2024年先啱啱踏入第二個月，唔知大家對2023年邊件事特別有印象？雖然2023年香港「天氣不似預期」，發生嘅事好壞參雜，但過去嘅事係要好好咁對佢Say Goodbye。今日就等DailyView用網路大數據話你知，2023 香港十大熱門時事排名係邊十個啦！
網路溫度計透過《KEYPO大數據關鍵引擎》觀測、爬梳港澳地區2萬個公開網站頻道，包括新聞媒體、各大Social Media、Forum以及Blog，從中取得資料樣本數，並以AI語意程式作數據分析。「網路熱度」為主題項目相關的網路Posts和Comments ，數值愈大代表項目的討論度愈高。
區議會改制，得20%民選席位，其他全部由間接選舉同行政長官委任，你可能會心諗關你咩事，事關今屆地方選區總投票率為27.54%，只有119萬人投票。換句話講，7個人只有1個去投票，同時係1982年以嚟，區議會設立咁耐最低一屆。唯一值得安慰嘅係，首投族都願意走落街投票，履行社會責任。不過唔緊要嘅，反正會有人繼續改善社區建設就得啦！雖然唔知道計投票率嘅意義係邊，但最多下次再諗諗除咗接送老人家、幫手推輪椅，仲有冇咩其他計仔。
網民：「香港宜家咁安全，仲駛投咩！」
「 500年一遇」的「世紀暴雨」9月突襲香港，全港唔少地區都受到黑色暴雨影響，多區水浸又地陷。黃大仙站有神明保祐都頂唔順，更何況馬路早已變成一遍汪洋⋯⋯試諗下，如果你係揸揸下車望住水位越來越高嘅車主，都真係驚嫁！不過驚之餘，有得畀大隻消防員哥哥攬攬，可能係今次世紀黑雨中唯一得益者。不過，佢真係笑得太燦爛，嗰日Lunch 既話題應該都係睇緊佢張圖，瞬間成為網友熱話，唔知佢有冇後悔呢？講到尾，冇人會想有天災，呢次百年一遇暴雨令受傷人數超過100位，真係要好好多謝有關協助救災、清理嘅前線人員。如果冇咗你地，香港人第二日應該會好唔開心，因為返唔到工。
網民：「第二日香港人照返工，到底有咩先阻到香港人？」
「咩話？揼垃圾都要收錢？」係呀，即係膠袋要揼落政府指定垃圾袋，政策剛推出，市民都有唔少問題，不過可能因為「市民想唔清楚，幾時都係唔清楚」，而政府為咗大家有時間了解更多，垃圾徵費計劃由原本2023年尾實行，延至2024年4月，其後再延至同年8月再開始。雖然，綠領行動對延期計劃表示十分無奈與憤怒，但係對於市民嚟講有多啲時間了解垃圾膠袋收費嘅細節都好嘅。不過，2023年嗰陣政府通過《2023年產品環保責任(修訂)條例草案》，「走塑」就真係勢在必行啦，你哋又點睇呢？
網民：「弊啦！垃圾仲值錢過我。」
兩地開關～真的很興奮？開返關一周年鍾意北上消費既人仲記唔記得舊年返大陸要申請健康碼，排隊排到天荒地老。11月1號正式通關取消健康碼，去內地唔再需要健康碼，呢個政策令部份香港人興起北上消費熱潮，週末喺深圳知名商場「海岸城購物中心」、「KK Mall」等，都唔難見到孭住背囊、著波鞋、鍾意用Cash 嘅香港人。有深圳市民表示，真的是「三年河東，三年河西」，依家先明當年香港人嘅感受。而內地旅客南下來港人次超過2,650萬，可謂皆大歡喜，不過希望下次內地旅客來港時可以一早book定酒店，就算趕唔切返上去都唔洗露宿街頭吖嘛。
網民：「歡迎 歡迎 熱烈歡迎 春節再見！」
2023年頭有一排大家都好驚飲青紅蘿蔔湯，事源係譚仔米線創辦人新抱a.k.a郭富城老婆方媛老友蔡天鳳失蹤3日後畀人喺大埔發現殘體，其後法醫於作為證物嘅湯煲中搵到頭顱、頭髮，在另一個細煲仲搵到鎖骨，作案手法極其殘忍(打到呢到都有啲反胃⋯⋯)；事件旋即引起全城關注，更有唔少網友懷疑有創傷後遺症，聽到青紅蘿蔔湯即刻想嘔！不過，當你以為蔡天鳳係咪得罪咗仇家，搞到人地嚟尋仇報復之際；實際上係前夫一家做「吸血鬼」，離婚後一直靠蔡天鳳嘅財產過緊奢侈生活，包括洗費、別墅，而一聽到蔡天鳳要賣佢地住緊間屋，又諗起佢死咗，最大繼承人係兩個細路，貪心老爺就一不做二不休將佢殺死，釀成悲劇。唉，得28歲女咋！
網民：「有錢又係死，冇錢都係死，人生好難。」
