五月天，為香港蓋一座城堡
──我們在小孩和大人的轉角，蓋一座城堡
當初青春無限嘅你，進入社會後，變到依家一年十二個月都忙碌、奔波，為嘅只係養家、糊口，同追求一個可以令自己同屋企人棲身嘅安樂窩。漸漸麻木嘅過程，夢想回歸到簡單平凡。明㗎！香港地，就連生活最基本嘅衣食住行都係壓力來源，當平凡生活都成為奢想，咩希望都好似無晒。但我知你相信夢想，亦相信童話，因為支持住你嘅，就係一個活生生嘅夢想──五月天。佢哋唱出你嘅人生，安撫、鼓勵你，陪你喊過、笑過、鬧過……，直到你釋懷。仲記唔記得屬於五月嘅約定？上年5月到依家，你心情係懷念定期待？等Dailyview用網路大數據同你回顧上年五月天香港演唱會得意位，同埋講吓香港五迷最期待今年演唱會嘅嘉賓啦！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source：FB/五月天
五月，天空下你哋同步嘅歌聲
你都已經唔記得咗，喺邊一日，邊一個地點，無意聽到一首歌、一句歌詞、一段旋律，令你認識咗五月天；但你記得你哋嘅約定，每年嘅五月，都要喺同一天空下，香港依塊土地上，一齊呼喊出熟悉嘅歌曲。當很多首陪你渡過人生高高低低嘅歌響起，就好似重歷當初嘅時光，慢慢，你舉高隻手，伸出五隻手指，隨住音樂揮舞。呢一刻，五月天屬於香港，屬於你。
我和我驕傲的倔強，我在風中大聲的唱！
有人話五月天好似邪教咁，經過咁多年演唱會，五迷們已經設計出一套嘅應援動作，唱《知足》嘅時候全場開住手機閃光燈、唱《戀愛ING》嘅時候會跟住阿信做出L.O.V.E.手勢、唱《溫柔》嘅時候，阿信會叫大家打通電話比愛嘅人。到咗演唱會尾聲，ENCORE係一定要㗎啦，依個時候某個區域嘅五迷就要發起人浪，一個人傳一個人，直到全場變左一場大型人浪為止！五迷咁熱情，五月天你唱多首歌俾五迷聽啦！
木訥的洗衣機，它的唯一關心，是何時放晴
「LIFE人生無限公司演唱會」香港演唱會最終場當日正正係一年一度嘅母親節，五月天帶嚟為媽咪而寫嘅《洗衣機》，用洗衣機表達媽咪咁多年嚟嘅默默付出。媽咪就好似洗衣機咁，雖然無電視機嘅吸引、亦無咖啡機嘅貴氣，但始終都係無間斷地為家庭付出。唱完歌五月天仲貼心提醒大家，記得要返屋企同媽咪傾吓謁，關心吓媽咪啊！另一方面其實五月天都有好多死忠歌迷，由少女時代開始追隨五月天，到依家已經做咗媽媽喇！五月天透過依首歌表達對媽媽，對歌迷既感激，真係好感動啊！
怎麼去擁有一道彩虹？怎麼去擁抱一夏天的風？
每年嘅五月之約，五月天都帶住滿滿嘅青春回憶同歌迷見面，等歌迷喺連續幾晚嘅歌聲當中，做一場好長好長嘅美夢。2018年五月天唔單止帶俾歌迷代表夢想嘅歌曲，仲帶埋大家去到童話樂園迪士尼做場徹徹底底嘅美夢！「天上的星星笑地上的人，總是不能懂，不能覺得足夠」，五月天喺迪士尼編織咗彩虹般絢麗嘅星空俾歌迷，仲邀請埋大家童年時嘅偶像——米奇同米妮，一齊共度依個咁夢幻嘅夜晚。咁感動嘅一刻要點樣收藏，點樣擁有？當然就係同五月天，喺夢幻嘅樂園入面，伴隨住晚風全心全意細味歌聲，細味青春。
5 陳綺貞
──私奔到月球的某個地方
2007年，五月天要離開地球表面，否定地心引力嘅同時，太空瀰漫著青澀、甜蜜嘅愛情，因為阿信同陳綺貞私奔到月球。當年兩個人怕怕醜醜，陳綺貞連同阿信對望、拖手都唔太敢，完美演釋初戀嘅味道；依家，一個係天團主唱，一個係文青歌后，兩個人老友鬼鬼，對唱互動多咗絲絲熟悉，但仍無改當年泛酸嘅青春戀愛味道！香港五迷都好想睇你哋現場啊！
4 田馥甄
──唱出一首五月天，讓夢繼續鮮豔
五月天係台灣「第一天團」，S.H.E係「台灣女子天團」，當年大家都青春無限，就似「剛誕生的夏天」，努力、奮鬥，展望住未來，驚喜「夢開始要鮮豔」。佢哋嘅歌隨住「台風」盛行，遍及成個香港，走到邊都可以聽到佢哋嘅歌。感激，五月天依然係五月天，S.H.E都仲係S.H.E。佢哋感情無變，我哋嘅青春回憶就會不斷延續，希望佢哋可以一齊嚟香港啦！
3 蕭敬騰
──從不曾忘記，活在我心深處那頑固的自己
五月天，慢慢從地下行到主流，從普通樂團去到天團，一步一腳印，朝住夢想而堅持向前；而蕭敬騰，當年喺《星光大道》上面落下不甘嘅眼淚，為嘅係好純粹嘅音樂夢想，直到到依家成為歌王。五月天，依然努力做緊自己鍾意嘅音樂，以歌曲分享、表達所有諗法；蕭敬騰，就算重病唱唔到歌，寧願走晒音都堅持表演。對夢想嘅硬頸，香港人好需要！
2 蔡依林
──就等你的一個眼神，就能為你長征
成個五月天得返阿信一個單身，五迷梗係好想阿信快D可以搵到另一半啦！最近我哋嘅主唱大人同蔡依林Jolin互動連連，喺Facebook同Instagram不斷留D充滿想像空間嘅emoji同句子，搞到兩邊嘅fans起晒哄！仲有人發現、整理出唔少蛛絲馬跡，證明兩個人熱戀當中啊！雖然兩個人都分別否認戀情，但fans們梗係少理，只係想佢哋一齊嚟香港唱首《戀愛ING》啦！
1 周杰倫
──昨天太近，明天太遠，默默聆聽那黑夜
周杰倫同五月天，係好多人嘅青春、人生，總有一兩段時光，係由佢哋嘅歌阿伴走過，回憶、情懷總係滿滿。當回憶走到現實，泛黃嘅傷感少咗好多，反而佢哋老友鬼鬼嘅互動，令人好似感覺到以往困難都只不過係依家一兩則笑話。之前阿信真假Instagram帳號，帶俾班fans同大眾唔少笑料，令人更加期待佢哋演唱會可以同台，唱吓歌、搞吓gag！「周五」，一星期都期待！
分析說明：
本研究資料分析時間範圍為2018年4月22日至2019年4月23日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『五月天香港2019演唱會』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :