政治要正確，英雄好鬼索！
image idea source ：LIHKG Post
近年電影取材偏好「政治正確」都唔係咩新鮮事，拎獎又係嗰D題材，多人討論又係嗰D題材。你話你支持？仲問返我支唔支持？咁我實答你「me too」啦！依家香港地唔可以亂take side，好似Marvel都要出女英雄擔正嘅戲啦！嗱！今次DailyView網路溫度計同你講嘅嘢就唔關男女權事嘅，就單純用網路大數據嘅調查下英雄類嘅戲，咩女角色最多人討論啦！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source ：閃文聯盟(劇照)
10 有事要求救？唔使Batman嘅，仲有……
Batman就聽得多，但其實仲有個Batwoman架！無耐之前，呢位角色仲係DC嘅劇集入面，由霸氣女星Ruby Rose（露比·蘿絲）演出，似乎DC係想試試水溫，話唔定將來仲會有一套新嘅連續劇添。佢做呢個角色，相當入形入格。嗚呀，真係好值得期待！
9 悲劇嘅女英雄，種族嘅倖存者
「銀河守護隊」成員之一Gamora，自從由拉丁裔美女Zoe Saldana（柔伊·莎達娜）演出之後，受到好多網友嘅注意。Gamora不論喺漫畫同電影都一樣咁悲慘，成個種族死剩得返佢一個，真係好無陰公。雖然呢位角色全身綠色，似乎先天劣勢並唔討好，但呢種掩護色埋沒唔到柔伊·莎達娜嘅演技，大家都一致好評！
8 Mera隨時勁揪過尊尼特普！
《水行俠》上映後叫好叫座，成為第一套全球票房突破10億美元嘅DC系列電影。不過唔講大家又知唔知，演女主角Mera嗰位Amber Heard（安柏赫德）係Johnny Depp嘅前妻，之前仲傳出佢告Johnny Depp家暴啊！不過最近就峰迴路轉，Johnny就反告Amber先係施暴者！嘩！真係睇得又打得！入得武堂又出得廳堂！
7 此Wonder非彼Wonder，呢位Girl你知唔知？
黃子華曰：「Wonder woman有條罅，她用Wonder bra～」Wonder woman我地由細聽到大，但另一位同姓嘅Wonder girl，我地或者就聽得好少啦。佢首次係漫畫《神力女超人》第二卷登場，好打到根本唔係人，因為佢係半神，希臘神宙斯嘅女！我哋可以想像，佢隨時同Gal Gadot-Varsano（蓋兒·加朵）一樣咁索㗎！
6 超人之外仲有個超女？點解排名咁高嘅？
唔知大家聽過超能女孩(Power girl)未？超能女孩係DC漫畫界其實非常出名，初次喺《全明星漫畫》登場，同超人一樣咁好打，被列為100位漫畫角色入面排名最性感女角嘅第8位。當你好似我咁留心睇睇佢個樣，加埋豐滿嘅上圍，修長嘅大腿……啊，真係師父，明白了佢個排名啦。
5 你樣子如何，你的日子其實不必也如何
新鮮滾熱辣嘅《Marvel隊長》，當初選角公布嗰陣，好多網友都插過幾句，話點解呢個女主角唔搵個好似DC電影咁索咁靚嘅女仔做，睇落著到套衫咁肥佢係咪真係打得架？而家《Marvel隊長》上映之後，唔少人都話Brie Larson（貝兒·娜森）不愧攞過金球獎，果然演得相當唔錯喎！
4 係男人都想同佢拍拖，GFable到爆！
《復仇者聯盟2》出現嘅緋紅女巫，Elizabeth Olsen（伊莉莎白·歐森）性感嘅身材，精緻嘅面孔，呢種甜心可愛型嘅女性，真係非常咁GFable，好想同佢瘋狂拍拖.......相對其他人，佢戲份唔算好多，好多時其實都只係一位配角咁，但都能夠名列第四名，就知佢有幾吸引啦！
3 最正嘅貓女郎？緊係Anne Hathaway
今時今日喺香港地一同人講起Catwoman，呢一位性感貓女郎先啱。咁相信大家都即刻流哂口水。Anne Hathaway（安海瑟薇）身穿一套摩登黑色嘅緊身衣，盡顯佢苗條、修身嘅性感身材，加埋佢野性咁同Batman「溝」通，唔止成功係戲入面溝到高富帥，仲順手俘虜埋萬千巴絲打嘅心㖭。
2 瑪歌·羅比完美化身小丑女
自從《自殺特攻》（Suicide Squad）上映之後，好多人討論小丑女，原因無他，Margot Robbie（瑪歌·羅比）靚囉！正囉！性感囉！佢同拍Wonder Women嘅Gal Gadot（蓋兒加朵）邊個索D，一直都廣受LIHKG巴打討論，好多巴打都只可以大叫「我全都要」！但原來喺成個香港，小丑女係多人關注D。喂！咁下年要套《猛禽小隊》（Birds of Prey）就唔好錯過喇！
image souce：ettoday（劇照）
1 Marvel首位女神史嘉蕾
黑寡婦呢個角色，自從史嘉蕾·喬韓森（Scarlett Ingrid Johansson）喺《Iron man》入面驚艷登場之後，幾乎係大家每次睇Marvel電影嘅一大期待。原因無他嘅，因為佢靚囉，靚到成為marvel電影第一位令人留下深刻印象嘅女星，話佢係女神，實係無得駁！聽聞之後由Scarlett Johansson（史嘉蕾·喬韓森）擔正嘅黑寡婦獨立電影，仲有機會搵埋Emma Watson（艾瑪·華森）一齊演出，兩大美女同台，真係叔叔不行鳥！
image souce：nextmag（劇照）
分析說明：
本研究資料分析時間範圍為2018年03月03日至2019年03月04日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『DC、Marvel系列最正嘅靚女 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :