珍珠奶茶萬人迷～
小編細細個就好鍾意飲珍珠奶茶，仲記得嗰陣會學電視遊戲節目，限時內一口氣啜晒啲珍珠，再Lur返出嚟同朋友鬥多（嘔…）到大個咗，珍珠奶茶依然係好多人心中嘅最愛，仲要鋪頭愈開愈多。宜家唔單止咁簡單，大家仲透過佢嚟研發新產品！今日DailyView就用網路大數據調查十大新興珍珠奶茶產品，以下呢十樣可能你會睇到呆咗，你點會估到珍珠奶茶可以變成另一個層次？
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
image source：IG/pinkbunnyju
10 一咬開會流漿嘅珍珠麵包
台灣一間人氣麵包店Share Le Pain開到嚟香港，主打嘅就係獨家製「爆漿珍奶歐軟」啦！佢所用嘅珍珠係由台灣空運嘅白玉珍珠，而麵團係加咗自己原葉現磨嘅頂級台茶18號紅玉茶粉一齊發酵。好多食客都話個包一啲都唔乾身，一分開個包入面啲吉士味仲要勁香！放低你手中嘅流漿奶黃包，快啲去試下流漿珍珠麵包啦！
Share Le Pain- 銅鑼灣店（及另外兩間分店）
地址：銅鑼灣世貿中心2樓207-208舖
營業時間：11:00－21:00
詳細資訊：https://bit.ly/2LEVnvB
9 珍珠都可以用嚟拌麵？
係呀，真係珍珠都冇咁真呀！台灣有間拉麵店研發咗個珍珠拌麵出嚟！佢哋喺碗拌麵上面放上大家都常見嘅肉燥嚟增加香氣，再擺上少少青瓜絲同兩片叉燒，最後放上滷蛋同香蔥。咦，咁珍珠呢？睇真啲，原來啲珍珠一早就同肉燥撈埋啦！有大膽去試食嘅網友就話覺得啲珍珠就好似豆腐嘅口感，仲建議可以撈埋皮蛋一齊食𠻹！
麵屋壹の穴 ICHI
地址：台北市大安區延吉街137巷22號
營業時間：週二至日11：30－15：00，17：30－21：00（週一休）
詳細資訊：https://bit.ly/2Y5zmg7
8 連麻婆豆腐都加埋珍珠？！
日本人宜家鍾意珍珠嘅程度，對於我地嚟講可以話係極之瘋狂～竟然會有人拎珍珠整成珍珠麻婆豆腐！佢就好似啱啱個珍珠拌麵咁，麵上嘅肉燥再加製成為珍珠麻婆豆腐，新菜式就咁誕生咗啦！小編真係不得不敬佩日本人，成日都將不可能變成可能～好多網民真係接受唔到呢樣嘢，仲話求日本人「放過珍珠一命」𠻹呀！
image source：圖片翻攝自網路
7 識動L嘅珍珠梳乎厘
終於見返正常少少嘅食物啦！鍾意食甜品就唔好錯過呢間梳乎厘店啦，由台灣開過嚟嘅呢間「美好年代」最出名就係珍珠梳乎厘，亦都係發明始祖嚟㗎！梳乎厘係到震下震下，加上激多嘅黑糖珍珠，而奶茶醬多到由梳乎厘上面流到成隻碟都係，少女心實大爆發呀！有食客表示醬汁味道偏甜，不過加埋梳乎厘食就剛剛好啦～
美好年代
地址：銅鑼灣邊寧頓街5號地鋪
營業時間：星期一至四12:00－22:00，星期五、六及日12:00－22:30
詳細資訊：http://bit.ly/2GtdOPx
6 台日混血嘅珍珠奶茶拉麵
台灣高雄有間拉麵店最近就新出咗個珍珠奶茶拉麵，唔好以為得珍珠有份登場，今次連奶茶都有份飾演湯底部分，仲話有加秘密調味配方！好多網民就話自己冇辦法接受，仲鬧店家叫佢唔好搞亂檔𠻹呀！不過店家就話自己試食過，好堅持味道上真係冇問題喎～佢仲話碗拉麵係台日混血拉麵嚟，睇嚟都係日本嘅珍奶愛好者俾佢嘅靈感啦～
