唔講真係唔知，雖然話近年串流影音平台崛起，更唔係「電視撈飯」嘅年代，但原來2023年開播嘅原創香港電視劇夾夾埋埋，起碼有成30幾部！以下就等DailyView用網路大數據話你知《2023 TOP10 人氣港劇排名》睇吓自己有冇煲到呢十部港劇啦！
網路溫度計透過《KEYPO大數據關鍵引擎》觀測、爬梳港澳地區2萬個公開網站頻道，包括新聞媒體、各大Social Media、Forum以及Blog，從中取得資料樣本數，並以AI語意程式作數據分析。「網路熱度」為主題項目相關的網路Posts和Comments ，數值愈大代表項目的討論度愈高。
image source：sasamaka
時裝警匪片好啱香港人口味，年年有，仲要套套都有口碑，好似第10位由陳豪、胡定欣主演嘅《破毒強人》咁，以30.1點收視成為單集最高收視劇集，真係犀利！大台難得大膽討論毒品、販毒嘅內容，雖然集集死一個角色似乎過於誇張，但勝在陳豪喺劇尾以一把「chok」聲展現「神劇式」獨白，「人，應該係平等。呢個世界唔應該咁唔公道。」道出呢個時代專屬於香港嘅感觸，抵你成功因為呢部劇榮登視帝啦！
ViuTV 搵嚟宣萱復出拍攝《極度俏郎君》，仲有金像獎最佳男配角姜皓文同ERROR四子同場出演，未睇劇就咁睇演員陣容都覺得係年中必睇嘅重頭劇！播出後集集都有爆笑位，收視同觀眾反應都麻麻地，出唔出事就唔清楚，但網友就一面倒直批：「江湖劇變膠劇、大台味濃！」咁又好難怪嘅，因為唔單只觀眾唔理解劇情，就連演員保錡都講「拍完都唔知拍緊咩」，唔知大家又點睇呢？
ViuTV 最受歡迎嘅劇莫過於係運動主題電視劇，青春熱血喚醒咗唔少觀眾年輕嘅心，而舊年由MIRROR正副隊長楊樂文與江熚生、陳卓賢主演嘅《冰上火花》，咁多靚仔、靚女聚首一堂，即刻登上網友熱話啦！除咗MIRROR成員，仲有新男神王智騫 Martin！雖劇中戲份不多，但依然照派Fans福利騷肌，唔怪得首播以嚟熱度冇停過啦！不過有觀眾認為冰球喺香港算冷門運動，第一集就打比賽，根本睇唔明，點投入呀？
今次ViuTV 推出嘅《和解在後》就以比較冷門嘅調解員作為故事主軸，探討平等、人性等社會議題，已經吸引觀眾留意，再加上演員陣容堅強又有驚喜！原本以為Ivy So蘇雅琳作為女團COLLAR成員得個樣，點知喺呢部劇中展現非常熟練嘅演技，被網友力讚之餘，更稱佢可以往演員方向發展。另外，除咗有唔少中堅演員紛紛客串，例如尹光、潘紹聰，成部劇唔單只有劇情，有內容，更加有演技，大獲好評是常識吧！
嗱嗱嗱，都話香港人鍾意警匪片嫁啦！排第5名嘅《隱形戰隊》陣容同《超能使者》同出一徹，有唐詩詠、陳山聰、陳展鵬，只係多咗個馬國明。而唐詩詠嘅演技再被網友熱烈討論，其中一場1分30秒喺𨋢入面嘅試探戲，短短時間唐詩詠演出層層堆疊，成功營造緊張氣氛，受到觀眾好評如潮「好好戲、演得非常精彩同自然」。不過，本部劇依然逃唔過TVB式嘅爛尾結局，細節零交代、講到反派好勁，但最後輕鬆被K.O.、失憶唔洗半個鐘又恢愎，Happy Ending。完！
《一舞傾城》喺TVB 以八十年代香港為題，講夜總會夜夜笙歌與情感復仇嘅故事，呢部劇預熱嗰陣已經被視為港版《華燈初上》，同樣講夜總會小姐嘅生活，但內容重口味、情節大膽，唔似無綫作風。不過咁講，九點半黃金時間最緊要多人睇又有話題，第一集就有床戲，刺激！除咗激情戲之外，其實本劇借角色把口都討論咗唔少現實、人生嘅道理，一句：「夜總會賣咩？」，套用返依家嘅時代，不講夜總會，講落老蘭一樣啱用。
ViuTV 翻拍大熱韓劇《社內相親》從選角開始就引起熱話，盧瀚霆、呂爵安兩大男神再度同台演出，吸引唔少粉絲坐定定開播。但首播妝髮造型好似炒炒地車，盧瀚霆嘅妝感仲勁過女主，演唔到原版霸道總裁嘅氣勢。雖翻拍唔容易，不過一班編劇果然有實力，跟足韓版內容都可以將香港人先明嘅Gag 完美融入劇情，一眾網友都力讚「輕鬆笑下又睇完一集！」。只不過相親呢個Topic 喺香港係咪真係會有共嗚？你又有冇真係相親過？(Speed dating 唔計！)
本部由MakerVille 製作嘅劇集，同以往港劇嘅氛圍感唔同，主要著「死亡遊戲」作為主軸，探討人性、生存較為深刻嘅議題。最令觀眾驚訝嘅係其畫面血腥程度同外國有得比！集集有爆頭畫面，而故事背景設定罕見，為復古未來主義風格。劇中無論係演員、燈光、構圖、道具都配合得非常細緻，睇得出成個劇組人員嘅野心。如果覺得港原創劇索然無味，強烈推介此劇！
《新聞女王》有幾Hit？唔洗講啦！將背後勾心鬥角算計表現得淋漓盡致又真實嘅，大概只有TVB 做到。而《新聞女王》爆紅嘅原因，某程度都算叫天時地利人和，打工仔辛酸敢做唔敢講，佘詩曼擔正有演技實力，最緊要係呢部劇大陸比香港早播少少，而咁啱大陸嗰期太多「女性當自強失敗」嘅電視狗血劇，冇比較冇傷害。除此之外，Man 姐金句連還噴，想唔記得都難啦！作為打工仔嘅你，睇到都覺得有共嗚啦，仲唔紅咩？
如今播出第7年嘅TVB 處境劇《愛·回家之開心速遞》力壓年度話題劇《新聞女王》成為TOP 1！作為星期一到五晚晚都播出嘅劇集，相信編劇日日都R爆頭，但最犀利嘅係次次有咩熱門話題，不論係時事定隔離台藝人，《愛·回家之開心速遞》都可以勁快藉劇情抽水，真係「鑊鑊新鮮，鑊鑊甘」。爆笑劇情令香港人會心一笑，又有共嗚，作為一部收咗工同屋企人邊食飯邊睇嘅節目，唔知大家最有印象係邊一集呢？
【網路溫度計調查結果之圖文，未經授權請勿轉載、改寫】
分析說明：
本研究資料由《KEYPO大數據關鍵引擎》輿情分析系統提供，分析時間範圍為2023年1月1日至2023年12月31日，共1年。
《KEYPO大數據關鍵引擎》輿情分析系統擁有巨量資料，以人工智慧作語意分析之工具資料蒐集範圍：每月處理1000億以上中文資料的網路社群大數據資料庫，其內容涵蓋Facebook、YouTube、新聞媒體、討論區、部落格等網站，針對討論『人氣港劇』相關文本進行分析，並根據網友就該議題之討論，作為本分析依據。
本文所調查之結果，非參考投票、民調、網路問卷等資料，名次僅代表網路討論聲量大小，不代表網友正負評價。