岩岩講到香港內地2023通返關，唔少香港人因為港幣強勢同性價比關係，所以較願意北上報復性消費，令香港商家小店有口難言，諗住捱過疫情香港經濟終於復甦，點知⋯⋯ 生意越來越難做，而財爺咁貼地一定會諗盡辦法推出有效進一步提升香港經濟嘅活動，於是萬眾期待之下「香港夜繽紛」隆重登場，期間於全港18區舉辦多種夜間活動，例如夜市、無人機表演，又有飲食、睇戲優惠，務求令市民夜晚多啲出街，唔好返屋企休息，咁就夜夜繽紛啦！不過$20 得4粒燒賣，果然係別樹一格刺激經濟嘅商業模式。而2023年繼「香港夜繽紛」、「廟街夜繽紛」，李特首又有新搞作，喺全港18區舉行「日夜都繽紛」，相信大家都好期待深水場日夜都繽紛嘅活動。
網民：「所有活動加繽紛呢兩字就行得，都幾慳水慳力。」
JPEX騙局可以話係最新嘅騙案，其當中嘅行銷、營運模式都非常之專業，唔似得咩「入境處騙案」、「微信女女騙案」，JPEX利用大量網上、實體廣告以及KOL作包裝，假扮其虛擬貨幣平台無論係交易定係盈利都非常順利同有利可圖，唔少受害者當時就係睇到廣告好似好勁，一開始都滿載而歸，滿心歡喜咁諗住呢鋪一定發！點知貪字得個貧，成個騙局起碼有超過2,000多位受害者，涉及金額起碼超過13億元！而嗰期當紅炸子雞KOL 林作及陳怡亦捲入此JPEX 騙局，被警方以涉嫌串謀詐騙被拘捕。呢件上面似乎都係衰自己身上，要賴都冇得賴，個個都想發達唔通個個都想發達咩？係㗎！香港人特別容易中計，有平台調查指出，2023年香港喺加密貨幣詐騙率為2.2%，係亞太區詐騙率最高嘅地區之一。
網民：「咁易發達，個個都李嘉誠啦！」
自從呢個世界出現ChatGPT，無論係打工仔定學生哥好似都離唔開佢咁，短短 5 日極速獲得 100 萬用戶，真係破曬破紀錄。ChatGPT 只需幾句指令就可以生成你想要嘅內容，大至公司策略，細至Plan 行程，大家都可以用到。雖然大家一開始都笑佢係「人工智障」，但後來ChatGPT不斷升級進化，除咗可以配合其他網站畫圖，更可以寫Code 開發應用程式，而咁勁嘅AI 聊天機械人工具誕生後，令ChatGPT 嘅等級更上一層樓，就算有其他AI 機械人工具，例如Microsoft 嘅Copilot、Google 嘅Duet AI，ChatGPT 嘅地位依然屹立不倒。不過，2023年當AI 岩岩出現嗰陣，大家最好奇係「到底AI 會唔會取替人類嘅工作？」。2024年啦，你畀AI 取代咗未？
網民：「都唔知係我返工，定ChatGPT 幫我返工。」
以巴衝突係你同我未出世嗰陣已經有，因為土地資源分配問題，每隔一、兩年，雙方就有大規模衝突。而2023年嘅爆發點係因為以色列六黨聯合政府政局動盪，同時過於積極擴建引發了巴勒斯坦民眾的憤怒情緒。而巴勒斯坦武裝組織哈馬斯捉住最好時機並於2023年10月7號向以色列發動襲擊。雖然以巴戰爭只係局部地區衝突，可能會有避險資金流入香港市場，唯對全球金融經濟影響不大，但油價或會有大幅上漲嘅空間。如此同時，以巴衝突一直升級同加溫，雖然11月雙方釋放以色列人質和巴勒斯坦囚犯而停戰，但2024 年以色列軍方表示預計以巴戰爭將持續一整年。關心國際時事係香港人嘅本能，僅願世界可以安穩、平安！
網民：「戰爭只有帶畀無辜百姓不幸。」
杭州亞運會原本2022年舉辦，雖然好可惜因為嚴重特殊傳染性肺炎而延期，但係港隊氣勢絕對嘭嘭聲，全部項目勇奪8 金、16 銀、29 銅，合計53 枚獎牌，尤其游泳、劍擊項目成績十分亮眼，而何詩蓓以2金1銀3銅成為港隊一姐。港隊果然勁揪！不過今屆杭州亞運會非常特別，可以話係文化同科技高品質嘅體育盛會，開幕典禮當日採用數字火炬人傳遞火炬，虛實結合令全場氣氛非常熱烈。不過場外朋友個頭就有好大個問號啦，晨咁早等睇煙花匯演，點知最後得個吉，佢哋又大頭蝦嘅，一早講咗今次亞運以環保為題，利用AR 等技術用數碼煙花代替傳統煙花，唔睇新聞又唔搵定資料咪出事囉，其他人醒嘅一早知道係屋企開冷氣舒舒服服睇直播啦。
網民：「香港運動員唔係垃圾！」
【以上圖文為香港《網路溫度計》調查結果，未經授權請勿轉載改寫】
分析說明：
本研究資料由《KEYPO大數據關鍵引擎》提供，分析時間範圍為2023年1月1日至2023年12月31日。KEYPO觀測港澳地區萬個網站頻道，包含新聞媒體、Facebook、Instagram、YouTube及各大討論區、BLOG等，針對本議題相關文本內容進行分析，並根據網友就該議題之討論，作為內容撰寫依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。