2019，電影回憶
2019已經完結，好多人都選擇喺呢幾日，回顧返自己嘅呢一年做過咩嘢，食過咩嘢，睇過咩電影。香港社會，有咩共同話題普遍得過吃喝玩樂？其中，電影作為大眾娛樂嘅重要元素，深有深睇，淺有淺睇，睇完可以寫返篇千字文感想又得，隨便喺FB、IG打幾隻字都得。而且電影更加係香港人增進感情嘅工具。好耐無見？一齊睇戲喇！啱啱先識？一齊睇戲喇！今日就等DailyView同你細數，香港人2019年最關注嘅二十部電影。呢種回顧，會唔會勾起大家嘅回憶呢？
DV小教室：網路溫度計透過《KEYPO大數據關鍵引擎》，觀測、爬梳港澳地區近萬個網站、頻道，其中包括新聞頻道、各大討論區、FB、IG以及Blog，從中取得資料樣本數，並以AI語意程式作數據分析。「網路熱度」為主題項目相關的網路posts和comments ，數值愈大代表主題項目的討論度愈高。
NO.19 星球大戰：天行者掘起
——Star Wars moive
世界級經典科幻系列電影，「星球大戰」，2019推出第9部曲的最終章，《星球大戰：天行者掘起》，為呢個咁多人嘅集體回憶，暫時寫下咗一個句點。星球大戰有咩咁吸引？單係佢嘅背景設定，絕地武士、原力、激光劍、機械人，宇宙飛船等，都係劃時代嘅想像。香港都有為數不少嘅星戰Fans，集集追，集集睇，《星球大戰：天行者掘起》排名19，自然合情合理，唔入先奇。
NO.18 白宮淪陷3﹕天使淪陷
——白宮又出事
美國咁強大，但偏偏有套電影，叫個「白宮淪陷」，呢個系列連拍三集，每次都係白宮出事，總統有難，要勇敢嘅主角拯救一切。美國荷里活式動作巨片，劇情緊湊又有張力，當然相當好睇。男女老幼，都可以食住花生享受呢種電影。有時候睇戲無必要咁花心力，可以輕鬆睇完，都係一件賞心樂事。2019，白宮又淪陷，邊個有能力救出美國總統？邊個忠，邊個奸？一齊睇睇呢部爆谷電影。
NO.16 小丑回魂2
——怪誕驚心
《小丑回魂2》，相對前作《小丑回魂》，集中描繪咁多位角色，由細路仔變成大人之後嘅人生，而命中注定，第1集嘅小丑亦都喺十多年之後再現小鎮，迫使佢哋一齊重返呢個成長之地，面對自己過去最深最怕嘅心魔。《小丑回魂2》，唔再只係一般嘅恐怖電影，而係講緊大人成長之後嘅無力、無奈，而佢哋解決小丑嘅方法，更加有成長意味。怪誕驚心，小丑回魂，嚇到個心都離一離。
NO.15 殺神John Wick 3
——奇洛李維斯
十步殺一人，千里不留行。李白嘅詩，正正喺《殺神》電影系列入面，John Wick嘅寫照。《殺神》電影系列嘅魅力傳遍全球，當中嘅暴力美學，更將殺手電影拉上咗一個新嘅高峰。由奇洛李維斯飾演嘅主角John Wick，用一支筆，都可以殺人，真係去到飛花落葉，皆可傷人嘅境地。John Wick喺第3集之中，唔再係無敵，反而落難逃亡，更見人物變化。2020，唔知會唔會出第4集呢？
NO.13 哥斯拉Ⅱ：王者巨獸
——怪獸救地球
日木電影史上最經典嘅怪獸代表，哥斯拉，可以話係日本怪獸創作之中嘅始祖。香港呢個咁受日本影響嘅地方，對哥斯拉當然都唔會陌生。哥斯拉以前只係一隻破壞世界嘅怪獸，但隨往時代嘅改變，佢變得愈嚟愈有內涵，甚至喺2019年最新哥斯拉電影《哥斯拉Ⅱ：王者巨獸》，人類仲要靠佢嚟打救地球！人類點同哥斯拉合作，一齊打敗其他怪獸？有興趣嘅，就唔可以唔睇呢部電影喇！
