武林至尊，寶刀屠龍
華文武俠小說嘅泰斗金庸先生，喺去年仙遊，離開咗香港呢個充滿風雨恩仇嘅江湖。金庸曾作一句對聯總合佢精彩嘅武俠小說作品，「飛雪連天射白鹿，笑書神俠倚碧鴛」，相信大家都對呢十四本經典嘅文學巨著熟背如流。咁講到一直俾影視界不斷翻拍嘅作品，就係金庸武俠三部曲，《射雕英雄傳》、《神雕俠侶》同《倚天屠龍記》喇！由文字到影像，由書本到電視，金庸嘅魅力令一代又一代嘅香港人痴迷著狂，直到今時今日喺各大論壇都Keep住有月經Post，討論熱絡一如昔日。最近2019嘅《倚天屠龍記》劇集播放，令呢個金庸話題更加如火如荼，唔知你又點評價呢套翻拍劇呢？今日DailyView細數五大曾經演出張無忌、趙敏嘅明星，睇完之後再嚟睇吓最鍾意邊個喇喂！
image source:电视剧《倚天屠龙记》官方微博
張無忌演員，五大男明星
5 大眼Q版曾舜晞
──繁花落盡我願埋名隱姓 給你安穩
依家就播緊中國大陸2019年嘅《倚天屠龍記》，即刻引起城中熱話，當中梗係少不免討論吓選角問題啦！今次嘅男主角張無忌係由曾舜晞飾演，眼大大，青靚白淨，就好似漫畫入面走出嚟嘅人咁啊！佢之前喺《擇天記》嘅唐三十六同《快把我哥帶走》入面嘅時分，都以可愛活潑嘅形象收穫一班迷妹，今次用認真mode拍《倚天屠龍記》，自然有大把人支持啦！
4 七情上面馬景濤
──刀劍若夢 恩怨似風 有沒有輕重
由台灣民視喺1994年拍嘅《倚天屠龍記》，由金庸點名稱讚嘅楊佩佩執導，以當時台灣當紅小生馬景濤主演張無忌。依版嘅倚天，由台灣紅到返大陸，喺兩岸風靡一時！馬景濤喺劇入面，收斂咗佢拍「瓊瑤劇」對愛恨嗰種「咆哮式」表演方式，而係一人分飾張翠山、張無忌兩父子，文戲武戲都落足演技。所以中港台好多八十後都話，依套倚天係經典。
3 青春影帝梁朝偉
──為你尋遍八方路，想你心開
1986年版嘅《倚天屠龍記》，係TVB第二次翻拍倚天，仲係當年嘅台慶劇。一年嘅重頭戲，陣容梗係唔可以睇少啦！男主角由當時只有23歲嘅當紅炸子雞梁朝偉擔演，年青嘅影帝啱啱出道，就以《鹿鼎記》韋小寶一角成功入屋。喺倚天又再擔正做金庸筆下男神，駕輕就熟，將張無忌嗰種對愛情嘅優柔寡斷演釋出色，仲自帶無辜感，你睇佢對電眼，點嬲得落啫！
2 演技到位吳啟華
──萬載千世誰狂勇 號令世間天贊頌
2001年版嘅《倚天屠龍記》係TVB第三次翻拍倚天，前兩次出色嘅成績，帶嚟嘅滿滿嘅期待同時，亦都引起好多批評。當時張無忌係由37歲嘅吳啟華飾演，以張無忌依個角色嚟計，可以話係超晒齡，所以坊間好多批評。但因為吳啟華做得實在太好喇，用演技征服咗大眾，愈嚟愈多人收睇，慢慢咁拉高返個收視率。吳啟華嘅張無忌，嗰種書生味嘅純真，真係獨一無二啊
1 金庸肯定鄭少秋
──情義繞心中有幾多重 仇恨又卻是誰所種
1978年TVB第一次將金庸《倚天屠龍記》搬入公仔箱，由鄭少秋出演張無忌，真係經典中嘅經典，仲係普遍認為最貼近原著嘅一個版本。套嘢無乜特效，又無話有好大嘅場面，但就好得金庸本人喜愛！金庸仲親筆題字送俾鄭少秋，真係認真愛錫秋官。不過唔係你鋪話法，後生嘅秋官，拍起古妝片，又真係有一陣大俠味，怪唔得當年咁受少女歡迎啦！
趙敏演員，五大女星
5 金庸盛讚葉童神似
──只要情濃 不要武功 愛恨兩難容
1994年台灣民視嘅《倚天屠龍記》，分別由兩大美女葉童演趙敏、周海媚演周芷若。呢一版嘅倚天，最受人關注嘅係周芷若內心表達出色，好多觀眾都對佢我見猶憐。但其實葉童演出趙敏，一樣好鬼精彩！傳聞金庸讚爆葉童版趙敏，好似喺書入面走出嚟嘅人物咁，栩栩如生喎。趙敏嘅機智、聰明，重情而有機心，係葉童嘅演出盡顯無遺，霸氣卻又溫柔如水。
4 震攝網民嘅陳鈺琪
──只此一吻我無忌無怨無嗔
中國大陸2019年翻拍嘅《倚天屠龍記》，喺正式拍攝之前一直備受關注，因為以前拍過嘅男女主角都好出色，真係珠玉在前，好似點樣選角都會俾人批評咁。但當公佈咗演員名單之後，好多網民都讚選角好，陳鈺琪演趙敏嘅劇照英氣十足，令大家都好Surprise。其實陳鈺琪出道咁耐，都演比較中性嘅角色，趙敏性格本身係巾幗不讓鬚眉，唔怪得咁受大家欣賞。
3 古裝皇后黎美嫻
──為你尋遍八方路 想你心開
1986年香港版嘅《倚天屠龍記》，由當時先得19歲嘅美少女黎美嫻出演。直到今日，都仲有唔少網民眾口同聲話，黎美嫻喺佢地眼中最靚嘅趙敏。黎美嫻演出趙敏一角之後爆紅，一連接咗九部古裝劇嘅演出，即時俾當時嘅人話佢係「古裝皇后」，真係當之無愧。1986版嘅倚天，著重嘅係趙敏對張無忌一往情深，恰好咁同當時純情少女黎美嫻相合，自然吸引到觀眾喇！
2 香港人嘅經典黎姿
──誰能去分正邪 從一而終
香港每次翻拍《倚天屠龍記》都好引人注目，2001年嘅版本，由黎姿演出嘅趙敏成為咗港人嘅經典，有人甚至話黎姿前後無趙敏，真係非常深入民心！就有網民指出，呢個版本嘅倚天好貼近原著，劇情好，自然有更多空間表現趙敏嘅敢愛敢恨，即使係草野之中都隱藏唔到眉目之間嘅半點貴族英氣，充分喺黎姿嘅演技呈現出嚟。黎姿，可能係香港最多人鍾意嘅趙敏。
1 第一任趙敏汪明荃
──忘情棄愛世上有真英雄 常人只許讓愛恨纏心中
汪阿姐汪明荃，曾經喺香港影視界最光輝嘅年代，拍攝咗無數經典嘅港劇，好似第一次由小說改編成劇1978年版《倚天屠龍記》，成就咗汪明荃嘅趙敏，其中嘅男裝扮相，可謂非常經典。當時「TVB 70年代四大花旦」之一嘅汪明荃，演技已經好好，加埋佢高挑苗條嘅身形，英氣十足嘅外表，要做行事果斷又霸氣嘅趙敏，緊係易過反手，Easy job！
倚天不出，誰與爭鋒？
金庸小說歷來翻拍不斷，書寫得好成為經典，呢個自然係好正常嘅現象。但有趣嘅係，每次翻拍之後，都總會有好多唔同意見、批評，除咗話改編得似唔似原創，都會針對演員同角色之間入唔入形入格咁。其實每個鍾意金庸小說嘅書迷，大抵心入面都有自己嘅理想，理想嘅張無忌，理想嘅趙敏，理想嘅小昭，理想嘅周芷若，自然會同其他人嘅諗法唔同。如果我哋鍾意金庸，都不妨放鬆吓自己嘅尺，因為經典嘅翻拍本身就係延續金庸影響力，令更多人可能睇原著嘅助力。真正嘅倚天劍，都潛伏喺我哋內心，話唔定有一日，會見到。
分析說明：
本研究資料分析時間範圍為2018年05月06日至2019年05月07日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『倚天屠龍記五大男女主角』關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :
