人生何其短暫，但文明卻可以承傳，存在得遠比我哋更長久。但係世事無常，海會枯，石會爛。天會荒，地都會老。2019年4月15號，法國巴黎聖母院發生重大火災，超越民族，屬於世界文化遺產嘅地標，自此蒙上一片灰燼嘅陰影。世界各地，不同人種、文明以至語言嘅群眾，都係咗文明象徵燒毀同哭一聲。我哋曾經以為，好多好多嘅地方都會等住自己參觀，但原來只要半點星火，即足以刺破人生幻夢。2019年10月31號，世界文化嘅悲劇再次上演⋯⋯
片／法國聖母院後最大悲劇！日本沖繩「首里城」一夜燒毀
Image source：YouTube／ANNnewsCH截圖
文／積遜猿
10月31號，日本沖繩傳來噩耗，世界文化遺產之一嘅「首里城」，意外一夜大火，目前已知有正殿、北殿與南殿「番所」、書院嘅「鎖之間」、黃金御殿同埋二階御殿，六棟珍貴嘅古蹟全數煙沒於火海，化作灰燼。喺漫長嘅歷史之中，「首里城」多災多難，曾經喺第二次世界大戰入面俾美軍砲擊全毀，戰後費時甚久，終於將沖繩「首里城」重建。點諗到，重建唔到30年，「首里城」如今上演嘅悲劇，已經係第五次毀壞。
2000年，沖繩「首里城」正式由聯合國列為世界文化遺產。世界文化遺產嘅標準相當高，要對人類文化有影響力，別樹一格。從歷史去睇，1426年首里按司尚巴志統一三山、建立琉球國，就係以首里城成為王城「首里城」。換言之，「首里城」即係代表咗琉球王國嘅整個文明嘅歷史象徵，代表人類昔日其中一支嘅光榮。如今，係佢自二戰後重建，沖繩當地民眾就同「首里城」有好深厚嘅感情，好多民眾都住喺附近，周不時都入去休憩，成為咗呢一代沖繩人嘅精神認同。美麗嘅建築風格，亦都聞名全球，每年都引來唔少旅客入嚟沖繩，只係為咗聞名不如見面。
又有邊個諗到，呢個代表咗歷史、當地民眾，同埋建築美學嘅「首里城」，竟然會喺一夜之間燒毀？根據《琉球新報》報導，10月31號清晨「首里城」起火，目前起火原因未明，而喺同日妟畫1點30分控制火勢，火勢唔會造成更多嘅破壞。有專家指出，因為「首里城」嘅構造特別，不同於其他城堡，佢係以木造建築為主，一俾火燒就好快波及其他建築物，正可以解釋點解唔到一日，已經燒咗總面積近4,200平方公尺嘅地方。
好多日本網友都留言，話終於明白當年法國人火燒聖母院有幾悲痛。好多將日本視為自己真正家鄉嘅香港人，都喺網路上同哭一聲，話前排聖母院先喊完，而家又要再為「首里城」傷心流淚。好彩嘅係，根據FB Page「日本史專欄」嘅消息，好多城內嘅文物目前都喺沖繩県立美術館，城入面嘅大多數都係仿真品。如果真係無錯，咁至少都係不幸中嘅大幸，重建之後都仲會有真文物可以展出。香港人，等「首里城」重建之後，都仲可以再去體會吓琉球王國文化嘅特色。
一齊睇睇網民點樣睇今次世界文化遺產大悲歌：
「好在重建過，應該有唔少圖紙有機會再重修復原。」
「令和之後日本個個月都有大災難，都唔知係唔係改錯年號。」
「日本重建呢啲好快手，最緊要無人命傷亡。」
延伸閱讀►►►