！佢係香港中文大學法學碩士出身，雖然讀法律，不過沈殷怡好鍾意鏡頭前嘅工作，所以呢兩年好經常喺ViuTV拍劇同埋做節目主持。而呢一次拍攝《辣伙頭》，沈殷怡喺節目入面除咗煮嘢食，仲難得表現出佢楚楚可憐嘅一面，喺淘汰賽當中因為覺得對隊友唔住而爆喊，好多人見到都話好心痛呢個善良嘅女仔。
5 郭奕芯（3485筆）
講起郭奕芯，大家應該十分熟悉佢喺大銀幕前面嘅形象，喺2015年，佢十九歲嘅時候已經擔正做電影《同班同學》嘅女主角。呢套戲令佢喺好多人心目中留低好深印象。2017年佢又再次擔正拍咗套恐怖片《鬼網》，係一位非常有前途嘅演員。呢次佢喺《辣伙頭》入面煮嘢食都有好好表現，不過最令觀眾印象深刻嘅，絕對係佢嗰隻唔熟嘅「蘇格蘭夾心蛋」！
4 鄧月平（4047筆）
相信好多宅男都知道鄧月平，鄧月平一開始喺網上走紅，繼而簽約做藝人，之後仲參加咗ViuTV嘅選美節目。因為佢個樣有少少似黃翠如，又真係一位靚女，所以漸漸就成為咗宅男女神。但係唔好以為鄧月平得個樣，今次參加《辣伙頭》，佢嘅表現真係可以話非常出眾，經常俾評判大讚！煮手撕雞得，劏魚又得，真係入得廚房，出得廳堂！
3 陳欣妍（4061筆）
陳欣妍係一位新晉女演員，不過比起電視曝光率，佢喺Instagram嘅曝光率可謂為之驚人，因為佢平時鍾意Post一啲健康又Sporty嘅相，所以收穫到唔少男女Fans鍾意。而除咗樣靚身材正之餘，陳欣妍今次參加《辣伙頭》都可以話係出盡力表演，好似餐廳營運對決一集入面，佢喺餐廳門口出盡力咁拉客！陳欣妍嘅努力，相信觀眾係見得到㗎！
2 蘇菲（7082筆）
相信有一啲香港觀眾唔係咁熟悉蘇菲，不過睇開YouTube嘅新一代香港網民就一定有印象啦！蘇菲係澳門微辣嘅演員，成日喺網上拍搞笑片，標誌嘅外表吸引到好多宅男鍾意，漸漸就成為咗港澳網民新寵兒。今次蘇菲嚟香港拍《辣伙頭》，相信佢會走進各個年齡層嘅觀眾眼前，好似已經有一啲媽媽級嘅觀眾，讚佢個樣好乖女，吸引唔少人鍾意！
1 洛兒（13195筆）
洛兒係今次《辣伙頭》當中最熱門、聲量最大嘅一位參賽者，喺參加ViuTV《辣伙頭》之前，其實佢已經參加過TVB嘅《美女廚房》。雖然可惜最後喺《辣伙頭》俾人淘汰，但佢嘅話題性依然非常高，唔少網民好鍾意討論佢有幾蝦碌。好似第一集著火嘅時候，佢臨危不亂又淡定嘅樣，真係好吸引人，再睇返佢嘅IG相，真係靚到Dump一聲啊！
網路溫度計香港版嘅Telegram開咗喇！快D嚟follow我哋啦→https://t.me/dailyviewhk
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年02月21日至2020年02月20日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『辣伙頭靚女參賽者』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
DailyView曰：
8個Thx！我全部都要！
