唔講唔知，已經接近一半香港人喺虛擬銀行開戶！
image source: 香港貿易發展局
香港嘅虛擬銀行從2019年開始蓬勃發展，至今已經有8間已發牌且受香港金管局監管嘅Virtual Bank，但你又知唔知邊8間呢？當中有唔少虛擬銀行靠做爛市式回贈吸客，邊間最受港人歡心？今日就等網路溫度計用網路大數據話你知，香港8間虛擬銀行熱門討論排行！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
理慧銀行的討論度雖然唔高，但係咁多間之中唯二業務涵蓋範圍最廣嘅虛擬銀行，從儲蓄、個人/中小企借貸到唱外幣、旅遊保甚至連毛孩寵物保都有！而理慧銀行嘅重點優惠就係開戶申請分期且消費滿HK$1,000，即賺千元現金獎賞！最抵係出外旅行，只要去有銀聯嘅地方用livi 銀聯二維碼畀錢，仲免收海外交易手續費，最啱成日去旅遊嘅朋友！
網民：「成日彈App！點交易呀？」
富融銀行目前只提供儲蓄及私人貸款兩種服務，其賣點係服務唔受地區限制，隨時隨地即時兌換外匯，岩晒移咗民或長期唔係香港生活嘅港人。鍾意北上嘅開戶都有好處，用WeChat Pay HK 北上消費，港幣自動結算成人民幣又唔洗手續費，慳埋又可以飲多杯喜茶！不過，高層大換血之後唔知撐到幾耐，畢竟之前富融銀行係唯一一間按年虧損增幅達雙位數嘅銀行⋯⋯LOL
網民：「唔入流，推薦好友拎完回贈就Cut咗⋯⋯」
只要識用信用卡，其實都知靠回贈可以慳好多，但弊在唔少人懶理，個個月淨係還Min Pay，搞到利息愈滾愈大，最後收唔到科同時TU又變差。有見及此，天星銀行出咗個「貸款一筆清」專畀卡數纏身嘅人，用一個低啲嘅年利率幫你還晒其他街數先，呢個計劃甚至比提供新戶首月6.88厘活期存息更多討論，因為都真係幫到走投無路嘅人，「經一事長一智」重新建立理財觀念。
網民：「個代言人出晒事喎⋯⋯」
對中小企嚟講呢間開戶算方便，冇咩限制，最快25分鐘就搞掂，但未全面服務正式提供，目前主要向「貿易通」平台嘅進出口商提供，咁就可惜啦！PAO Bank 提供無卡提款服務，但只限有銀通ATM 提款，感覺上冇咁方便。而年頭平安壹賬通銀行，加息至4厘，起存額只需100元，為目前全港最高嘅1年期港元定存息，唔少網友都用佢儲息㗎！
網民：「開唔到App，係咪執咗？！」
講真間間虛擬銀行都都蝕住做，蝕少咗已經好感恩，但竟然有一間有機成為首間虧轉盈嘅虛銀！而且普惠金融唔係得把口，WeLab Bank 推出GoSave 定期存款，冇講你有幾多錢，低至$10 就可以做定期，最有趣嘅係，佢哋會定期推唔同嘅定期批次，參與嘅人愈多，年利率就愈多！Marketing 同事抵加人工啦！
網民：「初初幾有gimmick既 但之後息都縮水 都少左用！」
可能你對呢間冇咩印象，因為對比其他虛擬銀行嚟講，比較少賣廣告，但如果你有用開淘寶，咁你一定識！事關Ant Bank 最近同AlipayHK 合作，除咗可以喺淘寶或其他商店分期付款，仲有機會免手續費，將餘額自動轉入螞蟻銀行仲可享最高3%利息，仲有各種消費優惠，睇嚟今年Ant Bank 有機會從8間虛擬銀行中跑出！
網民：「買淘寶都要分期有冇咁唔掂？」
ZA Bank喺2020年香港第一間營業的虛擬銀行，業務廣、優惠多、Marketing又做得幾好，唔少人日常消費都鍾意用！最方便嘅係ZA Card 可以喺全港任何一間Visa ATM 撳錢，其實香港人要求唔多，有埋基本FPS 過數同Apple pay就已經好夠做！唔單只係咁，舊年4月CEO Ronald Iu 接受《彭博社》採訪仲講，ZA Bank即將提供「加密貨幣兌法幣」服務，即刻再引起網友熱烈討論。
網民：「每個月派一百萬，係咪真？」
點解MOX Bank 討論度咁高？除咗功能全面，夠曬日常消費用，買餸、交電話費等都有唔同嘅優惠回饋。MOX Bank 推出一卡兩用 Mox Debit/Credit，將實質金融服務結合虛擬銀行，仲可以儲埋Asia Miles，攞盡著數啦！但舊年七月，出現一班「moxbank苦主大聯盟」，Ac無預警被鎖，一班人喺官方fb專頁投訴派嬲，雖然抱怨多多，但仍然有好多人申請Mox Bank。
網民：「MOX Bank 實體卡都好靚！」
【以上圖文為香港網路溫度計調查結果，未經授權請勿轉載改寫】
分析說明：
本研究資料由《KEYPO大數據關鍵引擎》提供，分析時間範圍為2023年4月1日至2024年3月31日。KEYPO觀測港澳地區萬個網站頻道，包含新聞媒體、Facebook、Instagram、YouTube及各大討論區、BLOG等，針對本議題相關文本內容進行分析，並根據網友就該議題之討論，作為內容撰寫依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。