NO.11 POKÉMON 神探Pikachu
——比卡比卡超！
香港八、九十後嘅童年回憶，都係來自日本動漫，男女通殺，有可愛到好似車厘龜，有型到好似噴火龍咁，無錯，就係我哋成日睇嘅竉物小精靈！有邊個細細個無喺電視上睇過竉物小精靈？有邊個唔鍾意小智嘅朋友，比卡超？十萬伏特，電光火石，聽到都識背喇！電影《POKÉMON 神探Pikachu》風行全球，正正反映咗呢種集體回憶嘅魅力。比卡超，由始至終，都活喺我哋嘅心中。
NO.10 狂野時速：雙雄聯盟
——男人嘅浪漫
有一個系列嘅電影，永遠都係唔同世代之中，男人嘅浪漫。速度、激情、跑車、比賽、美女⋯⋯呢個系列，正正係《狂野時速》，一連9集，成為電影史上長篇傳奇，成為咗無數男人浪漫嘅幻想。呢個系列喺2019年又出咗外傳電影《狂野時速：雙雄聯盟》，型男連場打鬥、射擊，開車奔馳於暴力與罪惡之間，再次延續《狂野時速》電影傳奇！香港地，唔係人人有靚車，唯有睇戲喇！
NO.8 銃夢：戰鬥天使
——經典漫畫改編
香港人，有兩樣嘢係好鍾意嘅，日本嘅漫畫，同美國嘅電影。如果將兩樣嘢合二為一，就係2019年大受歡迎嘅科幻動作片，《銃夢：戰鬥天使》喇！《銃夢：戰鬥天使》原著係日本漫畫家木城幸人創作嘅漫畫《銃夢》，根據《銃夢》嘅OVA改編，由勞勃·羅里葛茲執導，化身為美國電影。日本漫畫嘅背景，美國電影嘅特技，精彩嘅打鬥故事，難怪會名列第8名，咁多香港人留意嘅。
NO.5 蜘蛛俠：決戰千里
——最正嘅Peter Parker
香港人最愛睇英雄片，第1名已經係《復仇者聯盟4：終局之戰》，而第5名呢，就係呢部時間線之後，漫威重頭戲《蜘蛛俠：決戰千里》。明眼人一睇，就知繼Iron man之後，Spider man即將取而代之，成為推動主線劇情嘅關鍵人物。好多人都話，呢部電影嘅Peter Parker，先至係最原汁原味嘅。蜘蛛俠點樣面對心魔，打敗強敵？如果你仲未睇，又鍾意英雄片，記得要睇喇！
NO.3 阿拉丁
——滿足你嘅願望
香港人，細細個就已經俾迪士尼嘅童話故事吸引，好似今年排名第7嘅《獅子王》，就充分表達咗呢種集體回憶嘅魅力。2019，電影《阿拉丁》非常火紅，排名全港最受關注第3位。阿拉丁摸摸神燈，燈神畀佢三個願望；阿拉丁坐住飛氈，穿梭天上地下；阿拉丁經歷苦難，終於有美人相伴。真人版《阿拉丁》，歌舞出色，演出精彩，香港人入場，開心又有童真，滿足快樂嘅願望。
【以上圖文為香港網路溫度計調查結果，未經授權請勿轉載、改寫】
分析說明：
本研究資料由《KEYPO大數據關鍵引擎》提供，分析時間範圍為2019年01月01日至2019年12月22日。
網路大數據系統觀測港澳地區上萬個網站頻道，包括新聞頻道、Facebook、Instagram及各大討論區、BLOG等，針對討論『香港二十大最受關注電影』相關文本進行分析，並根據網友就該議題之討論及結合香港偶像劇場年度電影票房，以各佔50％的比例排名。
本文分析之結果，非參考投票、民調、網路問卷等資料，名次僅代表網路討論熱度大小，不代表網友正負評價。
分享本篇文章
你可能也會喜歡這些文章 :