阿仔，坐低傾下偈啦！
人大個咗，社會對你嘅期望就愈嚟愈多，喺呢個高壓嘅時代，大家都有大家嘅煩惱同埋期待，細細個嘅時候你嘅新年願望係d咩？你可能會希望可以有新玩具可以同同學仔一齊玩，爸爸媽媽就希望你快高長大、學業進步………等到你漸漸長大，長輩對你嘅關心亦從來無間斷過，慢慢佢地會想同你傾多d偈，交流多d，但往往好多年輕人對於長輩嘅問題就非常苦惱，驚講開d咩就會引爆世紀大戰！你同長輩又有過d咩禁忌話題唔講得？今日DailyView就透過網路大數據蒐集左十個會引爆兩代戰火嘅地雷話題，快d嚟睇下你中過邊幾條！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10 管教細路
──奶奶！咁教仔個仔會學壞㗎！
阿仔阿女榮升爸爸媽媽，爺爺嬤嬤當然想錫晒自己嘅心肝寶貝孫仔啦！但係上一輩嘅教養方法同下一輩有好大分歧點算？次次講親養兒秘訣就會引嚟一場風波？其實世代差異先至係常態，大家要尊重大家嘅唔一樣，而且爹地媽咪同爺爺嬤嬤都係想小朋友好，唔同方法亦都唔一定有對同錯，大家不如一人退一步，一齊共享天倫之樂啦！
9 衣著外型
──阿女點解你要著條穿曬窿嘅褲？
潮流呢家野日新月異，要創新先至有進步，點解咁多長輩唔明白呢個世代嘅潮流？呢個大概係好多年輕人嘅心聲！咩穿窿褲，拖鞋襯襪，呢D先係當今嘅時尚。衣著係個人喜好，係社群興起嘅現在，年輕人有好多方法搵到同好，衣著就係其中一個展現自己嘅方法，小編認為，應該大家都希望自己會俾身邊嘅人接納，而唔係俾人潑冷水嘅！
8 飲食習慣
──唔好食咁多垃圾食物啊！
各位年輕人應該都有呢個經驗，俾家中長輩耳提面令食嘢要健康D，呢個叮囑由細到大各位一定聽唔少啦！「麥當勞D野無益架！」、「唔好食咁多街邊野食！」，真係聽都聽到識背啦！但係其實出邊嘅野再好食，又點俾得上屋企嘅飯餸咁香？屋企人嘅叮嚀都只係想你過得健康D、可以日日見到你番屋企食飯、見你多D咋！
7 遊戲娛樂
──阿仔唔好日日係房打機啦！
聽講最近Switch又出咗新Game？快d買左佢同Friend玩先！哎呀點解關門打機都要俾屋企人鬧㗎！屋企人除咗關心你成績同工作，係唔係都會好關心你嘅休閒活動呢？爸爸媽媽次次見到你關埋房門，都好惆悵你係唔係無朋友，要自己匿埋係房孤獨地打機？其實你每次都好想同屋企人講：打機都係我同朋友嘅交流方法之一嚟㗎！
6 讀書成績
──姨媽，唔好次次見面都問到我嘅痛處啦！
如果你問長輩小朋友最重要嘅係d咩？好多長輩都會視「讀好書」為後輩嘅首要目標，而係長輩眼中，無論你長到幾大，你永遠都會係嗰個人仔細細、需要長輩呵護嘅小朋友，當然見面都要關心下你嘅學業情況！但人生不如意事十常八九，成績都有可能係你嘅罩門，每次長輩問起你都唔知道點回答好，況且人生其實有好多嘢重要過讀書㗎！
5 工作人工
──陳師奶個仔搵幾萬蚊一個月啊！
工作、人工依D問題真係唔好唔好攞出嚟講，更加唔好加比較，唔係嘅話，好易就引起一輪大戰啊！有時做仔女嘅，聽到父母咁講，其實真係唔知點應好，要認自己差過人，定係要倒返轉話細個嗰時父母畀嘅資源唔夠人多？講依D真係傷感情，久而久之就會積埋D怨氣，大家真係避得就避！
4 健康狀況
──病就梗係因為夜瞓同飲唔夠多水啦！
同長輩講健康狀況其實個感覺都幾矛盾，知佢哋係關心你，但佢哋講嘅嘢又離晒譜。有時明明鼻敏感，打兩個乞嚏，佢哋就會話係著唔夠衫；有時有咩感冒、傷風，佢哋就會話係夜瞓同飲唔夠水。喺佢哋嘅理解到，咩都可以關夜唔夜瞓同飲得多唔多水事！有時聽到都唔知駁唔駁佢哋好。
3 旅行選擇
──去越南？我唔想你死啊！
人大個咗就會想出去見下個世界，但係屋企人最緊張你嘅安全，一聽到你要去遠小小嘅地方旅行，就會好擔心你嘅安全，力阻你嘅冒險之旅！咁如果同屋企人一齊去旅行呢？你會發現係長輩眼中，邊到都無香港咁好。當你計劃好晒一次旅行，辛辛苦苦帶爸爸媽媽玩完番到屋企，你會見到佢哋係Status同朋友講：「香港係最好㗎！」
2 政治立場
──「黃加藍」係唔會變綠色㗎
最近香港反送中事件愈演愈烈，香港年輕人盡力喺一片混亂之中堅守自己聲音，但好多時當長輩同年輕人、黃藍兩方開始衝突嘅時候，有一D長輩就會以自己「食鹽多過你食米」嘅理由，拒絕傾聽年輕人嘅心聲，其實呢d價值觀問題都好難講誰對誰錯，但大是大非面前係無所謂價值觀問題，大家一定要看清事實啊！
1 戀愛狀況
──幾時結婚啊？
「戀愛」係唔係大過天？所有關心你嘅人都一定會希望你得到幸福，但係講到出口嘅關心，其實係另外一種壓力，呢個問題堪稱係兩輩之間數一數二難拆嘅話題，令到年輕人非常煩惱啊！其實面對呢個問題我都覺得好徬徨無助，姨媽姑姐們，如果我有好消息一定會第一時間話你聽，但係緣分呢家野，你哋都知道係急唔嚟㗎！
分析說明：
本研究資料由《KEYPO大數據關鍵引擎》提供，分析時間範圍為2019年04月28日至2019年07月26日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『兩代之間嘅禁忌話題』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :
