明星有人權，觀眾要尊重
喺香港地做明星，相對起其他地區嘅公眾人物，好似特別無私隱咁。其實，明星係成為明星之前，都係一個人。既然係咁，都好應該有正常嘅人權，例如唔好隨意俾人偷拍，拍到連更衣室換衫都俾人擺上網。又或者同其他人拍拖，男女老幼，都唔會影響到其他人，現代戀愛自由，咁又有咩所謂呢？有唔少人都講，今時今日嘅網路世界已經令每一個人都變做判官，刻薄批評，惡意指責。如果佢唔係明星，件事又點會俾人放到咁大？今日DailyView就細數近年明星十大無辜被插嘅經典事件，同佢哋加加油！
DV小教室：香港網路大數據觀測咗近萬個網站頻道(而且不斷增加ing)，包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source：myloveandylauworldtour
10 吳若希大笑遭圍插
其實，笑又有咩問題噃？
2019年吳若希參加TVB《勁歌金曲頒獎禮2018》，同當時盛傳同佢爭做一姐嘅HANA菊梓喬坐埋一齊，係聽到HANA攞獎嗰陣大笑咗慶祝。但勢估唔到網民批評佢笑得太假，若希式恥笑，偽人到不得鳥喎。吳若希同HANA之後接受訪問，就講返件事，話當大家以為佢哋不和，無論笑定唔笑都會俾人批評。咁面對咁難折嘅局面，笑，可能已經係最好嘅表達喇！
9 批評何天兒疑似爺孫戀
錢我就大把，我要初戀呀
何天兒，原名何傲兒。佢2007年參加香港小姐正式進入娛樂圈，簽約做TVB藝人拍劇，但佢廣受討論嘅事，係當時25歲嘅佢同76歲嘅富豪林建名譜出爺孫戀！好多網民都批評佢哋關係唔太健康，只係為咗名利同肉體咁話喎。但愛情嘅嘢，真係好個人嘅，邊個可以限制戀愛自由？林建名曾經為何天兒流下真情淚，嗰刻，我知道佢哋之間係有真感情嘅。
8 陳冠希機場被偷拍
藝人都要係人，要尊重佢哋
陳冠希一向真性情，成日特立獨行，搞到惹下咗無數是非糾紛。2019年3月，佢喺機場發現有路人偷拍佢。哇，問都無問過就俾人偷拍，咁真係佛都有火啦。陳生即時走埋去阻止呢位路人拍攝，都係正常不過嘅事。不過呢條影片流傳網路，好多網民都話陳生冇修養，總之出手就唔啱喎。其實做藝人唔代表唔需要俾人尊重，俾人偷拍，心情唔好發火，都係情有可原。
7 指責袁偉豪合照後變臉
影完相係咪仲要Keep住笑？
型男袁偉豪2007年參加香港先生勝出，其後不斷拍攝港劇，開始慢慢廣為人知。正所謂樹大招風，人愈紅，就愈容易受到批評。袁偉豪最近同Fans合照，結果俾個Fans將呢件事放上網路，力數袁偉豪合照之後，表情即刻180度轉變，好無禮貌，只係識扮大明星。大佬，同你合照已經唔係義務，影完仲要服侍你，會唔會太大諗頭？袁生呢件事真係好無辜呀！
6 恥笑謝霆鋒做大廚
搵食啫，犯法呀？
謝霆鋒唔止唱得演得，近年仲要撈埋飲食，做埋大廚咁話。佢喺2014年拍攝中國節目《十二道鋒味》，大廚身分教人煮嘢食，不過就被唔少網民恥笑佢嘅廚藝，質疑佢根本唔專業。其實謝霆鋒喺飲食方面好比心機，2015年開設「鋒味By Beyond Dessert」曲奇餅店，最近又斥資數百萬在北京長安街建鋒味實驗室研發美食。謝生做得咁認真，整美食啫，犯法呀？
5 蘇永康為朋友出聲
