警察故事，香港《鐵探》
2019年4月1日播出至今，TVB港劇《鐵探》真係大受歡迎，收視高企，成為咗香港人茶餘飯後討論嘅話題。《鐵探》有幾多人睇？單係睇各大論壇嘅討論Post，開到三四十個咁多，瘋狂喺網路熱門出現。袁偉豪、惠英紅、姜皓文、蔡思貝及黃智賢領銜主演，個個都係好戲之人，好似影后惠英紅，每次出場都相當引人注目，同埋民選影帝姜皓文黑仔，真係好鬼精彩。香港拍警察故事一向出色，直頭去到國際級水平，難怪《鐵探》大穫成功嘅！今日DailyView就用網路大數據話你知，大家傾《鐵探》講邊幾個演員同金句最多喇！
image source:《KEYPO大數據關鍵引擎》
《鐵探》五大熱門討論演員
5 王君馨
──梓sir背後嘅女人，楊曉怡
喺《鐵探》入面有咁多好戲之人，要突圍而出真係唔易，今次王君馨嘅表現就認真唔錯啊！今次劇入面，王君馨飾演一個堅強嘅酒吧老闆，同時係敢愛敢恨嘅垶Sir老婆，又係充滿母愛嘅晴晴媽咪。個角色咁多個面向，要表達嗰種矛盾嘅情感，王君馨真係交咗份滿分嘅考卷啊！加油啊！睇到你進步！
4 黃智賢
──警隊包青天，程宇森
《鐵探》入面最過癮嘅，就梗係老戲骨惠英紅同黃智賢對戲啦！小紅姐演后級人馬，好戲就係人都知㗎啦，有個好對手，黃智賢即刻戲力全開，冇俾小紅姐食住，可以做到五五波啊！所以小紅姐公開大讚話Ben Sir演技，話可以平起平坐啊！唔可以唔講嘅，就係今次Ben Sir演嘅角色，係跛㗎，淨用對白都好有張力
3 袁偉豪
——追求公義嘅垶Sir！
袁偉豪出道至今，睇怕《鐵探》尚垶一角已經超越以前咁多角色喇！袁偉豪演出一個中槍生還，但仲有好多後遺症嘅演員，既要追求公義，執行警察職務，又要表現到自己身體創傷嘅唔方便，真係好大挑戰。袁偉豪刻意減磅，入形入格，就算咁多場同惠英紅嘅對手戲，都唔遜色，難怪紅姐都激讚佢喇！
2 惠英紅
——誓做一姐嘅萬晞華
惠英紅呢個名，已經代表咗神奇、頂級同卓越，代表咗有佢嘅出現，香港人都會留喺電視面前睇佢嘅精湛演技。佢喺《鐵探》入面演出萬晞華一角，可以話係傳統嘅反派角色，而紅姐就將呢個角色嘅內心戲呈現得淋漓盡致。好似萬晞華其實都奸唔哂，都有為大局為重，只係喺爭名奪利，保護自己嘅過程中，內心漸漸扭曲。最後甚至為咗一己私利，出賣親友性命，紅姐演得相當有魄力。
1 姜皓文
——臥底警察Bingo
姜皓文，黑仔，拍劇拍戲都有精彩嘅表現，2018加盟TVB，第一套《鐵探》2019年播出即刻大受歡迎，好多觀眾都話佢演嘅臥底警察Bingo相當出色。呢個角色亦正亦邪，唔單止係正氣警察咁簡單，仲要做埋古惑仔嘅奸味，認真唔簡單。好似佢同Madam Lo母子相認，佢同紅姐之間嘅上司下屬感情，到最後甚至紅姐要對付佢嘅張力，全部都好經典，令我哋留下深刻嘅印象！
《鐵探》五大演員金句
5 依壇嘢我自己搞得掂，冇你嘅事啊！
──楊曉怡
楊曉怡係一個好堅強嘅人，喺酒吧對住搞事嘅客，佢企出面對嚟；對面同垶Sir唔順利嘅愛情，佢自己撐住；對住個女晴晴有事，佢果斷處理。一個咁硬淨嘅女強人，真係咩都俾佢搞掂晒！
4 唔係有權有勢嘅人就可以打橫行
──程宇森
依句由「警隊包青天」程Sir講出嚟嘅金句，相信好多觀眾聽到都好有feel啊！唔單止代表到程Sir嗰份公平公正嘅正義心，仲係我哋依D小市民日常心聲啊！真係好希望現實都有個程Sir啊！
3 我哋係警察，警察係公僕
——尚垶
《鐵探》係一個屬於警察嘅故事，當然涉及咗好多正義、公平嘅道德元素。好似袁偉豪飾演嘅警察尚垶咁，就有一句喺法庭講嘅經典對白：「我哋係警察，警察係公僕。」播出之後即時成為網民狂講嘅金句！
2 我係憲委級，係特首委任嘅
——萬晞華
惠英紅做萬晞華，同黃智賢做程Sir，有一場好出色三分鐘嘅對手戲，佢地演技狂飆，過足戲癮之餘，連觀眾都睇得好爽。尤其係萬晞華話自己特首委任呢句，已經係全劇金句喇！
1 我係唔會殺警嘅，你唔好屈我呀
——Bingo
姜皓文演出臥底警察Bingo，佢同紅姐本身係上司同下屬嘅關係，但隨住劇情推移，佢地互相反目。最後紅姐係射殺Bingo之前，Bingo仲好有骨氣咁講：「我係PC38451，我係唔會殺警嘅，你唔好屈我呀。」咁悲壯嘅對白，人人都記得。
追求公義，無悔一生
《鐵探》嘅故事相當有趣，講袁偉豪演警探尚垶，開始無耐已經講佢中槍受傷，要為自己尋求公道，之後仲捲入咗一場忠奸難分，現實版職場勾心鬥角，爭權奪利嘅Office Story。哇，唔怪得《鐵探》咁受香港人關注嘅，因為我哋成日都會面對到呢種情況，面對現實人生好多嘅不公不義。可惜嘅係，我哋往往都係忍氣吞聲，縱容呢種事繼續發生。其實我哋內心入面，都有一個尚垶，都有一顆用追求公義嘅心，因為唯有咁，我哋先可以無悔一生，對得住天地，對得住自己。
image source:《KEYPO大數據關鍵引擎》
分析說明：
本研究資料由《KEYPO大數據關鍵引擎》提供，分析時間範圍為2019年02月10日至2019年05月10日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『鐵探熱門話題』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :