香港網路文學，熱捲港台澳馬
群雄逐鹿，試問今日誰能問鼎香港網路文壇？近呢十年，香港文學掀起咗新嘅浪潮，真係成個亞洲都有人睇！邊個話文學一定係好悶好嚴肅無人睇得明？除咗教科書，我哋仲點樣接觸文學作品？無錯，呢個就係網路媒體喇，好似高登講故台咁，聚集咗一堆出色嘅網路文學作家，吸引成千上萬嘅讀者，仲出埋實體書，拍埋電影。香港人最鍾意踩自己人，不時都批評香港係文化沙漠，但其實香港都有好多新生代寫得又拍得，係網路自成一個世界。香港網路文學發展咗咁耐，咁到底今時今日邊幾個文豪最多人講？今日就等DailyView用網路大數據話畀各位知，香港網路十大文豪係邊個喇！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10 大埔名人，Mr. Pizza
Mr. Pizza同向西村上春樹差唔多時間喺高登講故台寫文，佢寫嘅《那夜凌晨，我坐上了旺角開往大埔的紅VAN》，簡直成為全港網路界嘅熱門事件。就算網上有得睇，喺2012年出版嗰陣，仲賣破過萬本。陳果改編埋做電影，係2014年上映，仲入選第64屆德國柏林國際電影節。Mr. Pizza近年都仲有寫小說，好似《1984》咁，大家有興趣要睇埋喇！
9 同林夕合作，Middle
神秘嘅Middle，很少露臉，冇咩是非，但係紅遍台港澳，可以話係香港網路作家嘅長青樹。2006年開始寫Blog，直至今日已經過百萬fans，出版過多本散文、小說集，最出名嘅緊係要講佢同林夕合作嘅《閉起雙眼你最掛念誰》喇！哇，林夕喎，真係好多人想同佢合作都恨唔到架，但Middle就做到。十七個故仔，十七首歌仔，邊讀邊聽，真係好鬼感動！
8 鳥不起，張晨
張晨自稱唔係作家，但就我哋嘅統計，佢絕對係一位出色嘅香港網路作家。張晨最初喺高登講故台用「"鳥"不起」做網名，2010年寫咗篇大受歡迎嘅故仔《18歲的野比大雄》，2014年仲正式出埋書！另外一個都出名嘅故，就係《封鎖維園年宵，來一場死亡遊戲》，都出埋書。兩篇故仔題材都好特別，風格偏暴力血腥，吸引咗好多巴絲打一直支持。
7 屈機文學，阿暖
文學可以有幾屈機？屈機到自己搞咗一個網路出版平台「暖鳥出版」囉！阿暖寫開長篇小說，最出名係玄幻仙俠作品《黃泉逆仙錄》，紅遍各大論壇同文學網站，實體書銷量破千。之後2016年開始係刊登嘅《重煉傳說》，連續十二個月佔據「紙言」人氣榜第一名，高登、連登累積正評破千，都咪話唔勁。佢最近仲不斷連載緊，大家仲唔去支持？
6 90後小女生，不朽
要講近排最爆紅嘅香港女性作家，一定係不朽！佢最初係IG寫文，只係為咗抒發自己嘅人生感受，記錄生活，估唔到持續一排之後，愈嚟愈多讀者。第一部作品《與自己和好如初》，正係佢患上憂鬱症嘅時候，書寫化成治療之筆，令好多網民都有所共鳴。2018年出版《想把餘生的溫柔都給你》，繼續坦誠咁面對自己，書寫人生，成為新一代最年輕嘅網路作家。
5 產量之最，孤泣
唔講都唔知，孤泣已經出版咗六十幾本小說！單以呢個出版量，已經係其餘咁多位作家加埋都比唔上嘅數目。孤泣2007年以創作的歌曲《水泡》攞獎，2009年開始係網上寫小說，偏向愛情與懸疑為主，最廣為人知嘅作品係《殺手世界》。2018年由孤泣創作創作小說改編《已讀不回》電視劇喺ViuTV播放，入哂屋，名列排行榜喇！
4 風流文人，張飛人
張飛人嘅緋聞好多，亦都一度鬧上法庭，但我哋今日講嘅係佢嘅小說，唔係佢份人。張飛人產量唔多，但有篇小說喺高登講故台好出名，叫做《嫖一次，讓我的一生變得糜爛不堪》，內容係講主角因去東莞嫖妓，而導致佢嘅一生遇上好多問題，無法翻身。甜故總係特別受歡迎，小說亦都食正香港男人嘅私生活文化，難怪都仲有人提起佢嘅。
3 香港型男，藍橘子
藍橘子已經出版咗十五本小說！無錯，真係著作等身，產量極高嘅網路作家。藍橘子最初喺高登討論區寫故，最出名緊係《我是技安，今天我出席了大雄的葬禮》，改編自日本漫畫《多啦A夢》，二次創作，受到勁多網民嘅關注。唔止文字了得，佢同時係電影與漫畫嘅編劇，以勤力計，以才華計，都絕對係超一流水準。第三名，實至名歸！
2 小姓奴，唔係小性奴
近年小姓奴真係是非纏身，相信連唔係佢讀者嘅網民，都聽過佢個名！咁小姓奴最初以「中出即飛俠」喺高登寫甜故，之後再用「小姓奴」一名，最為廣為人知。其他筆名包括「2nd Joe」、「于日辰」、「林俊傑」等，每次用新嘅分身出故，都依然大受歡迎，好有才華。佢2011年出版嘅《小甜回憶錄》，更係網路出版嘅先行者。佢嘅《一獄一世界》更被翻拍成電影，係第二名喇！
1 香港之顛，向西村上春樹
日本有村上春樹，香港有向西村上春樹！2011年，向西喺高登講故台發表《東莞的森林》，講述香港人去東莞叫雞食嘅故仔，題材獨特，幽默搞鬼，即刻大受歡迎。之後仲出埋書《一路向西》，2012年將《東莞的森林〉拍成電影都係叫《一路向西》，累積近2000萬票房佳績。向西其後一路筆耕不斷，出版《雜文西》、《向西聞記》等著作，都大受好評，真係無愧網路文豪之名！
網路文學力證香港絕非文化沙漠
香港一直俾人話係文化沙漠，根本就無咩藝術歷史咁喎，又話新一代唔睇書無學識咁，但事實又係咪咁呢？世界不斷咁變化緊，或者我哋轉個方向想，其實網路文學都係香港本土文化，有好多地方值得欣賞，亦都盛載咗香港本土特色、歷史同語言。如果我地咁樣睇，就知道香港其實仲有好多後生仔，係有睇書嘅，只不過係閱讀形式轉變咗啫。一時代有一時代之文學，我哋又點樣可以批評呢種網路文學無價值呢？今次我地細數呢十個香港網路作家，見到佢地寫得咁鬼出色，又受咁多讀者歡迎，真係力證香港根本唔係文化沙漠！
分析說明：
本研究資料分析時間範圍為2018年03月20日至2019年03月19日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港十大網路作家』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :