知名日本遊戲設計師小島秀夫，喺1987年製作出咗MSX2遊戲《Metal Gear》，開創咗一代遊戲類型嘅新經典，之後嘅《潛龍諜影2 固蛇》都大受歡迎。小島秀夫1998年喺Playstation重製《潛龍諜影》、《潛龍諜影2》，再次興起熱潮，令佢之後可以再出《潛龍諜影3》、《潛龍諜影4》、《潛龍諜影：崛起》《潛龍諜影：和平先驅》同《潛龍諜影 acrade》。2016年6月，美國E3宣布「小島製作」自科樂美脫離獨立後由SIE發行嘅新作《死亡擱淺》，但係評價就好兩極喇⋯⋯
片／小島秀夫新作《死亡擱淺》評價兩極？話你知香港網民點睇
Image source：FB／PlayStation HK
文／積遜猿
小島秀夫創立嘅「小島製作」，喺因為2015年3月，隨著佢從事嘅科樂美集團大幅重整，小島製作團隊俾公司解散，小島都俾人炒咗，於是佢就自立門戶。小島秀夫嘅《潛龍諜影》系列一直好受歡迎，全球都大把Fans，喺香港都好知名，好多人都期待緊佢嘅新作。2016年6月，美國E3宣布「小島製作」自科樂美脫離獨立後由SIE發行嘅新作《死亡擱淺》，全世界Game迷都好開心，因為代表又有好嘅遊戲可以玩喇！
Image source：《KEYPO大數據關鍵引擎》分析期間：2018/11/22-2019/11/21。
根據網路大數據《KEYPO大數據關鍵引擎》圖表可見，香港網路就《死亡擱淺》討論嘅聲量，呢一年以來有三個高峰。咁到底呢三個高峰係咩呢？就等我哋用數據睇睇喇！
第一高峰：中文預告片推出
小島秀夫新作《死亡擱淺》，單喺中文預告片嘅發行，都引嚟好多網民留意、討論。呢段預告片有別其他遊戲，有成九分鐘咁長，真係好用心好特別。咁令網民引發討論嘅，係大家都話自己睇晒九分鐘，都唔知隻Game到底係玩緊咩！唔怪得有人咁講：「電影預告片3分鐘演完最精采的地方，小島預告片9分鐘我什麼都看不懂。」
第二高峰：《死亡擱淺》發售日
Image source：FB／普雷伊電視遊樂器專賣店
2019年11月8號，全球注目嘅遊戲，終於當日正式喺PlayStation 4平台率先發售！呢隻Game有三個版本，分別為係「普通版」「特別版」同「珍藏版」。特別版同珍藏版擁有造型鐵盒、遊戲道具、幕後影片以及音樂專輯嘅下載序號，珍藏版仲多咗「布橋斯」貨箱，裡面擁有BB模型同小島製作吉祥物Ludens黏土人一隻。買邊個最好？真係好多討論喎！
第三高峰：《死亡擱淺》爆機
《死亡擱淺》雖然製作用心，遊戲時間都唔短，但同狂熱嘅Game迷相比，要爆機點會係難事喎！推出不足一個月，《死亡擱淺》已經有人爆機，因為《死亡擱淺》最後一章會有相當長嘅電影解話，故事好吸引，自然有好多人開始分享、討論。當然，大家都會開始講自己評價，但睇法相當兩極，大家睇睇香港網民點講喇！
「敢講有一半既好評都係因為掛住小島秀夫個名。」
「個非同步連線係整得幾好，但講故事同遊戲流程方面只係一般般。」
「玩法同系統係幾新，但有好多任務過程之中淨係跑同駕駛既時間都佔好多，令到遊玩性唔大，劇情一般之上但唔算一流，好多都係靠配樂同音樂煽動玩家情緒。」
「自己不經不覺玩左40個鐘先玩完，代入感好緊要，玩到最尾你都未知講緊乜，直到個兩個鐘電影，張全部野連埋一齊真係好正，小島用game黎令睇佢套電影既人更加有代入感，我睇完都唔知自己原來睇左兩個鐘，小島真係好癲！」
「意念，世界觀，好強烈電影感，配樂等都係世界級！其實係一隻藝術game。」
「第4章先開始知要做啲咩。隻game其實都唔差。可能我已經玩厭左槍game同格鬥。有時有啲新鮮感都唔錯。」
延伸閱讀►►►