唔好將對方渣嘅特徵 仲當成對方有個性
感情呢啲嘢，有時可以好純粹，有時又真係好複雜，人心要變起來，無嘢可以控制到。有時候感情最唏噓嘅，莫過於熱戀嘅時候幾乎成為對方嘅一切，但係隨著時間過去，總有一方開始變得闊佬懶理。如果呢個時候你都仲各種自我安慰，搵藉口來開脫對方嘅唔在乎，咁你就真係too young too simple啦！今日DailyView用網路大數據話你知，網友們都經歷過嘅渣男事蹟，至少你可以提前睇出唔對路，唔使等到對方係IG公佈婚訊，你先知道新娘不是你啊！
DV小教室：網路溫度計透過《KEYPO大數據關鍵引擎》大調查觀測咗近萬個網站頻道（而且不斷增加ing），包括港澳地區的新聞頻道、FB、IG同埋各大討論區、Blog......透過強大嘅網文爬梳觀測，攞到巨大嘅資料樣本數，拎到上億嘅文章及留言訊息，以人工智慧的語意程式做分析。
10. 行蹤不明又飄忽
明明話要喺公司熬夜開會，第日發現你西裝褸有張酒店餐廳嘅信用卡簽單，問你又話同個客去應酬食飯。你可以怪我多疑咩？轉過頭，你又話返屋企，返成三個鐘都未返到去，飛轉台灣都得啦！我點知你係出咗意外，俾人綁架咗架？現代人手機不離身，又點會真係幾個鐘無睇過訊息。當訊息覆都唔覆，當男友行蹤成謎，你真係要好好諗下會唔會係一個警訊。
9. 覺得食軟飯好正常
喺呢個追求男女地位平等嘅社會，唔少獨立自強嘅女性都表示請過男友食飯，如果交往嘅係年下男，難免就由經濟能力較高嘅女方畀錢。係財力低潮嘅時候，由對方互相扶持當然係加深彼此嘅依賴。不過當一個男人長期由女人埋單，就顯得無擔當又無心。尤其如果對方仲為此感到非常驕傲，一啲都無打算發奮上進來照顧你，姐妹們，係時候睇清楚你嘅枕邊人啦！
8. 慣性射波又無擔當
男人最緊要有膊頭，可以擋得風雨，擔得起責任。所以當你留意到自己男友經常性射波，你就要謹慎評估同呢個人嘅未來。用個最實際嘅例子，萬一無端端搞大咗個肚，佢又會唔會勇於承擔責任，同你一齊面對呢個意外呢？唔係想畀男人咁大壓力，不過如果佢一有事發生，諗到嘅只有自己，想要馬上撇清關係，就真係建議盡快同呢類渣男斷纜啦。
7. 對女人動拳頭
令娛樂圈「恆」字輩渣男正式留名嘅周永恆，之所以俾人非議除咗因為佢偷食，更大罪名係佢打·女·人！基本上會動手嘅男人，就代表性格上有某程度嘅缺陷。無論係鬧交鬧到惱羞成怒，定還是要用拳頭嚇阻自己女朋友，男人動手就係唔啱。當然除非女方有練開防禦術，普遍而言，男方係體能同力量上都有相對優勢，用傷害女人嘅方式來爭取主導權，簡直可恥！
6. 有女朋友仲到處flirt
有女朋友嘅男仔最忌同異性關係過好，偶爾為之嘅舉手之勞都仲可以體諒下，不過私底下仲會經常text，互send去玩嘅照片，咁會唔會太過唔尊重自己女朋友呢？如果你男朋友本身異性緣已經超好，喺你明示暗示提過幾次情況下，都仲唔改變下情況，反而繼續好享受同異性朋友來往嘅曖昧關係，基本上就等同額頭鑿住個渣男兩個字，完。
5. 講大話唔眨眼
跟住落來個五點就真係渣男起手式，基本上真心想同你一齊有未來嘅男仔，都唔會出現呢啲特徵。兩個人係埋一齊，信任係絕對關鍵。如果你發現對方講大話，或細或大嘅謊言，無論係善意嘅定還是有隱瞞成分嘅，你都要留心。因為講好聽啲，「唔話你知係唔想你胡思亂想」，但其實大家都知道，令女人胡思亂想嘅正正係點解你可以講大話講得咁自然。
4. 人要自愛，而佢只愛佢自己！
網路上成日都話港女有公主病，但其實唔少男仔都有王子病，尤其嗰啲本身比較有自信嘅男仔，拍拖其實就係想搵嗰女人對佢死心塌地，對女朋友呼之則來揮之則去，根底上就係最愛自己。呢嗰特徵最難睇得出，小事上譬如平時出街做咩是咩都好就得女朋友，但係大事上就一定以自己為先，甚至會用糖衣來包裝自己嘅用意，姐妹們記住擦亮自己雙眼啊！
3. 拍拖嘅目的都係為咗一齊...瞓
如果你地拍拖行為僅限於對方屋企、如果你地出街最後嘅結尾一定係上床、如果對方一啲都唔積極參與你嘅生活，如果你開始懷疑自己似對方SP多過對方女友，咁十之八九，你男朋友口中嘅拍拖，其實就係為咗搵個人上床。講真，呢啲嘢你點會feel唔到？對方係咪用心對你，你一定知道。最重要嘅係唔好自己呃自己，趁早清醒過來做正確嘅決定啊！
2. 成日都覺得：千錯萬錯都唔係我嘅錯
俗語有云：「錯就要認，打就要企定」，係男朋友心目中，有種錯叫千錯萬錯都唔係佢嘅錯，小事諸如：遲到都係因為塞車啊、會放你飛機都是因為啊邊個邊個太臨時約，甚至大事上：我地曖昧都係因為嗰女仔自己貼埋來，如果你都證據確鑿你男朋友做錯事，你就唔好再曬時間聽佢辯駁啦，及早放生佢，還自己自由吧啦。
1. 一腳踏兩船，仲可能係踏幾船
呢個斷正得，就基本上係一條鐵錚錚嘅送「分」題。一腳踏兩船，係無藉口架，無任何原因可以解釋出軌嘅發生。又唔係有人攞住支槍，逼佢同其他人發展感情。個啲口中講住「抵受唔住誘惑」嘅人，其實潛台詞就係「我可以冒著失去你嘅風險，以換取一時嘅新鮮感」。咁唔尊重你、咁唔尊重呢段關係嘅人，「渣」呢個字真係當之無愧。
認清渣男面目就盡快分手啦！
「贈你八字箴言：及早斷纜 回頭是岸」
S.H.E都唱過「人無法決定會為誰動心 但至少可以決定放不放棄」，喺情場上黑仔嘅除咗遇到錯的人，最怕就係你當局者迷，明明呢段感情都已經著曬紅燈，你都可以視若無睹，仲一味向前衝。再加上女孩子都有某程度嘅母性，好容易激發性格上嘅救世主精神，覺得自己可以導一個渣男向善，但最後往往都係流著淚離開。唔好咁傻啦，及早抽身，回頭是岸啊施主。
分析說明：
本研究資料由《KEYPO大數據關鍵引擎》提供，分析時間範圍為2018年05月03日至2019年07月31日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『渣男特徵』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。
分享本篇文章
你可能也會喜歡這些文章 :