片/曾俊華力勸香港人和解!語重心長竟然換得網民咁回應?

香港自6月「反送中」逃犯修例至今,社會抗爭運動依然未見盡頭,警察同市民之間嘅流血衝突愈演愈烈,甚至多次出現黑社會惡意傷害市民嘅事件,令唔少香港人都質疑警察嘅公信力。前財政司司長兼前特首競選人曾俊華曾經預言,香港會隨著新任特首上台進入「撕裂2.0」嘅時代。喺今時今日嘅香港,呢個預言已經俾好多網民引用,似乎已經成真。8月21號,曾俊華再次就香港近況發言……

Image source:FB/John Tsang 曾俊華

文/積遜猿

前任香港特別行政區政府財政司司長,兼前特首競選人曾俊華,一向都係政府中相對深得民心嘅人,網民仲幫佢起咗個朵,叫佢做「薯片叔叔」。曾俊華退下政府已經兩年,但一直關心香港,平時講吓時事評論咁。近日香港社會抗爭運動咁激烈,佢都曾經講過每到周末心慌慌,8月21號,佢終於喺FB發佈新影片,題為「我們都是香港人」,講講佢自己對香港近況嘅感受。

影片約7分鐘,內容主要回應香港因「反送中」逃犯修訂條例嘅社會現況感受,認為只有真相先可以令香港走出困境,希望大家都有寬恕、和解同愛嘅能力。曾俊華首先講,有批小朋友驚開學之後俾人欺凌,而又有好多示威者俾標籤為失敗者,「我哋要坦白承認,香港病咗,而且仲病得好重」。佢主張雙方都放手,面對真相,因為「我哋都係香港人,係住喺同一屋簷下嘅一家人」。

曾俊華強調,無論白衫定黑衫,定係著制服,都係一家人。佢引用教宗方濟各講:「寬恕,不僅能拯救分裂的家庭,還能使我們讓社會變得沒有那麼無情和殘酷。」寬恕可以令傷口癒合,反之仇恨只會無止盡。和解,都絕對冇表面睇起嚟咁容易,佢其實係對我哋氣量嘅挑戰。黑白以外,我哋能唔能容許香港有唔同顏色?呢座城市究竟係一道光譜寬闊嘅彩虹,定只係有雙色甚至一種顏色嘅頑石?

曾俊華最後引用印度聖雄甘地嘅名句:「以眼還眼,只會讓天下盲目。」佢語重心長咁講,寬恕、和解、愛係最重要嘅,佢相信我哋都做得到,我哋可以令呢座城市重新偉大,煥發新生,因為我哋都係香港人。

Image source:FB/John Tsang 曾俊華影片截圖

咁其他網民又點樣睇曾俊華條片?一齊睇睇FB最多Likes嘅回應!

「感謝曾先生您的分享,如果今天的香港依然是高度自治,司法維護香港的核心價值,我想愛和寛恕確確實實可以令香港回復平靜。但香港已經回不去了。」

「明白叔叔意思,但一隻手掌拍不響,解鈴還須繫鈴人!五大訴求,缺一不可。」

「雖然薯片叔叔讀稿讀得幾感人,但香港回不去了。但依個政府唔值得信任,今日走出黎都難免被人認為是中共的懷柔政策。再也騙不了港人。五大訴求,缺一不可。」


延伸閱讀►►►


片/香港人不反中國人?網民向大陸律師陳秋實致敬!

片/水炮車定「漏水炮車」?市民車輛同香港街道被強制「變藍」?

片/疑似軍裝警察凌辱長者?閉路電視影到晒又打又除褲!

x

訂閱DailyView網路溫度計(香港版)電子報