唔該！一個常餐！
港式茶餐廳係香港嘅街坊食堂。食物出品必須有一定質素，如果唔係，唔使旨意有人幫襯。伙記要求有親切感之外，仲要求廚房一流手藝同出品。今日DailyView網路溫度計根據香港人最常食嘅早餐，透過網路大數據做咗個調查，一齊嚟睇吓啦～
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10. 炒麵
炒麵係香港地道嘅街坊炒麵。但唔係個個賣嘅豉油皇炒麵都咁好食。唔係炒得太肥膩；就係炒得唔夠乾身；一係炒得太鹹，一係豉味唔夠香甜。要整到唔肥膩，口感軟中帶酥脆，夠鑊氣，濕度適中，咁樣先至令人每食一啖都係一種享受。再有要求，可以先爆香韭黃、少許葱段、銀芽，或洋蔥，再落麵伴炒。
9. 油炸鬼
其實係「油炸檜」嘅諧音。檜即係宋朝時代一個被公認為奸相嘅秦檜，就係佢害死岳飛嫁啦。做法好簡單，只要將搓好的小塊麪粉團拉長，中間用刀背輕輕咁印一嚇，就攪掂左個長相造形，跟住放入滾油度炸，直至漲起同變成金黃色。外層要做到皮脆香口，唔「韌」，咬落去要有dd鹹味嘅鬆脆質感先叫正。
8. 班戟
食落肚暖笠笠的最正選擇就係班戟。一般的班戟厚身，切落去震騰騰，口感鬆軟輕盈，充滿空氣感。講究食落煙韌，蛋香四溢。班戟有厚身的同薄身的，有鹹有甜。如果舖頭有提供，加雪糕及野莓醬都得。至於梳乎厘班戟則要求口感鬆軟，氣孔平均，入口蛋味香濃出眾，食落肚更加唔係多講，身心靈大滿足啊。
7. 混醬腸粉
食腸粉最緊要嫩滑得黎，仲要厚實煙韌。雪白嘅腸粉就好似一匹畫布，食家只要按個人喜好加上唔同嘅醬汁，包括甜醬、麻醬、豉油、芝麻，就成為滑溜溜嘅混醬腸粉。香噴噴嘅腸粉，經濟實惠，深受學生、打工仔同絲打嘅歡迎，每逢午巿、放學、放工，總會排滿買外賣嘅客人，亦係宵夜首選，炒埋嚟食就更正喇！
6. 公仔麵
香港乜野都要「快、靚、正」，即食麵能夠喺短短3分鐘度煮成，既飽肚又美味。所以當夠彈牙嘅公仔麵遇上茶餐廳就一拍即合，成為本土飲食文化。即食麵幾乎可以配搭任何配料，例如腸仔、煎蛋、午餐肉；時間容許嘅話，大可以考慮「炒公仔麵」或「撈公仔麵」。香港人一年食幾多即食麵，答案係404.3億個。
5. 炒蛋多士
唔好以為炒蛋好容易。炒得好可以媲美當代藝術，因為佢係一種睇落簡單其實深奧嘅料理，雖然知道最主要嘅材料就是雞蛋、奶油、牛奶同鹽之類嘅配料，但係整得好真係要好畀心機。有d師傅炒蛋個陣，加入北海道3.6牛乳，整到唔止蛋香濃郁，仲有淡淡嘅奶味！仲可以加入黑松露，加個凍檸茶，就係一個完美嘅早餐喇！
4. 通心粉
要喺茶記食得輕盈，非快捷簡易嘅通粉莫屬。以叉燒通為例，上枱必須傳來熱湯香氣，湯底清淡微鹹，唔油膩；通粉大細都要適中，當然唔少得要彈牙，夠飽肚；半肥瘦嘅叉燒要軟腍，肉味濃，三者達致均勻適中。而因應香港特色，香港麥當勞都推出扭扭粉嚟擄獲大家嘅心，配埋薯餅就bravo喇！
3. 蛋牛治
蛋牛治應香港人「愛茶記」文化而生。所謂「蛋牛治」，就是雞蛋牛肉三文治的簡稱。好嘅「烘底」即係麵包必須烘得均勻金黃亮麗，軟硬適中，散發淡淡麵包香氣，風味高下從外觀已表露無遺。蛋牛治嘅牛肉最好用罐頭鹹牛肉，而且要即整即食，熱度一失就無哂魅力，所以千祈唔好外賣，記得一定要堂食。
2. 靚粥
早餐唔想食得太油膩，又想食得清淡︰粥就係最好嘅選擇。由白粥到生滾粥，各種口味都有。喺香港白粥同油炸鬼係絕配。生滾粥嘅迷人之處就在於入口即化嘅米粒，喺大鑊粥入面搯出少量粥到另一個較細嘅煲加熱後，再加入新鮮嘅肉類、海鮮或動物內臟等，就可以做到各式各樣，令人食指大動嘅粥品。
1. 麵包
麵包舖做得好，自然客似雲來。只要麵包架上琳瑯滿目，堆滿各式各樣的麵包，包身脹卜卜，香噴噴，都會吸引人排住隊買。當中最經典嘅有菠蘿油同蛋撻。冰火交融嘅菠蘿油，幾乎同香港劃上等號，為咗令平凡嘅甜麵包更美味，於是蓋上一層用豬油、砂糖等做成嘅黃金脆皮。其次係蛋撻，因末代港督吃過，讚口不絕而從此聞名中外。
分析說明：
本研究資料分析時間範圍為2018年1月11日至2019年1月10日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港人最愛嘅早餐 』相關文本進行分析，並根據網友就該議題之討論，作為本分析依據。
本文所調查之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :