你的禮物如何 你的日子也必如何
又到一年一度嘅情人節，俗語有云：「無分手嘅要準備禮物，無禮物嘅要準備分手」。各位喺情場打滾咁多年，有咩禮物未收過？最怕你收到厭啫，今日DailyView網路溫度計根據情人節禮物，透過網路大數據做咗個調查，一齊嚟睇下啦！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10. 化妝品／護膚品
對於男友來講，有一個鍾意打扮嘅女朋友，除咗代表對方會注意自己儀容之外，最大嘅福音莫過於可以直接明瞭知道女友鍾意乜化妝品/保養品品牌。實行喺情人節直接買懶人包咁買個禮盒俾女友。尤其女友係身邊講咗不下數百次嘅唇膏色號，有好多男仔都會選擇喺情人節表示一下自己「細心」嘅一面，買來送俾對方做禮物。
9. 寵物
喺甜蜜嘅熱戀期，少不免想要為兩人之間增添一些共同責任，喺未養得起一個B嘅年紀，或者會選擇養個寵物作為兩人之間「愛嘅結晶」。不過記住要做個負責任嘅主人，養寵物係一個對毛孩一世嘅承諾。唔養貓唔養狗，其實可以考慮下送寵物魚，照顧成本同埋時間需求都比較低，送俾對方都比較無負擔啊嘛。
8. 3C產品
呢個世代幾乎撇除唔到對3C產品嘅需求，踩地雷機率幾乎為零，非常多選擇！無論係對方（暗示性）講咗幾次想換電話，定還是買一對smart watch作另類情侶配搭，簡直就係送禮送分題。雖然女仔唔多唔少都會期待情人節禮物比較有浪漫意義，可能會覺得3C產品反而太過實用無乜feel。
7. 衣服
有時男仔送禮嘅腦迴路都會唔小心「將心比心」，可能係因為如果男仔收到自己追開嘅潮牌嘅衫會好開心啦，所以其中一個收到膩嘅禮物少不了衫。若然係可以搭配過嘅情侶撞色衫都仲可以街拍放閃下，但男友們，喺情人節就唔好送運動衫啊、運動外套啦，咁實用嘅嘢就留返生日先送啦。
6. 配飾
女人有時鍾意買貴嘢來寵愛一下自己，但係收到男朋友嘅心意又係另一回事，尤其係令女方再三思量，都唔捨得落手嘅名牌手袋。細心嘅男仔大多數都會係咁上下月份，開始留意女友嘅購物模式，花啲時間同女友行街window shopping，留意下有無咩手袋/配飾係對方想買好耐又唔捨得買，喺情人節俾對方一個「驚喜」啦！
首飾
首飾應該都算得上情人節收到無驚喜嘅禮物，不過當然啦，咩牌子同埋戴喺邊嘅首飾都有好大分別嘅，點知男友會唔會咁出其不意送隻求婚鑽戒㗎？大部分情侶都會揀喺情人節紀念一下戀情，互送對方情侶戒指啊、情侶頸鏈啊等等...…紀念意義大於飾品實質嘅價值，不過若然可以送女方嘅心水牌子就仲perfect啦！
4. 朱古力
廣告都有得你睇，喺呢個浪漫大過天嘅日子有花有禮物，點可以無甜到漏嘅朱古力呢？送朱古力學問可以好多，貴有貴送，平有平送。要show吓taste嘅話，男友可以去專門店揀高質嘅朱古力。另一邊又好適合臨急抱佛腳嘅男仔，真係乜都無準備嘅話，起碼都可以去超市揀返盒朱古力，唔至於去見女神嘅時候兩手空空啊嘛。
3. 請食飯
有好多比較理性消費嘅情侶，或者都已經拍咗幾年拖嘅老夫老妻，都會講好過節唔使對方送好貴嘅禮物，反而揀一間平時唔會去嘅高級餐廳，喺呢個特別嘅日子奢侈一下。雖然話就話男女平等，不過浪漫主義嘅鼓吹下，男方都會自覺要負擔情人節晚餐嘅花費。所以話男友唔使揀禮物咋，都要花啲心思揀一間好餐廳請對方食飯。
2. 旅遊
隨著時代進步，成日都話女人有能力，可以隨時買自己鍾意嘅嘢，唔使等大時大節等人送，所以送禮嘅風向都轉變成，送一個無與倫比嘅體驗仲驚喜。好多情侶都會夾埋情人節前後嘅週末嚟個小旅行，創造一下美好回憶。同時亦係俾男友們開外掛嘅機會，索性上網出張飛機票俾女友揀目的地，連行街嘅時間都慳返啊！
1. 送花
肉麻老土係一回事，不過送花依然係好多男女心目中標示浪漫嘅最高準則。呢個年代送花已經唔係講求實用，而係俾女方炫耀嘅效用。尤其眾多男友最驚就係啲女人口中話「送花嘥錢啊，唔使送啦！」但係若然唔送，而隔離位嘅Mary收到一大扎花的話，女友又轉頭計較男友失職，所以花店係情人節真係唔怕無生意做。
分析說明：
本研究資料分析時間範圍為2018年2月11日至2019年2月10日，共一年。
系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『情人節禮物 』相關文本進行分析，並根據網友就該議題之討論，作為本分析依據。
分享本篇文章
你可能也會喜歡這些文章 :