極道ラーメン
地址：台灣高雄市左營區勝利路41-1號
營業時間：週一至週五17:00-21:00；週六日11:45-14:00，17:00-21:00
詳細資訊：https://bit.ly/2YgiRsX
5 潤唇膏都有珍珠奶茶味？！
由於日本人鐘意珍珠奶茶嘅熱潮愈嚟愈勁，就連日本嘅知名企業樂敦製藥，都宣佈咗旗下嘅曼秀雷敦Melty Cream Lip系列會推出珍珠奶茶味潤唇膏！宜家喺日本已經開售咗啦！有人用咗之後就話Feel到支潤唇膏有好香甜味同茶味，而且用咗支潤唇膏嘴唇仲會隨住自己嘅體溫慢慢變色𠻹！大家去日本記得都買支嚟試下啦！仲可以攞嚟當手信派𠻹～
4 朱古力都同珍奶做朋友
日本7-11都一齊加入珍珠奶茶熱潮！佢出咗一款限定嘅珍珠奶茶朱古力，一推出就大受好評搶到癲咗！朱古力就好似一粒粒麥提莎咁，但係入面就包住一粒珍珠，而朱古力就有少少阿薩姆紅茶嘅香味。好多日本人仲會將朱古力雪凍嚟食，仲話咁樣有另一番風味喎！隨後就連台灣都有推出珍珠奶茶朱古力，同樣都大受台灣人好評㗎～
3 珍奶控發明嘅珍奶蛋糕
唔止日本人鐘意發明，其實香港人都唔執輸㗎！不過我地多數就用珍珠奶茶嚟研發甜品～宜家就好興呢款珍珠奶茶蛋糕啦！呢間蛋糕店Miss Marble嘅老闆都話自己本身就係黑糖珍珠控，所以發明左呢個蛋糕。黑糖珍珠雪崩蛋糕分開兩層，下面係戚風蛋糕，而上面係伯爵茶流心醬加黑糖珍珠。只要搣開蛋糕膜就即刻整到流心效果㗎啦！
Miss Marble
地址：尖沙咀山林道10-12號山林閣地下2C號舖
營業時間：星期一至四、日12:00-22:00；星期五至六及公眾假期前夕12:00-23:00
詳細資訊：https://bit.ly/2Oi1ZCi
2 沾麵都嚟參加珍奶熱潮
珍珠沾麵一開始係由日本嘅麵屋武藏發售，呢個七月竟然連同香港店一齊發售，仲一日只賣十碗炸！原來沾麵汁並唔係普通奶茶，而係用鰹魚同豆乳製成去模仿奶茶色澤。有食客就話估唔到味道竟然幾夾，加上蔥油雞同青瓜食落一啲都唔覺油膩呀！不過香港店嘅珍珠沾麵嘅期間限定完咗啦，如果大家都想試就要留意店家最新消息啦！
麵屋武藏、神山麵屋全線分店
第一波活動時間：7月5日至7月14日（第二波活動尚未公布）
供應時間：11：00－23：00
詳細資訊：https://bit.ly/2JYG79A
1 好有咬口嘅珍珠奶茶雪條
其實已經有好多牌子出過珍珠奶茶雪條，例如係日本7–11自家品牌，台灣小美等等。但係講到最多人識就一定係台灣知名牌子義美出嘅珍珠奶茶雪條，網民就話呢款雪條有勁重嘅錫蘭紅茶味，原來佢嘅雪條都係用返自家義美奶茶整出嚟～而珍珠亦唔係普通嘅黑糖珍珠咁簡單，佢哋用咗寒天同蒟蒻一齊整，有啲大粒有啲細粒食落超有口感！
image source：YouTube/鬼鬼
分析說明：
本研究資料由《KEYPO大數據關鍵引擎》提供，分析時間範圍為2019年04月26日至2019年07月24日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『最紅珍珠產品』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :