香港其實係一片福地
好多人都想離開香港，但都好多人選擇堅持留低，甚至以自己係香港人為傲！點解會話呢度係一片福地？因為香港又唔會地震，又唔會海嘯，好少會發生咩天災人禍。除咗呢啲之外，以下呢九樣嘢香港人一直都擁有或者使用緊，並且係好多其他地方嘅人會羨慕妒忌恨𠻹～其實香港真係個好趣緻嘅地方嚟㗎！今日就等DailyView用網路大數據，帶大家一齊嚟睇吓有咩咁趣緻啦！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source：unsplash
9 最燦爛嘅「東方之珠」
香港被稱為「東方之珠」應該冇人唔知掛？其實呢個名點嚟呢？其中一個原因係由於1970年代啲乘客夜晚喺啟德機場降落嗰陣，覺得香港嘅夜景燈光好似一粒黑夜中發光嘅明珠，所以先叫「東方之珠」。其實香港遍地高樓大廈，夜晚大家開燈嗰陣真係靚到好似幅畫咁呀！嗱唔好寫錯呀！係「之珠」，唔係「蜘蛛」呀！
8 有成12年嘅免費教育
香港政府將教育制度修改成為12年嘅免費教育，令到所有香港兒童同青少年都有免費書讀，真係好幸福㗎！雖然日本同內地都有免費教育，但都係得九年咋～而喺台灣讀書係要俾學費㗎！加上香港嘅教育水平係非常之高，特別係中學教育界有好高聲譽，好多老師都拎過諾貝爾獎同菲立茲獎等等！所以好多人都想嚟香港讀書！
7 唔洗驚俾唔起嘅低稅率
根據香港貿發局顯示，香港奉行簡單低稅率政策，稅制有利營商，堪稱全球數一數二。喺香港主要所交嘅稅只係計港人喺香港嘅收入。另外，香港仲有「免稅額」呢樣嘢，基本免稅額為$132,000，但係已婚，有供養仔女同父母嘅人士同樣都可以獲得對應嘅免稅額。簡單啲嚟講，喺香港稅制都算係非常人性化，可以根據你嘅收入同環境負擔嚟交稅，唔似得比利時同德國呢啲高稅率國家交稅交得咁辛苦呀～
6 方便到去邊都唔使揸車
你可以嫌香港地方細，但係你不得不承認，就係因為佢地方細！所以去邊都咁方便！香港交通係超級發達，CNN仲發表過一篇文章「Where are the world’s best metro system」（哪裡有全球最好的鐵路系統）稱讚過香港嘅鐵路運輸。除咗話地鐵班次緊密之外，仲話有WI-FI功能同自動售票機好正𠻹！CNN仲表示香港機場快綫係全球最方便嘅機場快綫系統，最慢都係10分鐘就有一班呀！
5 好似環遊世界咁嘅美食天堂
講到「美食天堂」，香港就真係冇得輸！基本上你想食啲咩菜式，無論係中式日式英式美式韓式法式意式基本上實搵到餐廳俾你坐得食～你今日食咗壽司？咁聽日食韓燒啦！其實好多地方唔似得香港咁開放，甚至乎有好強烈嘅民族意識，唔會俾咁多外來飲食文化侵襲自己嘅土地。而今年2019年香港係有成63間餐廳拎到米芝蓮星星，成績十分優異㗎！
4 治安咁好唔洗驚有人老笠
喺香港嘅罪案發生率其實係非常低，而香港嘅司法獨立仲係亞洲排名第一名！甚至乎2017年香港整體罪案率唔單止比前一年跌咗7.6%，更係1975年以來嘅創新低𠻹呀！其實香港係一個非常安全嘅地方，因為香港人都非常守秩序，基本上都唔會見到有人打尖搶劫等等嘅行為出現。所以外界嘅人士都放心過香港發展，令香港成為國際大都會。
3 認識唔同國家唔同文化
香港係中西文化會萃嘅城市。正如啱啱所講，飲食上你可以試到唔同國家嘅菜式；公眾假期方面香港人可以享有中式假同西式假。而根據2016年中期人口統計結果，香港人口入面有8%係非華裔人士，最多為菲律賓人，有超過18萬人。其次係印尼人同白人。喺香港，每個香港人都有機會同其他國家嘅人交流，從而擴展成文化多元化。
2 我想講咩就講咩使你管
自由嘅空氣真係好重要㗎！有邊個會想俾人困喺籠裡面做冇腳嘅雀仔喎！香港係一個擁有言論自由嘅地方，所以香港人可以透過任何渠道表達自己嘅意見。例如可以使用唔同嘅社交媒體係入面作多角度評論，好似外國平台Instagram同Facebook，香港嘅連登，台灣嘅Dcard。
1 經濟好唔愁冇飯開
2019年3月11日，「全球金融峰會」就發佈咗第25期嘅全球金融中心指數，而香港就排全球第三位，亞洲入面更係第一位𠻹呀！點計分法？佢哋係根據經商環境，人力資源，基礎設施等等去計算～唔係吹得就吹㗎！所以基本上喺香港搵到份工都唔會餓死人，加上有最低工資嘅保障，唔使驚香港經濟大起大落！
睇完有冇覺得好驕傲呢？～～
小編就好驕傲自己可以成為香港人，其實香港仲有好多方面都係令外國人非常羨慕㗎！例如有啲台灣朋友仔就羨慕我地唔洗落街等垃圾車XD，呢啲令香港人驕傲嘅事物，我地一定要好好珍惜先得呀！
分析說明：
本研究資料由《KEYPO大數據關鍵引擎》提供，分析時間範圍為2018年07月06日至2019年07月07日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『我係香港人我驕傲』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :