童年點可以冇咗佢哋呢！
細細個，一定都要帶d零食返學或者補習班，打開零食果吓，同學仔湧過嚟一齊開心share先有樂趣㗎嘛！上堂偷食更加係回憶嚟！今日DailyView網路溫度計根據大家童年嘅零食，透過網路大數據做咗個調查，一齊嚟睇下啦！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10. 動物餅
愉快動物餅當中最常食嘅就係牛油味同香港獨有嘅紫菜味，不過動物餅又點會得兩隻味吖！香港仲有蔬菜、紅豆、香蕉奶油及椰子味呢四種口味。除咗佢嘅牛油香味，愉快動物餅嘅最大特色係46種印有動物英文名稱嘅動物餅，可以俾小學生嘅我地邊食邊學生字，簡直係幫我地贏在起跑線嘅神器啊！
9. 點心麵
仲記得小息個陣，喺隔離傳來陣陣嘅炒麵同雞肉嘅香味，同埋「嗦嗦、啪啪」嘅聲音。唔洗望過去，已經知道佢哋係食緊童星點心麵。呢個時候，當然要M返幾條嚟食吓啦。除咗佢香脆可口嘅口感之外，包裝上嘅黃面人一樣勾起你我小學生活嘅回憶，一睇就認得佢係童星點心麵嘅「代言人」啊！
8. 媽咪麵
唔知你哋又有無試過一拎出嚟，個個就衝埋嚟懶好心幫你倒粉同碎麵，最後仲幫你食埋呢？網絡上好多人都會將同樣卜卜脆嘅童星點心麵同媽咪麵做比較。計我話，媽咪麵比同星點心麵好啲，就係媽咪麵食法夠多，成舊大啖食又得，壓碎食又得，加唔加調味料都得，得咗！
7. 魚仔餅
魚仔餅喺我心目中，係最適合上堂偷食零食排行榜嘅第一位。只有手指三分之一咁細嘅魚仔餅蘊藏住香脆嘅口感，邊個話偷食唔怕俾老師發現，就唔可以好好享受零食。見到綠色包裝紫菜味嘅魚仔餅，懷念嘅感覺立即湧上心頭。不過近年仲推出咗蜂蜜牛奶味同蕃茄味，記得心動不如行動，快D買返盒黎試下啦！
6. 百力滋
喺溫書溫到悶嘅時候，百力滋絕對係最佳之選。每攞一條，就可一啪啪啪啪咁食，徹底滿足我口痕想搵嘢咬，又唔想成日伸隻手去拎呢兩個願望。買百力滋嘅時候，我哋有好多選擇：唔同國家、牌子、口味、長短、粗幼，迎合唔同人嘅口味。喺咁多款裡面，最有熟悉感嘅，就當然係香港出品嘅甘大滋啦！滿載住香港人嘅回憶啊！
5. 魷魚絲
我地由細到大都就佢做魷魚絲，其實我地都誤會左佢，佢係鱈魚絲。佢細細包l裡面有好多條，但已經夠我地食唔停，係同同學開心Share嘅不二之選，每次一開都會吸引好多同學，逐個逐個喺櫃桶底傳。每一條鱈魚味道香濃得黎又唔會腥，入口後鱈魚味道好快融入口中，仲好有咬口㖭！
4. 爆炸糖
爆炸糖口味有十幾種，大多為果味，隨著唔同口味會有唔同顏色。喺超市裡面排列住五顏六色、色彩繽紛嘅爆炸糖。令人不禁想儲齊咁多隻色啊!一包入面有十細包，每次一包好方便。放入口裏面，糖粉會溶化，噼噼啪啪咁爆開，帶俾我地好過癮嘅爆炸刺激口感。
3. 威化餅
威化餅係好多人嘅經典零食之選，鮮色嘅小包包裝，掀起人們嘅童年回憶。香脆鬆化嘅威化條，每條都有幾層，每一層都由餅乾包住甜甜嘅餡。威化餅有十幾種口味，最經典就當然係花生、朱古力同士多啤梨。用傳統食法成個食勁鬆化，不過都可以分開一層層嚟食，又薄又脆，別有一番風味。
2. Oreo夾心餅
講到食朱古力餅乾，就當然係食OREO啦!Mcdonald、KFC買嘅雪糕都係用緊Oreo嘅曲奇架! Oreo用香濃朱古力餅乾，以幼滑雲呢拿做夾心，令到我哋可以有雙重享受。夾心方面Oreo有推出經典嘅雲呢拿、士多啤梨同朱古力味。「擰一擰、舔一舔、浸一浸」，OREO 為咗迎合追求新鮮感嘅香港人，不斷提供唔同食法同享受。
1. 珍寶珠
仲記得細個上堂細個答啱問題，或者默書攞高分，老師就會獎同學食珍寶珠。根據美國學生測試，食完一支珍寶珠要舔足足2056次。食珍寶珠要慢慢細味，最好就唔好小息或者上堂食，有排都食唔完。一支棒加入糖果裏面，唔怕整到手笠黐黐。口味多達33種：可樂味、士多啤梨味、牛奶味……等等。
分析說明：
本研究資料分析時間範圍為2018年2月6日至2019年2月5日，共一年。
系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『童年零食 』相關文本進行分析，並根據網友就該議題之討論，作為本分析依據。
分享本篇文章
你可能也會喜歡這些文章 :