「為食卡」真係啱香港人心水？
麥當勞喺全球有幾勁？勁到美國社會學家喬治·里茲（George Ritzer）都出咗本書講佢，仲形容麥當勞化（McDonaldization）影響全球。香港呢個東方之珠嘅國際都市，好早已經有麥當勞做生意，真係陪伴香港人成長，我哋會叫佢做M記，我哋會食佢本地化嘅通心粉，甚至可以話係香港人嘅集體回憶。麥當勞嘅食物，已經深入咗香港人嘅胃，網路上都成日有網民討論佢推出嘅「為食卡」，仲想希望可以有更多選擇。今日DailyView就嚟同大家細數，十大網民成日傾麥當勞嘅食物，睇吓佢張「為食卡」到底有冇喇！
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
10 新地筒（175筆）
──又平又正又方便
講起麥當勞嘅雪糕，真係不可不提「新地筒」，佢簡直係完美詮釋咗「平靚正」，兼且方便同埋份量啱啱好啊！話說好多網民去麥當勞只不過係口痕，想搵少少嘢行住食，但又唔想整到成隻手都係油。依個時候最啱就係買支新地筒喇，佢唔似其餘幾款雪糕要用匙羹食，一隻手揸住咬兩三啖就食晒，方便到不得了！如果「為食卡」有佢，仲可以做更多唔同嘅配搭，如果可以一手雪糕，一手嘢飲，真係咪話唔爽！
9 麥旋風（301筆）
──唔使用劍㗎！
好多香港人都好熟悉一句廣告對白：「唔使用劍㗎！」下一句係咩？咪就係「食麥旋風啦！」依句咁小學雞嘅笑話同麥旋風一樣，伴隨住好多香港人長大，係一種由細食到大嘅麥當勞雪糕。佢冇新地咁甜，相對新地筒又多咗層口感，真係大人細路都啱食！除咗最經典嘅OREO口味，仲會間唔時出限定口味，好似上次嘅榴槤味真係令人「榴彈忘返」啊！唔怪得好多人依家用「為食卡」都係為咗買杯麥旋風啦！
8 奶茶（393筆）
——得閒飲茶
香港最出名係咩？無錯，係知名嘅奶茶。香港人對奶茶嘅熱愛，已經係去到國際知名嘅地步，簡直係無第二個地方可以超越香港。香港一早、妟晝、晚餐以至宵夜，都可以配上一杯好飲嘅奶茶。不過唔係成日都有奶茶點，但茶記都無24小時喇！咁最正就係去m記買個野食，再點杯奶茶，又有一段可以慢慢安心鬆返啖氣嘅時間。好在「為食卡」有奶茶，啱晒無啦啦想飲奶茶既香港人，24小時都可以飲！
7 麥樂雞 （455筆）
——亞古獸
香港人對麥樂雞嘅熱情，可能超越咗對其他食物加埋。點解咁講？香港網路曾經有張好出名嘅麥樂雞改圖，圖入面嘅男仔面對住成座山咁高嘅麥樂雞，依然面不改色咁要食哂佢哋，一度成為網路熱話。麥樂雞，又係網民口中有花名叫做亞古獸，成日都有講返起。麥樂雞咁好食，由細路仔到老人家，都有好多Fans，好多人都想「為食卡」有得點麥樂雞，真係當係下午茶食都得，咪話唔正。
6 脆香雞翼（494筆）
——香港人最愛
脆香雞翼，係香港人最愛嘅M記食物，好多香港網民都曾經話過，入去M記點個餐，都不過係為咗食佢嘅脆香雞翼咋！脆香雞翼有幾好味？外表金黃色脆口嘅雞皮，內有軟熟有汁嘅雞肉，啖啖咬入去都令人回味再三，連骨頭都想吞埋落口。有人話，M記脆香雞翼，可能係最全香港人最想日日食嘅雞翼，你又同唔同意？計我話，如果M記想順應民心，「為食卡」就一定要加脆香雞翼入去！
5 優質即磨咖啡（552筆）
——日日都要醒神
日日朝9晚5？唔好講笑，香港人出咗名係工時奴隸，又邊有咁早放工先得。咁放工返到屋企，做埋其他嘢，第二日好多時都無精神返工。不過，咪又係要返工。咁香港人就唯有靠一杯咖啡提神，最方便，又抵飲嘅，緊係要數M記嘅優質即磨咖啡喇！飲落順口，又可以令自己有返工嘅精神，當然好受歡迎。不過有時都想食多少少嘢，當埋早餐，用「為食卡」點多樣嘢就Perfect池喇！你今日飲咗未？
4 可樂（716筆）
——爽到要「呀」
香港人深受外國文化影響，除咗水之外，飲得最多嘅唔係中國嘅茶，而係西方傳入嚟嘅可口可樂。可口，又可樂，呢個名真係改得好啱，飲落喉嚨好鬼爽快，總要有股氣係丹田湧上嚟，搞到我哋忍唔住要「呀」一聲，好似吐咗一口平時生活受到嘅怨氣出嚟咁，認真快樂。睇劇、打機、做完運動，都最啱飲返杯可樂。M記「為食卡」唔知幾時會加可樂入去，等我哋日日都有可口，又可樂呢？
3 新地（962筆）
——最佳甜品
香港地咁大壓力，香港人成日都好多唔開心嘅時候，咁到底有咩方法令自己心情變好呢？最直接嘅，緊係即刻食甜品，等自己即刻開心返。落街無甜品鋪？唔緊係，總有一間M記係左近，買返個朱古力味新地，黑白夾得啱啱好，雲尼拿溝咗朱古力係口入面溶化，係味覺嘅二重奏，係心情嘅最佳調和。M記「為食卡」一早有新地，隨時隨地都好抵買，香港人食完之後，個個都可以笑住咁過日子喇。
2 薯條（1499筆）
——食到唔停手
薯條，炸到金黃色，外脆內軟，每條咬落去都爽口到不得了，令人食完一條又一條，欲罷不能，幾分鐘就極速無咗。呢種，就係每一個香港人都經驗過，M記薯條嘅邪惡魔力。最重要嘅，係我哋每次點完M記薯條，食完之後，一定會覺得到喉唔到肺，想點多包食。不過呢，每次都要單點好唔抵，叫餐又太多。M記「為食卡」有薯條嘅話，咁相信好多人嘅薯條問題都解決咗，真係好希望有得咁樣叫！
1 蘋果批（1728筆）
——暖到入心
喺香港，要搵好嘢食唔難，問題係好多時候CP值唔高，要畀好多錢先有好嘢食。如果問香港人，邊到有CP值最高嘅蘋果批食，相信九成九嘅香港人，都會答你，去M記食喇！M記嘅蘋果批，就腳、抵食、好味，一次過滿足哂你三個願望。外脆內有暖口又暖心嘅蘋果餡汁，炸到啱啱好，秋冬天食最啱Feel。最正係「為食卡」有蘋果批，唔怪得M記都會大排長龍，日日放學放工都有得買個返屋企慢慢嘆。
「為食卡」應該要咁樣，先最啱港人心水！
分析說明：
本研究資料由《KEYPO大數據關鍵引擎》提供，分析時間範圍為2018年10月24日至2019年10月25日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『最愛嘅麥當勞小食』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :