網民睇「逃犯條例」講咩多? 香港人民嘅主場,鍵盤戰士都係戰士

網民睇「逃犯條例」講咩多? 香港人民嘅主場,鍵盤戰士都係戰士

大家要勇敢講出心底話!

2019/06/14

反送中
一切尚未結束,香港人仍需努力

6月9日至今,「逃犯條例」嘅爭議、示威,必定會寫入未來嘅香港史,雖然,此刻我哋仍未知道內容為何。自香港政府2月修訂《逃犯及刑事事宜相互法律協助條例》,企圖於6月通過相關條例,事情已經累積數月。正所謂冰封三尺,非一日之寒。香港市民嘅不滿、迷惑以至恐懼,經過6月9日103萬人和平、理性、非暴力嘅遊行,卻得不到期待嘅回應。6月12日遂化作警民衝突,警方嘅武力壓倒示威者,但係壓唔到更多香港人力求公義嘅心。至今,相關事件仍在發展,一切都尚未結束,但願天佑我城,終能令香港走向更好嘅未來。今日,DailyView就嚴謹地用網路大數據細數網民對「逃犯條例」相關事情嘅關注,等我哋可以更理性咁面對呢件香港大事。

DV小教室:網路溫度計透過《KEYPO大數據關鍵引擎》大調查觀測咗近萬個網站頻道(而且不斷增加ing),包括港澳地區的新聞頻道、FB、IG同埋各大討論區、Blog......透過強大嘅網文爬梳觀測,攞到巨大嘅資料樣本數,拎到上億嘅文章及留言訊息,以人工智慧的語意程式做分析。

image source:IG/oogesa

逃犯引渡條例,網民四大關注

因台灣起,不因台灣散

——台灣反對相關條列

2018年2月香港男性陳同佳喺台灣殺死女友後逃港,因為台港並無刑事司法互助,所以至今陳同佳都未因謀殺罪行受審。港府於是決定修訂《逃犯及刑事事宜相互法律協助條例》,將審議移交逃犯嘅權利,轉由行政長官決定。即係只要特首同法庭同意,犯人可以轉交去其他地方受審。但係,台灣政府立即反對呢條條例,陸委會仲話如果通過,會發出旅遊警示。唔怪得咁多網民都話,陳同佳咪又係送唔到返去受審,呢條條例根本係開司法嘅方便之門,隨時有人犯罪送去中國內地,所以大家先會「反送中」。

image source:翻攝自網路
香港人最驚失去自由

——我傷心呀痛心呀眼淚流

點解有103萬香港人出嚟遊行?點解有咁多香港網民會喺社交媒體「反送中」?其實歸根究底,網民最驚嘅係因為《逃犯及刑事事宜相互法律協助條例》,當特首有權移交犯人,隨時將得罪中國嘅香港人送返去受審。政府話,仲要經過法庭同意先可以移交,唔使驚嘅。但香港律師界已經發起咗「黑衣遊行」,表明呢條法令通過,一定會搞到香港嘅司法失去獨立。就算泛民主派議員多番質疑,政府依然企硬推行,香港人面對咁切身問題而得唔到妥善嘅解決,緊係相當擔心喇!無自由,有錢都無得享!

image source:Instagram/arily_dreams
國際海外媒體報導「反送中」

——東方之珠仲好受注目

香港人對《逃犯及刑事事宜相互法律協助條例》嘅恐懼、不滿,喺6月9日嘅遊行,喺6月12日嘅示威,都有唔少外國記者來港拍攝採訪。好似美國《紐約時報》嘅紐約同國內版本,6月10日頭版中央刊出香港遊行人頭湧湧嘅照片,以「Swarm in Hong Kong Protests China’s ‘Evil Law’」 (香港人群抗議中國「惡法」)為題,有相當詳細嘅篇幅講解事件。《時代》雜誌封面登出香港6月12日「反送中」示威,用「抵抗(The Resistance)」作標題,配上黑色嘅雨傘背後有濃濃催淚彈煙霧。香港人,絕不孤單。

image source:翻攝自互聯網
「逃犯條例」連署連署再連署

——鍵盤戰士都係戰士!

香港人,一向都係以和平、理性、非暴力自豪,咁最好最方便嘅表達意見方法,當然係網路連署喇!不論係撐「逃犯條例」,定係反「逃犯條例」,都有一堆連署,隨時簽到你手軟。反「逃犯條例」嘅眾多連署之中,最出名最受關注嘅,係白宮嘅「反送中」連署,已經有三十幾萬人參加,希望美國會出手支持香港,反對「逃犯條例」。而撐「逃犯條例」嘅,保公義撐修例大聯盟就發起咗「護港安全撐修例大連署」活動,目前為止網站顯示有成九十幾萬人簽名,好快多過七百萬人。得閒簽個名,好過唔簽嘅。

image source:白宮聯署網站

香港特首林鄭月娥,講話先同情後譴責

首次發言,誰是母親?

——「人民不是特首你的孩子」

6月12日,林鄭月娥第一次電話發言,係早上接受TVB《無綫新聞》專訪,片段安排喺6點半新聞播出。喺片段入面,佢話自己好擔心後生仔做嘅行動,形容《逃犯條例》好多爭議,解說同溝通都未必完全有用。至於林鄭被問到有人叫佢落台,佢就話從未心虛過,仲用「母親教導兒子」做比喻,話要唔可以縱容個仔嘅任性喎。佢仲強調話自己有唔少個人犧牲,絕不賣港,而係賣咗個身比香港。呢個母親論,即刻引起咗香港一堆媽媽反駁,人民唔係特首嘅仔女,阿媽亦都唔會開槍射親骨肉。


二度講話,誰是暴徒?

——「警棍下血流披面仍無動於衷」

第二次喺8點嘅電視發言,林鄭月娥三度形容金鐘一帶嘅警民衝突為「暴動行為」,仲話「任何文明、法治社會都不能容忍」,譴責示威者堵塞馬路,「嚴重影響社會運作」。佢指責示威者衝擊警隊,話「政府已多次積極回應和解釋」,要繼續用和平、理性嘅方法解決件事。不過好多網民聽完都好嬲,罵佢根本偏頗警方,無視市民受警方唔合理嘅武力對待,好似警方用大量嘅催淚彈、布袋彈驅趕民眾,導致多名香港人流血,連昏迷、吐血嘅都有。佢哋話,警方先係真正嘅暴徒,唔係香港民眾。


金鐘政府總部,抗議現場

香港地方,誰的主場?

——廣泛嘅暴民定義

香港市民喺6月9號進行咗一場百萬人嘅遊行,表達反對《逃犯條例》嘅訴求,但由於政府未有處理相關嘅民間意見,更於6月12號恢復草案二讀,故引發抗議活動升溫。市民於6月11、12號到金鍾進行「反送中」示威,阻礙《逃犯條例》草案二讀會議進行,期間警民一度衝突。在多間媒體嘅直播中可以見到,警方對金鐘示威活動以武力清場,先後以催淚彈霧、橡膠子彈同布袋彈驅趕、鎮壓現場人士,造成多人受傷。其後,政府公開定義示威者為「暴民」,而金鐘嘅示威活動就係「暴力騷亂」。


image source:Instagram/hk_freedom
一哥記招,大家都係香港人?

——我係真心架!

香港警務處長盧偉聰原定今日下午5點面見記者,並喺5點23分式到場,分別說明咗警方12號喺金鍾嘅行動,並且解答部分記者發問。喺是次記招,盧處長多次表示大家都係香港人,並將早前形容12號金鐘示威活動為「騷亂」嘅用詞肯定為「暴動」;面對記者提問警員使用武力情況,盧處長回答「用嘅就一定係啱」,但亦表示會再檢討;而有關警員以武力、不禮貌對待記者,盧處長就做咗D假設,同埋話示威現場亂,唔知道情況,不過就話自己係「真心」嘅。另外,面對記者嘅提問,盧處長多次表示「冇資料」、「唔清楚情況」,唔怪得個記者會完咗,有記者講咗句「全部都係廢話」啦。

image source:Instagram/kelvinkinwa

漫漫長路,絕不孤單

香港民眾喺捍衛公民權利,爭取民主自由,從來都未曾放棄。呢條漫漫長路,或許充滿槍聲,或者痛苦流血,但係,我哋絕對唔係孤單嘅。遠至外國嘅記者、人民,近至香港嘅後生仔,人數眾多,仍然伴我哋同行,行向更美好嘅未來。我哋呢刻未必見到光明,但係我哋唔可以唔行,因為無任何一個人、一個組織可以預知未來。未來,係掌握係一代又一代嘅後生仔手上。


分析說明:

本研究資料由《KEYPO大數據關鍵引擎》提供。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『引渡條例/林鄭月娥發言/金鐘』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論聲量大小,不代表網友正負評價。


「加入香港網路溫度計Fan Page睇睇網民嘅花生係乜嘢?」>>>

-------------------------------------------------------------------------------

DailyView曰:

人類對抗權力的鬥爭,就是記憶與遺忘的鬥爭。


接續看下一篇

x

訂閱DailyView網路溫度計(香港版)電子報