香港哋，如果唔係富二代，成功靠父幹嘅話，都難免要打返份工，做打工仔一族。古代有行業劃分階級，其實現代都有呢種概念，差在有冇講出口啫。香港哋又點劃分？緊係唔係講幾有意義理想喇，就係用搵得幾多錢去區分。神科畢業，醫生律師會計師就聽得多，咁普遍大家覺得最慘最血汗辛苦嘅工呢？今日就等DailyView用網路大數據話你知，香港網民認為嘅血汗勞工十大排名，等大家唔好入錯行。
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
喺香港做運動員，近年嚟都已經受到唔少市民支持、尊重，不過事實依然無改變，就係香港對運動員嘅資助唔多，欠缺培訓，更加無理過運動員退役之後嘅保障。香港運動員，往往爭取到好成績之後，都會講希望香港對運動員有更多資助。可惜到咗今日，現實都無咩大改變。運動員，有夢，都有血汗。
網民：「希望比更多支援運動員！」
有一種工，首先你要有足夠嘅資本，有錢去租間音樂工作室，有埋相關工具，先可以做到嘅。無錯，呢份就係音樂製作喇。如果你好運，直接搵到間公司都好少少，如果係由零開始，就認真要諗諗喇。音樂製作，你可能用咗好多時間整咗首曲出嚟，但未必有人受，就算首歌出名，九成都唔會諗到你呀。
網民：「真係數唔出有咩人出名喎！」
設計師，designer，聽落個名真心有型，隨時溝死仔溝死女。不過，你又知唔知做設計師有幾慘？客人多多要求，老細以為自己勁過你，將你嘅設計左改右改。更有甚者，佢哋一味只係識話咁唔得，叫你重新設計過一份，你唯有OT頂上。計返時薪，隨時最低工資都無！又要受氣，收入又低，咪話唔血汗。
網民：「幫我設計比個讚好你。」
香港最出名係咩？文化沙漠囉！如果係香港地，你同人哋講，喂我將來想做作家搵食。九成九嘅人都會苦口婆心咁同你講，發吓夢好喇，做作家邊到搵到食。無錯，香港人有幾可買書？就算買書，九成九都唔係支持香港作家。香港唔尊重作家，覺得文學無價值，唔係第一日嘅事。夢想，都要維到生先得。
網民：「一粒字值幾錢？」
喺香港，要做歌星真係唔係咁易。睇返唔少都叫有名嘅歌手，都唔係單單靠唱歌搵食，仲要周不時出show先得。如果係唔出名嘅歌手，可能仲要去做街頭表演，等大家知佢個名。當做歌手成為夢想，呢個夢可能係難以謀生，生計好唔穩定，隨時唱到自己把聲沙晒，都無人欣賞。歌星嘅夢，真係好血汗。
網民：「發得明星夢就要咁。」
做得影視行業，唔理你係拍電影定劇集，只要你唔係有份出鏡嘅演員，幾乎係成世唔使出頭。外國或者都有人尊重影視幕後人員，但係香港，咪就係得完場最後一行字畀你！仲要，香港根本無人留意影視幕後人員，個個都只係識去追星，影視幕後人員永遠都係高付出低收入。唔紅，又點會有名有利先？
網民：「香港影視幕後真係好慘！」
香港地，成日都有人話，女人同細路仔嘅錢最好搵。呢句嘢講得多，結果就有好多人想賺女人錢，但事實就係，女人錢都唔好賺！好似美容呢個行業，今時今日已經好多人競爭，個餅分得好細。大量人入行，結果貨比三家，係人都搵間最抵先去。所以話，美容呢行，已經變咗搵食難嘅血汗工作，認真悲情！
網民：「上網睇片自己美容算數。」
香港哋，飲食業從來都唔係輕鬆嘢，佢哋工時長，工作辛苦，長時間做同一個動作，好多時候都會整到周身骨病，身體骨骼磨損。而且廚師雖然唔算特別低人工，但照返血汗比例，就相當悲情喇。佢哋對住個爐頭咁熱，成身出晒汗，都咪話唔辛苦。做廚師，最開心嘅，好多時都係客人食得開心，都係一個夢。
網民：「出咗名做大廚就值喇！」
做演員，好多時都會俾人話，你係咪發明星夢呀？呢個夢，每年都有好多男女付出血汗去發。咁多人之中，能夠成功出名，就好似好風光咁。但正所謂一仗功成萬骨枯，明星背後，有無數咁多半紅不黑，紅都無紅過嘅演員。佢哋唔單止低人工，仲好多時為咗工作機會，去做死屍，只係為咗一個成名嘅夢想。
網民：「黄子華都係咁過嚟，加油！」
做新聞，意味咗一件永遠都做唔完，永遠都要同時間競賽嘅工作。點解咁講？皆因新聞從業人員，要追求有時效性嘅新聞，每日咁多資訊，遠至外國，近至本土，都有好多即時嘢係咁發生。搞新聞，人工偏低，無咩人睇得起文字工作者，但工作量無限，又要求真，真係好辛苦！無報導真相嘅夢想，點做呀？
網民：「大家都係立場哥哥、姐姐！」
【香港網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年03月11日至2020年03月09日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港十大血汗工作』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
網路溫度計香港版嘅Telegram開咗喇！快D嚟follow我哋啦→https://t.me/dailyviewhk
DailyView曰：
唔好只係做條無夢想嘅鹹魚！
