笑爆呢個新年！
雖然經典賀歲片睇到就快可以調轉背出嚟！但新年最啱就係同親戚朋友排排坐睇賀歲片，仲唔驚會dead air㖭！今日DailyView網路溫度計根據香港經典賀歲片，透過網路大數據做咗個調查，一齊嚟睇下啦！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10. 長江7號
《長江7號》唔係淨係攪笑個噃！星爺呢套片係賣親子溫情嘅，因為小朋友要入場睇，所以戲中笑料比較含蓄，冇咗以前嗰啲狂笑抵死嘅對白。賀歲片一家大細睇，星爺出橋唔會冇方向嘅，話唔定想開拓新市場。套片由佢自編自導自演，名人效應下，仍大收5,000萬票房，係當年賀歲電影嘅票房No.1！
9. 富貴逼人
香港人食腦，拎呢套片出嚟就夠照，八、九十年代的《富貴逼人》原創到不得了。系列三套嘅製作都係刀仔鋸大樹，卡士唔多。電影由未係紅到發紫嘅高志森執導，由兩名已故的演員，董驃同肥肥沈殿霞孭飛，劇情笑中有淚，對白抵死。故事題材貼近生活，引起普羅大眾共鳴，唔開心嗰陣翻睇，咩笑容都返哂嚟！
8. 整蠱專家
《整蠱專家》，可以話係星爺嘅經典之作，睇完再睇都唔會厭！如果唔係，電視台都唔會播完又播，剩餘價值都可以同廣告商交代。套片由王晶執導，周星馳、劉德華、關之琳、邱淑貞、吳孟達等主演。當年票房高達3,000萬，亦算係新正頭唔去拜年，唔使等人拜，留喺屋企一個人都可嘻嘻哈哈嘅辦法！
7. 行運超人
真係唔怕生壞命，至怕改錯名。呢套戲千禧年上畫嗰陣，有好多內地團落嚟香港睇戲，食正中港融合條水，套戲本身就行運。跟住順便攞埋第23屆香港電影金像獎的最佳影片。賀歲片除了搞笑，都要賣下溫馨有啲內容；片中也不乏勵志情節。加理梁朝偉與楊千嬅主演，簡直無得輸！
6. 賭城風雲
楊州抄飯總有人叫，大路呀嘛！電影都係咁，劇本元素唔怕湊合翻炒，只要最緊要開心同爆笑。賭城風雲喺2015年上映，每集的公式都係搵埋多位巨星，等觀眾覺得抵睇過癮。劇中人星光閃閃，咁先畀觀眾覺得值回票價。一度參演嘅明星除咗周潤發，仲有劉德華、張學友壓陣，票房咁咪有保障囉！
5. 最佳拍檔
《最佳拍檔》係港產賀歲喜劇片嘅始祖，80年代初橫空出世。過年係人都想開心攞個好意頭，當年嘅新藝城就係咁食正條水，於是同邵氏、嘉禾三分天下。 過年，闔家歡電影就夠應景，而第一齣喺喺1982新年上畫，以票房勁收2,700萬哄動全港，以當年戲票平均約12元嚟計，入場人數高達217萬人次。
4. 衝上雲霄
吳鎮宇靠呢套片食餬，喺公仔箱竄紅。《衝上雲霄》原本係時裝航空電視劇，抄日本TBS電視台電視劇GOOD LUCK啲橋段，播出後效果唔錯，香港同大陸都有人捧場，至於電影版《衝上雲霄》唔算電視版嘅延伸，又唔係情節補遺。攞新年檔期，發咗新年財，勁袋2千逾萬，開心錢都幾好賺！
3. 家有囍事
真係橋唔怕舊，最緊要受！《家有囍事》唔知拍咗幾多集，就算喺電視台重播，唔知點解仲有一定收視率！咁多年《家有囍事》總要有粒粒巨星照住，除咗周星馳，仲有毛舜筠和吳君如。總之一齊搞笑，放爛gap，齊歡喜齊慶賀，然後同大家講句︰「恭喜發財」！香港人開心原來就係咁簡單！
2. 美人魚
《美人魚》套片係由周星馳執導嘅，投資咗成6000萬美元咁多。影片由周星馳自己一腳踢，總製片、監製、編劇和導演一手包辦。網友話睇《美人魚》好多特技效果，淨係咁張飛都已經收回成本。套片喺中國大陸上映12天，票房超已過咗人民幣24.8億，總票房最終超過33億㖭啊！認真犀利！
1. 喜劇之王
《喜劇之王》1999年上映咗後，一直咁等睇續集，而家新正頭，終於得償所願。 呢齣係由佢本人所主演的自傳式電影，同當時得令嘅靚女張柏芝擕手合作演出。雖然過咗10幾年，周星馳依然寶刀未老再嚟《新喜劇之王》，等到頸都長嘅朋友，記得睇下呢齣勵志嘅賀歲港片，入場開心下喇！
分析說明：
本研究資料分析時間範圍為2018年1月12日至2019年1月11日，約一年。
系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港經典賀歲片』相關文本進行分析，並根據網友就該議題之討論，作為本分析依據。
分享本篇文章
你可能也會喜歡這些文章 :