香港呢，一向都好多人鍾意打機。以前講開打機，好似一直都係男仔嘅天下，女仔鍾意煲劇、行街同影相，永遠同打機拉唔上咩關係。但係隨住時代嘅改變，有男仔鍾意扮靚靚，亦有女仔熱愛打機，甚至當咗呢份係佢哋嘅職業。無錯，今日要介紹嘅，就係近呢十年風行後生仔女嘅新興工作，唔係PTGF、PTBF，而係電子競技！簡單講，即係打機打得勁，打比賽，隨時搵得多過返Office。男子電競已經有唔少人，你又知唔知香港新晉電競女子戰隊，喺香港都相當活躍呢？
片／香港新晉電競女子戰隊！網民笑佢哋一個正常人都無？
Image source：FB／WAR E-Sport League
文／積遜猿
講起打機，好多人都覺得無出色。但係電子競技就改變咗世人嘅睇法，皆因打機打得好，係可以搵大錢。香港電競行業起步無耐，出現咗好多新晉選手，其中有一隊電競女子組合，就相當引人注目喇！BTHK Girl，九位香港後生女仔，無畏備受社會誤解嘅電競行業，決意組隊打遍香港，認真厲害。無耐之前，佢哋仲勇奪「傳說對決女子賽」嘅亞軍，睇嚟相當有實力喎。
香港網民近排就好關注BTHK Girl喇。但係留意嘅原因，並唔係留意佢哋嘅電競實力，而係笑佢哋嘅身形、外表喎。有網民就針對WAR E-Sport League最新發布BTHK Girl嘅團體合照，批評佢哋「一個正常人都無」。網民嘗試為佢哋解話：「唔幫人p相又cut得咁肉酸，間公司真係唔掂，我係班女一定嬲」。但係呢，又有人眼利咁回應，話張圖一放大嚟睇就見到有P過。仲有留言攞香港另一隊電競女子隊Janplus做比較，真係有對比有傷害咁話喎！
不過，BTHK Girl係香港電競女子戰隊，Sell嘅唔係外在，而係打機叻唔叻。好多網民都有相反意見，話根本唔應該笑人哋外表。「唔通打機都要成個model咁咩」、「打機咪打機囉，係要評頭論足」、「都係打機啫，你理得人靚唔靚」。仲有網民話指出佢哋係「新晉實力派」，睇人打機最緊要係技術好唔好，如果只係賣樣就無可看性。亦有人攞香港電競男子團體做比較，形容男仔都好多係「油頭四眼仔」，最緊要唔係樣，而係實力。
《傳說對決》，喺10月19號將會有7支女子戰隊競賽，BTHK Girl就話自己有信心攞到三甲，唔知佢哋真係會攞到咩名次呢？就等我哋一齊期待佢哋嘅打機實力喇！
延伸閱讀►►►