連自己首新歌都唔出住
「安心出軌」已經係目前2019年最火爆嘅事件，勢估唔到，竟然燒埋許志安嘅兄弟蘇永康喎。事源係蘇永康喺鄭秀文IG原諒許志安嘅Post留言，大意係支持佢哋。咁作為佢哋嘅好朋友蘇永康會支持，其實好正常，亦都係一件體貼嘅善意行為。但係好多網民直接喺下面暗指佢無資格留言，話佢同許志安都係同類，犯過錯咁。蘇生今次認真無辜，為朋友留句言都要俾人圍插。
4 陳奕迅分享會不受尊重
學生玩手機又亂問嘢
2019年3月陳奕迅喺香港公開大學舉行「L.O.V.E. in F.R.A.M.E.S. 大專巡迴分享會」。咁呢個分享會首先播出咗相關嘅音樂紀錄片，但聽聞當時在座咁多位學生，都係玩緊手機，完全無尊重過條片。直到陳奕迅同DUO Band出場，問答環節嘅時候，頭兩位學生都只係話想合照，完全唔係問相關問題。難怪陳生無同大家大合照啦。事後，竟然仲有網民話佢小氣，真係好離譜！
3 張柏芝第三胎保密被罵
其實生仔真係唔關外人事嘅
張柏芝，香港一代青春女神，香港八九十後嘅集體回憶，傳奇嘅愛情史，全部都係網民不時翻炒嘅熱門話題。其中，佢同謝霆鋒大廚嘅離離合合，緊係成為大家茶餘飯後嘅吹水事件啦。自從佢2011年正式同謝生離婚，2018年生咗第三胎男B，令到全世界都好好奇，到底老豆係邊個呢？張柏芝一再保密，但就有網民因為咁插佢。張柏芝都有自己嘅私隱，唔係事事都要同人講嘅。
2 鄭欣宜身形受攻擊
不要低頭，光環會掉下來
鄭欣宜咁多年嚟，都冇咩觀眾緣，成日俾人喺網上奚落，仲攞佢身型嚟做攻擊武器，人哋女仔嚟㗎，你估真係可以唔介意咩。當成個香港都拎佢變肥變瘦嚟做新聞，你諗吓個壓力可以幾大喇！好彩欣宜諗通咗，唔再在意唔友善嘅目光、言論，就好似佢首《女神》嘅歌詞：「人類看不起，我都好看。」放低標準審美觀嘅壓力，勇敢做自己，為自己而活。
1 劉德華填海論
唔好因為一個意見，否定半世誠懇勤勉
劉德華一直嘅形象都好好，好到有「民間特首」嘅稱號，喺香港，「劉華」仲更係勤奮努力嘅代名詞。但喺上年年尾，劉德華義務幫團結香港基金嘅《讓下一代看見》做旁白，出聲撐東大嶼填海計畫，俾人狂數咩都唔識亂咁講，聲名一夜間變到好不堪。其實大家立場可以唔同，但唔應該因為咁而否定優秀人格，一單還一單，劉德華喺好多方面都係一個榜樣。
切勿跟車太貼！停一停諗一諗
語言文字，就好似一把利刃咁，除咗令當事人受傷，仲可能波及其他無辜嘅受害者。我哋不時都係網路上見到有好多爭議性嘅事情出現咗，大家即刻狂插狂話，講到對方一文不值咁。但當幾日之後真相大白，先發現自己惡意嘅指責同批評，已經傷害咗無數咁多人，即係炒哂車。所以我哋先會講唔好跟車太貼，講嘢之前，停一停諗一諗，造成傷害之前，要好好小心自己嘅言行。因為，我哋話唔定都有一日，成為呢類型事件嘅主角，記得要將心比己！
分析說明：
本研究資料分析時間範圍為2018年05月01日至2019年05月02日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『十大受網民惡意指責的明星事件』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :